Dôk dăp dŭm anŭng chả ram mrâo leh đŭng dưm hlăm hip êăt, amai Ngô Thị Thu ti ƀuôn hgŭm Quy Nhơn brei thâo, hip êăt anei jing mnơ̆ng mơ̆ng kahan răng mgang knông lăn ti mbah kdrŭn Quy Nhơn đru ñu mâo hŏng anei sa thŭn. Grăp mlam ñu dưi hnêč lŏ mă bruă dăp chả ram hlăm hip êăt pioh ba čhĭ kơ hrue êdei. Thu yăl dliê, gŏ sang ñu dôk hlăm klei dleh dlan, ung mâo klei truh bi drăm êdeh êdâo, hlŏgn êwiên đih sa anôk êbeh 20 thŭn hŏng anei leh. Hdĭp ară anei knŏng hŏng bruă mkra  chả ram, đru mdul kơ klei hdĭp hlăm grăp hrue, blei êa drao gŭn kơ ung, lehanăn rông dua čô anak hriăm hră mơar.

 “Êlâo dih nao mă bruă mưn mkra chả ram thuê, kâo mâo klei kwưh hŏng êpul hgŭm amai adei mniê. Snăn mâo kahan răng mgang knông lăn mđup brei sa boh hip bi êăt, kâo ngă bruă mkra thiăm čiăng mâo mnơ̆ng pioh čhĭ. Kâo ƀuh hơĭt hĭn leh čiăgn rông dua čô anak hriăm hră mơar, lehanăn rông ung. Kâo pioh mnơ̆ng anei hŏng klei jăk, rơ̆ng dưi jing mnơ̆ng doh. Phung kahan răng mgang knông lăn mâo nanao klei čuă êmuh. Kâo gĭr yơh hlăm klei hdĭp.”

Ngă klei bi hmô “Grăp hrue kăm đru sa gŏ sang dôk hlăm klei dleh dlan”, mơ̆ng thŭn 2023 truh kơ ară anei, kahan răng mgang knông lăn čar Gia Lai đru leh truh 750 gŏ sang dôk hlăm klei dleh dlan, lehanăn gŏ sang phung knŭk kna dlăng ba, iêo bi mkrum mâo êbeh 810 êklăk prăk, 1,7 tôn braih, 47 kdrăp hiu duah ƀơ̆ng hŏng giăm   3.000 hrue ai mă bruă đru mkra wĭt pưk sang. Thŭn  2024, hdră mă bruă anei mâo leh Anôk bruă kiă kriê klei hâo hưn gưl dlông, jing sa hlăm 7 klei bi hmô kơ bruă đru čung ba mnuih ƀuôn sang hŏng klei mbruă hlăm kluôm ala.

Trung tá Nguyễn Tùng Giang, Pô ngă bruă kđi čar kơ kđông Biên phòng mbha kdrŭn Quy Nhơn, brei thâo: Hlăm klei ngă bruă đru čung ba anăn, êpul êya mâo nanao klei bi mguôp kjăp hŏng bruă sang čư̆ êa, êpul êya hiu bi ksiêm yap bi nik, ruah hlei gŏ sang srăng đru êlâo tui hlue klei dleh dlan dôk găn. Bi dŭm gŏ sang dôk mâo mnuih dưi mă bruă knuă, snăn mkăp brei kdrăp mă bruă pioh digơ̆ hiu duah ƀơ̆ng. Bi hŏng dŭm gŏ sang knŭk kna dlăng ba, phung mduôn amâo mâo anôk jưh knang, knuă druh lĭng kahan đru nao mkra brei pưk sang, mkra brei mnơ̆ng mnuă yua. Klei ngă anei đru leh tŭ jing hlăm klei lĭng kahan jĕ giăm hĭn hŏng mnuih ƀuôn sang, mâo klei thâo bi mguôp siă suôr dua nah.

 “Tui si hdră êlan mơ̆ng kđông jing ngă klei sĭt, păn kjăp mơ̆ng alŭ wăl hlăm klei bi mguôp mbĭt hŏng êpul bruă mặt trận, êpul hgŭm mniê, êpyul hgŭm phung ngă lŏ hma… kñăm duah dŭm hdră êlan đru bi djŏ guôp. Ayŏng adei nao truh hŏng grăp boh sang cuă êmuh dlăng ya dŏ sang anăn kƀah, tơdah jing êgao hĭn hŏng ai dưi mơ̆ng lĭng kahan, snăn êpul êya srăng bi mguôp hŏng dŭm dhar bruă mkăn tui duah hdră êlan đru. Ară anei dŭm keli duah ƀơ̆ng mâo đru ba wĭt leh klei tŭ dưn jăk.”

Bi hlăm krĭng čư̆ čhiăng nah yŭ čar Gia Lai, hlăk knhal jih mlan 10/2025, Êpul ngă bruă duh mkra mơ̆ng bruă lĭng kahan mrô 75 (Binh đoàn 15) mâo mđup brei leh 51 drei êmô ana mđai kơ dŭm gŏ sang ƀun hlăm 10 boh ƀuôn hlăm dua boh ƀuôn hgŭm  Ia Krêl lehanăn Đức Cơ, hŏng ênoh bi liê êbeh 1 êklai prăk. Ăt hlăm wưng anăn mơh, Binh đoàn lŏ ba jao bruă leh ngă jing ba klei mngač kơ ƀuôn sang, pui kmlă bi êran hŏng pil yang hrue hlăm 5,2 km, mâo mkŏ mkra hlăm dua boh ƀuôn Nẻh lehanăn Al Gôn, hŏng ênoh êbeh 427 êklăk prăk. Pui klmă pioh mtrang mngač mâo kă hlăm jih êlan klông ƀuôn sang, ti sang hră mơar, ti sang bi kƀĭn ƀuôn, lehanăn sang kkuh mpŭ.  Phùng Văn Cường, K’iăng khua knơ̆ng bruă sang čư̆ êa ƀuôn hgŭm Ia Krêl, lač:

 “Anei jing bruă ngă bŏ hŏng klei yuôm bhăn, bi êdah ai tiê klei khăp hŏng mnuih ƀuôn sang dŭm boh ƀuôn hlăm ƀuôn hgŭm Ia Krêl, mjing klei jăk găl kơ mnuih ƀuôn sang êrô êbat, bi hrŏ klei truh tơl hlăm êlan klông, lehanăn mâo hdră duah ƀơ̆ng hŏng klei kjăp. Khădah Binh đoàn 15 dôk tuôm hŏng lu klei dleh dlan, ƀiădah ăt gir đru kơ êpul bruă Đảng alŭ wăl ngă jăk bruă mkŏ mkra krĭgn ƀuôn sang mrâo.”

Đại tá Khuất Bá Cao, Khua bruă Đảng, Kơiăng knơ̆ng kiă kriê Binh đoàn 15, brei thâo: Hŏng hdră êlan “Đru kơ klei duah ƀơ̆ng, kuič mngač klei đăo knang”, hjăn thŭn 2024, Binh đoàn mâo mkŏ mjing leh 23 mta bruă hŏng giăm 45 km êlan klei pui kmlă, 1.500 gơ̆ng pui ka ăngpul, hŏng ênoh bi liê jih jang truh 4 êklai prăk, thŭn 2025 srăng ngă thiăm truh 13 mta bruă, hŏng ênoh êbeh 3 êklai prăk. Mbĭt hŏng anăn, êpul êya mâo đru lăm lui leh êbeh 350 boh sang tĭ brôč, đru rŭ mdơ̆ng sang bi đru, mkŏ mjing mkă dlăng mdrao mgŭn kơ mnuih ƀuôn sang, mkra sang roong kơ mnuih ƀuôn sang. Đại tá Khuất Bá Cao, lač klă:

 “Hlam wưng tinăp, Bruă Đảng Binh đoàn 15 srăng kiă kriê dŭm êpul êya  mâo klei bi hgŭm hŏng dŭm êpul bruă Đảng, bruă sang čư̆ êa alŭ wăl, ngă lu bruă yuôm bhăn hĭn, ngă bi tŭ jing bruă ala čar kñăm mđĭ kyar klei duh mkra ala ƀuôn hlăm krĭng mnuih djuê ƀiă, lehanăn krĭng čư̆ čhiăng, mdrăm mbĭt bi rŭ mdơ̆ng ƀuôn sang doh siam, kreh dhar, ƀrư̆ ƀrư̆ mđĭ klei hdĭp mda.”

Jih jang dŭm klei bi hmô “đru čung ba mnuih ƀuôn sang hŏng klei mbruă” mơ̆ng lĭng kahan ti čar Gia Lai, amâo mâo djŏ knŏng jing jăk hlăm hdră mă bruă, ƀiădah yuôm bhăn hlăm ai tiê, mđĭ hĭn klei tŭ dưn klei duh ƀơ̆ng, đru kơ mnuih ƀuôn sang kpưn đĭ. Hŏng dŭm bruă ngă êdu êun boh hŏng klei thâo khăp đru lŏ bi hyuă kjăp hĭn leh klei thâo bi mguôp plah wah lĭng kahan hŏng mnuih ƀuôn sang, mjing ai ktang hlăm klei thâo bi mguôp hlăm alŭ wăl./.