Ară anei, čar Daklak mâo leh êbeh  1.060 mnuih mâo kơhưm, dôk hlăm 49 djuê ana hdĭp mda hlăm alŭ wăl. Diñu jing phung thâo bi hmô, thâo săng kơ knhuah bhiăn djuê ana, păn kjăp ai tiê klei mĭn mnuih ƀuôn sang, jing anôk kơ mnuih ƀuôn sang jưh knang, jing kdrông plah wah mnuih ƀuôn sang hŏng bruă sang čư̆ êa, jih ai tiê hgŭm hlăm bruă mđĭ kyar klei duh mkra ala ƀuôn, răng kriê klei êđăp ênang, bi kdơ̆ng hŏng djăp mta mnêč jhat mơ̆ng phung bi roh, đru bi hơĭt bruă kđi čar hlăm ƀuôn sang.

Ti anôk bi tuôm, phung bi ala mâo leh klei bi yăl dliê mđĭ ai hdơ̆ng găp, lač kơ klei đru čung ba mnuih ƀuôn sang, ngă klei bi grăng, mkŏ mkra krĭng ƀuôn sang mrâo, mtrŭt mjhar phung hđeh êdam nao mŭt kahan. Y-Tum Ayŭn, mnuih mâo kơhưm ti Ea Tuk, ƀuôn hgŭm Čư̆ Pơ̆ng, jing klei sa ai mơ̆ng mnuih ƀuôn sang jing atur kjăp čiăng mkŏ mjing ƀuôn sang trei mđao, jăk yâo. Kyuanăn, grăp čô mnuih brei mâo klei thâo bi mguôp, sa ai tiê rŭ mdơ̆ng ƀuôn sang pô.

 “Lŏ dơ̆ng mbĭt hŏng Đảng, bruă sang čư̆ êa alŭ wăl rŭ mdơ̆ng ƀuôn sang hlăm klei mđĭ kyar bruă duh mkra ala ƀuôn, hơĭt kjăp bruă kđi čar, hơĭt kjăp klei êđăp ênang yang ƀuôn hlăm alŭ wăl, hâo hưn, mjuăt bi hriăm mnuih ƀuôn sang kơ dŭm boh klei mrâ, djŏ guôp, mtrŭt mjhar mnuih ƀuôn sang duh ƀơ̆ng, duh mĭn kơ anak čô hriăm hră mơar, jih ai tiê kpưn đĭ msir klei ư̆ êpa bi hrŏ klei ƀun knap”.

Phung bi ala mâo klei bi trông, bi kah mbha hdră êlan klei duh ƀơ̆ng, lehanăn mđĭ klei thâo răng, bi kdơ̆ng hŏng djăp mta mnêč jhat mơ̆ng phung bi roh, hyuă kjăp klei thâo bi mguôp lĭng kahan lehanăn mnuih ƀuôn sang.

Blŭ hrăm ti anôk bi tuôm, Đại tá Niê Ta, Khua knơ̆ng kiă kriê kahan čar Daklak lač jăk kơ dŭm klei đru mguôp prŏng prĭn, yuôm bhăn mơ̆ng phung khua mduôn, mnuih mâo kơhưm hŏng bruă čuăn lĭng kahan, răng mgang alŭ wăl. Lehanăn mâo klei mtă kơ phung mâo kơhưm lŏ dơ̆ng bi hgŭm jăk plah wah hdră bhiăn knŭk kna hŏng klei bhiăn djuê ana pô, mbruă hlăm klei hâo hưn, mtrŭt mjhar mnuih ƀuôn sang.

“Păn kjăp hdră êlan mơ̆ng Đảng, hdră bjhiăn knŭk kna, bi mguôp plah wah hdră bhiăn knŭk kna hŏng klei bhiăn djuê ana čiăng mâo hdră hâo hưn jăk kơ mnuih ƀuôn sang, lehanăn mă bruă bi hlue djŏ hŏng hdră bhiăn phŭn, lehanăn hdră bhiăn knŭk kna. Hâo hưn, mtă mtăn kơ mnuih ƀuôn sang pô đăm duah hmư̆ dŭm klei duah mčeh luar mơ̆ng phung bi roh, ngă luič klei êđăp ênang ƀuôn sang, klei dưi êngiê lăn čar”.

Ƀri wưng anei, Knơ̆ng bruă kiă kriê kahan čar Daklak mđup brei leh hră bi mni kơ 30 čô mnuih mâo leh bruă tŭ dưn hlăm bruă đru răng mgang klei êđăp ênang, đru hlăm bruă lĭng kahan alŭ wăl thŭn 2025, đru bi mkŏ mjing klei thâo răng mgang hlăm mnuih ƀuôn sang./.