Êpul ksiêm dlăng klei ruah khua phung bi ala bruă kƀĭn ala gưl 16, lehanăn phung bi ala Êpul gơ̆ng bruă ƀuôn sang djăp gưl mâo Đại tướng Lương Tam Quang, Khua phŭn bruă kahan ksiêm ngă khua êpul mrâo mâo leh klei mă bruă hŏng anôk bruă kiă kriê klei ruah khua ƀuôn prŏng Huế. Đại tướng Lương Tam Quang čih pioh, bi myuôm klei čŏng ngă bruă mơ̆ng ƀuôn prŏng Huế kơ klei prăp êmiêt klei ruah khua. Lehanăn mtă kơ ƀuôn prŏng Huế lŏ dơ̆ng ksiêm dlăng jih jang klei kiă kriê mơ̆ng gưl dlông, boh nik mđing hlăm bruă răng mgang klei êđăp ênang bruă kđi čar, klei êđăp ênang yang ƀuôn, klei êđăp ênang bruă hâo hưn, lehanăn klei êđăp ênang kjăp kơ jih jang klei ruah khua, amâo mâo lui lĕ hlăm klei kdjăt hŏng djăp mta.

“Bruă prăp êmiêt kơ klei ruah khua ti ƀuôn prŏng Huế mâo ngă leh ênŭm ênap, pral ba boh tŭ dưn jăk. Tal êlâo jing bruă kiă kriê, gĭt gai klei ruah khua mâo ngă mơ̆ng hnưm, hŏng klei mjêč pral rơ̆ng djŏ hdră êlan, djŏ hŏng klei čoh čuăn, mâo klei hnŭk êngiê, lehanăn klă mngač. Mkŏ mjing leh tŭ jing klei bi trông tal sa kơ bruă dăp mnuih, kơ ênoh, hưn mthâo mnuih mgơ̆ng ruah phung bi ala bruă kƀĭn ala, phung bi ala Êpul gơ̆ng bruă ƀuôn sang djăp gưl . bruă mkŏ mjing klei bi kƀĭntrông čhai gưl tal dua ăt mâo mprăp leh hŏng klei ƀhĭ ênŭm”

Ti Daklak, dhar bruă klei ruah khua čar ăt mâo mkŏ mjing leh klei bi kƀĭn tal 5 rơ̆ng bi kjăp jih jang bruă kơ klei ruah khua phung bi ala bruă kƀĭn ala gưl 16, lehanăn phung bi ala êpul gơ̆ng bruă ƀuôn sang djăp gưl wưng thŭn 2026–2031 hŏng klei hnŭk êngiê djŏ klei bhiăn lehanăn êđăp ênang.

Tui si klei hâo mdah mơ̆ng anôk bruă kia kriê klei ruah khua čar Daklak, truh kơ ară anei, bruă prăp êmiêt klei ruah khua hlăm čar mâo ngă leh hŏng lu klei tŭ dưn jăk. Anôk bruă kiă kriê klei ruah khua čar mkŏ mjing leh klei bi kƀĭn tal 4, mâo lu klei hưn mdah djăp ênŭm jih jang bruă. Êpul hgŭm bruă ƀuôn sang čar mkŏ mjing 11 êpul ksiêm dlăng, nao ksiêm dlăng ti 102 boh ƀuôn hgŭm pral hmao păn kjăp, ruh mgaih klei dleh dlan hlăm nah gŭ.

Knơ̆ng bruă kiă kriê bruă knuă mâo mkŏ mjing klei mjuăt hriăm kơ êbeh 15.000 čô phung bi ala ti 103 anôk mkŏ hlăm kluôm čar, mđing kơ dŭm bruă trông čhai, hlăm anăn klei bi trông gưl tal 2 gưl čar mâo bi tŭ ư leh kơ ênoh 22 čô pô mgơ̆ng ruah phung bi ala bruă kƀĭn ala, lehanăn 144 čô pô mgơ̆ng ruah êpul gơ̆ng bruă ƀuôn sang čar.  Ti dŭm gưl ƀuôn hgŭm hlăm kluôm čar mâo tŭ mă leh êbeh 4.600 hră mơar nao mgơ̆ng ruah, mâo dŭm čô čŏng mgơ̆ng ruah hjăn djŏ hŏng klei čoh čuăn.

Blŭ hrăm ti anôk bi kƀĭn, Cao Thị Hòa An, Khua Êpul gơ̆ng bruă ƀuôn sang čar Daklak mñă hlăm wưng tinăp anôk bruă lŏ mkŏ mjing bi jăk bruă mă klei blŭ anôk mnuih mgơ̆ng ruah dôk lehanăn mă bruă, mprăp bi ênŭm kơ klei bi kƀĭn tal 3, mbĭt anăn rơ̆ng kjăp kơ klei êđăp ênang, mđĭ hĭn klei hâo hưn, bi leh jăk anôk ruah khua bi djăp ênoh čuăn, djŏ klei bhiăn, klă sĭt srăng jing hrue mơak kơ jih jang mnuih ƀuôn sang.

“Bruă Mặt trận, dŭm êpul êya kđi čar yang ƀuôn mđing duh kơ mnuih ƀuôn sang h’uh mđao, trai djăp, mâo klei jăk jĭn. Hŏng klei thâo mkiêt mkriêm bi năng hŏng  Tết djuê ana. Mguôp hŏng anăn, hâo hưn kơ klei ruah khua, čiăng kơ jih jang mnuih ƀuôn sang mâo bruă klam, lehanăn klei dưi kơ grăp čô nao ruah khua. Mtă kơ jih jang phung knuă druh ngă jăk hĭn bruă hâo hưn mơak yan mnga, mơak Đảng, mơak kơ lăn čar, ƀiădah anăp truh kơ klei mơak jih jang mnuih ƀuôn sang nao ruah khua.”

Ti Anôk bi kƀĭn tal 54 mơ̆ng dhar bruă gĭt gai klei ruah khua, mâo ksiêm dlăng lehanăn bi klă leh gưl tal dua ênoh dăp kơ mnuih mơ̆ng dŭm anôk bruă, êpul êya bruă gưl dlông, lehanăn alŭ wăl ba mgơ̆ng ruah pô bi ala bruă kƀĭn ala gưl 16. Blŭ hrăm ti anôk bi kƀĭn, Khua bruă kƀĭn ala Trần Thanh Mẫn  nêu rõi: Hrue 15/3 srăng mkŏ mjing klei ruah khua bruă kƀĭn ala gưl 16, lehanăn Êpul gơ̆ng bruă ƀuôn sang djăp gưl wưng thŭn 2026 - 2031. Leh klei ksiêm dlăng bruă prăp êmiêt klei ruah khua ti krĭng dap mnai krông Cửu Long leh êgao, tui si Khua bruă kƀĭn ala, dŭm alŭ wăl mâo jao leh bruă klă mngač, lehanăn bi myuôm knơ̆ng bruă Mặt trận čar kwar gưl dlông Việt Nam mkŏ mjing leh tŭ jing klei bi kƀĭn tal 1, tal 2. Hlăm hrue kăm tinăp, Khua bruă kƀĭn ala  mtă, dŭm anôk bruă djŏ tuôm lŏ hyuă kjăp hĭn klei ksiêm dlăng, čiăng pral mâo mghaih msir dŭm mta bruă adôk ka djŏ, Anôk bruă kiă kriê klei ruah khua mđing jih hnơ̆ng gĭt gai bruă mkŏ mjing hŏng klei kjăp. Boh nik hlăm klei bi trông gưl tal 3 anăp anei./.