Ti hdră Sang hră knŭk kna čiêm rông phung hđeh mnuih djuê ƀiă mlir gưl sa – gưl dua să Mô Rai, čar Quảng Ngãi, êlâo adih hlăm kdriêk Sa Thầy, čar Kon Tum, dŭm êtuh čô kỹ sư, mnuih mă bruă dôk ngă bruă wăt hruê mdei 30/4, 1/5. Dŭm hdră mơ̆ng atur, gơ̆ng, tria truh kơ klia mtih mâo pŏk ngă mđrăm mbĭt. Khădah yan adiê dleh dưi ksiêm dlăng, mđiă hjan mdê mdô ƀiădah ăt rơ̆ng kjăp hdră mă bruă. Amâo djŏ ƀiă ôh mnuih mă bruă ti alŭ wăl nao ngă bruă, đru mâo hnư hrui wĭt, đru mkŏ mkra sang hră kơ anak aneh čô.

Nguyễn Văn Hồng (66 thŭn), dôk ti ƀuôn Sộp, să Mô Rai, čar Quảng Ngãi siă suôr hŏng hdră bruă anei giăm 2 mlan. Bruă hlăm grăp hruê mơ̆ng ñu jing kă msei čiăng tuh bêtông. Hŏng ñu, hdră anei amâo djŏ knŏng mjing bruă mă ƀiădah lŏ jing klei čang hmăng bi mlih kơ anak aneh krĭng knông lăn.

“Mnuih mă bruă hmei gĭr mă bruă knuă čiăng mtrŭt mđĭ wưng hluê ngă. Kâo mă bruă tinei giăm 2 mlan leh, mphŭn mơ̆ng 6h krah truh 5h tlam. Kâo mă bruă hlăm hruê đuič. Mnuih buôn sang krĭng knông lăn čang hmăng sang hră hnưm dưi ngă leh čiăng kơ anak aneh mâo klei găl nao hriăm hră jăk hĭn”.

Mđrĭng hŏng êpul ngă bruă, êpul đru kčĕ, ksiêm dlăng mâo 8 čô ăt krơ̆ng hdră ngă bruă jih hruê mdei, ksiêm dlăng kjăp grăp kdrêč bruă.

Hdră Sang hră knŭk kna čiêm rông phung hđeh mnuih djuê ƀiă mlir gưl sa – gưl dua să Mô Rai mâo ênoh duh êbeh 225 êklai prăk, wưng hluê ngă 215 hruê. Truh ară anei, ênoh hluê ngă mâo hlăm brô 28%, adôk êmưt mkă hŏng hdră kčah. Leh hluê hdră atur, dŭm êpul dôk mjêč ngă nah dlông.

Hluê si hdră kčah, hruê 30/7 srăng ngă leh dŭm bruă phŭn, leh kơnăn bi ruê̆ hdră mă bruă knhal jih mlan 8. Khă snăn, ƀô̆ lăn ka kjăp brei msir mghaih hmăi leh kơ wưng hluê ngă bruă. Leh wưng mdei, phung nga mkra tĭng srăng ba nao thiăm 90 čô mnuih mă bruă, mđĭ ênoh mnuih mă bruă truh giăm 300 čô.

Čuah nao mdiăng mnơ̆ng kbưi, ênoh đĭ truh dua blư̆, boh tâo, ƀrĭk ăt đĭ, hmăi truh kơ ênoh bi liê lehanăn wưng hluê ngă. Nguyễn Ngọc Bách, Khua gĭt gai hdră Sang hră knŭk kna čiêm rông phung hđeh mnuih djuê ƀiă mlir gưl sa – gưl dua să Mô Rai brei thâo, ênoh mnơ̆ng yua rŭ mdơ̆ng đĭ ba lu klei dleh kơ anôk ngă mkra hdră bruă.

“Ară anei, jih jang kdrêč bruă dưi mtrŭt mđĭ hluê ngă pral, mâo anôk dôk mkra tal tal 3 leh. Phung ngă mkra dôk mđĭ ênoh mnuih mă bruă čiăng rơ̆ng wưng hluê ngă. Hlăm wưng mdei knăm mơak, mnuih mă bruă ăt nao mă bruă msĕ aguah tlam. Hlăm wưng mdei knăm mơak, mnuih mă bruă dưi mđĭ thiăm prăk. Čiăng dưi bi leh djŏ wưng dŭm bruă mâo ƀuăn leh.

Mrâo anei, phung khua knơ̆ng bruă sang čư̆ êa čar Quảng Ngãi nao ksiêm dlăng leh bruă hluê ngă sang hră knŭk kna čiêm rông ti 4 să knông lăn Rờ Kơi, Mô Rai, Sa Loong lehanăn Dục Nông. Dŭm hdră dưi rŭ mdơ̆ng mơ̆ng mlan 11/2025 tĭng srăng ngă leh, ba yua hlăm thŭn hriăm 2026–2027.

Y Ngọc, Kơiăng khua knơ̆ng bruă sang čư̆ êa čar Quảng Ngãi mñă, dŭm êpul brei bi hgŭm kjăp, mtrŭt mđĭ wưng hluê ngă, rơ̆ng hnơ̆ng tŭ kăk, mbĭt anăn pral ruh mtlaih klei dleh dlan kơ prăk duh lehanăn mnơ̆ng yua rŭ mdơ̆ng.

“Mkă hŏng dŭm anôk rŭ mdơ̆ng mkăn, hdră sang hră knŭk kna čiêm rông phung hđeh mnuih djuê ƀiă mlir gưl ti să Mô Rai mâo lu klei dleh dlan hĭn. Phung duh bi liê lehanăn phung ngă mkra brei ƀuăn rơ̆ng hdră anei dưi mŭt ngă bruă hlăm thŭn hriăm mrâo 2026–2027. Kâo mtă kơ phung ngă mkra lŏ ba nao êpul mă bruă, mtrŭt mđĭ wưng ngă bruă čiăng pral hluê ngă dŭm hdră bruă.

Čar Quảng Ngãi dôk pŏk hdră rŭ mdơ̆ng 9 sang hră knŭk kna čiêm rông mlir gưl ti dŭm să knông lăn, kah mbha 2 wưng, hŏng ênoh hđeh hriăm mơ̆ng 700 – 1.600 čô hđeh, dưi duh bi liê kluôm. Amâo djŏ knŏng mđĭ klei găl hriăm hră, dŭm hdră anei lŏ đru bi hơĭt klei hdĭp, krơ̆ng kjăp mnuih ƀuôn sang, rơ̆ng hdră răng mgang klei êđăp ênang krĭng knông lăn.

Ti krah krĭng knông lăn, ai êwa ngă bruă hruê mơak amâo djŏ knŏng jing klei yăl dliê kơ wưng hluê ngă, ƀiădah lŏ ba mơĭt klei čang hmăng kơ dŭm adŭ hriăm mrâo, êdei anăp mrâo kơ krĭng knông lăn dleh dlan.