Trung tướng Nguyễn Anh Tuấn, Khua hlăm bruă Đảng Lĭng kahan răng mgang knông lăn brei thâo, drông Yan mnga mrâo thŭn anei, bruă Đảng, Knơ̆ng gĭt gai lĭng kahan răng mgang knông lăn gĭt gai leh dŭm êpul êya čih mkra hdră kčah, ngă jăk bruă mprăp, tiŏ nao dŭm êbâo êpul mă bruă truh ti alŭ wăl bi hgŭm hŏng bruă Đảng, bruă sang čư̆ êa alŭ wăl mkŏ mjing kơ lĭng kahan lehanăn mnuih ƀuôn sang drông Têt, mơak yan mnga lehanăn krơ̆ng kjăp klei êđăp ênang ti dŭm ƀuôn sang krĭng knông lăn.

Mrâo êgao, ti să Pa Tần, kdriêk Sìn Hồ, čar Lai Châu, mkŏ mjing leh hdră “Yan mnga knông lăn hơuh mđao ai tiê mnuih ƀuôn sang”, hŏng lu hdră bruă klă sĭt. Nao lehanăn blŭ hrăm ti hdră anei, Khua lăn čar Lương Cường bi êdah klei bi kngăr lehanăn mgei ai tiê kyua phung knuă druh, lĭng kahan răng mgang knông lăn mâo leh klei bi hgŭm kjăp hŏng bruă Đảng, bruă sang čư̆ êa alŭ wăl, dŭm gưl, dhar bruă mđing dlăng Têt kơ mnuih ƀuôn sang ti krĭng knông lăn. Khua lăn čar lač, anei jing bruă ngă bi êdah ai tiê đua klam, knhuah gru thâo bi kjăp mơ̆ng djuê ana lehanăn knhuah jăk siam mơ̆ng Lĭng kahan yang ƀuôn VIệt Nam jhŏng ktang, đru bi saim pŏk rup “Lĭng kahan Awa Hô” hlăm ênuk gưl mrâo.

 “Hdră anei dưi mkŏ mjing hŏng lu bruă ngă klă sĭt, mâo boh tŭ yuôm, siă suôr hŏng mnuih ƀuôn sang dŭm djuê ana, mơ̆ng anăn dưi iêu mtrŭt klei đru, hgŭm kngan mbĭt mơ̆ng dŭm êpul êya bruă, mnuih mơ̆ng Gưl dlông truh kơ alŭ wăl lehanăn dŭm anôk bruă duh mkra. Hŏng êmô mjeh, hnư mnơ̆ng, brai, ƀêñ điŏ, prăk đru hriăm hră kơ phung hđeh ƀun hgao klei dleh dlan, hdră “Đru kơ adei nao sang hră” lehanăn đru mdơ̆ng 400 boh sang… mơ̆ng hdră anei, amâo djŏ knŏng jing mnơ̆ng dhơ̆ng ƀiădah lŏ jing klei mđĭ ai prŏng prĭn, đru kơ dŭm gŏ sang ƀun ti krĭng knông lăn mbĭt hŏng lĭng kahan – mnuih ƀuôn sang kluôm ala drông Têt djuê ana mơ̆ng mnuih djuê ƀiă hơuh mđao, jăk mơak hĭn”.

Ƀri gưl anei, Khua lăn čar Lương Cường jao leh 200 boh sang Hơuh mđao krĭng knông lăn mâo ênoh 10 êklai prăk kơ mnuih ƀuôn sang krĭng knông lăn čar Lai Châu lehanăn mđup brei 11 hnư mnơ̆ng kơ gŏ sang knŭk kna dlăng ba. Hluê si klei hưn mơ̆ng Anôk bruă mkŏ mjing, ênoh hnơ̆ng mnơ̆ng lĭng kahan lehanăn mnuih ƀuôn sang kluôm ala ba mơĭt kơ dŭm krĭng knông lăn hluê hdră “Yan mnga knông lăn hơuh mđao ai tiê mnuih ƀuôn sang” thŭn 2025 truh giăm 25 êklai prăk.

Ăt hlăm wưng êgao, ti krĭng knông lăn dŭm čar hlăm Lăn dap kngư mkŏ mjing leh hdră “Yan mnga knông lăn hơuh mđao ai tiê mnuih ƀuôn sang”. Ti să knông lăn Ia Lôp, kdriêk Êa Sup, čar Dak Lak, hdră “Yan mnga knông lăn hơuh mđao ai tiê mnuih ƀuôn sang”, jao leh 5 boh sang kơ gŏ sang knŭk kna dlăng ba, dŭm gŏ sang êdah êdi, mkŏ mjing hdră ksiêm dlăng, mbha êa drao amâo mă prăk kơ êbeh 300 čô mnuih ƀuôn sang. Ti să knông lăn Ia Pnôn, kdriêk Đức Cơ, čar Gia Lai, hdră “Yan mnga knông lăn hơuh mđao ai tiê mnuih ƀuôn sang” jao leh 100 hnư mnơ̆ng kơ gŏ snag knŭk kna dlăng ba; 20 hnư mnơ̆ng kơ phung hđeh dleh dlan, ksiêm dlăng, mbha êa amâo liê prăk kơ êbeh 200 gŏ sang. Ti să Thuận Hạnh, kdriêk Dak Song, čar Dak Nông, hdră jao leh 250 hnư mnơ̆ng mđup brei kơ gŏ sang ƀun, gŏ sang mâo klei hdĭp dleh dlan lehanăn gŏ sang knŭk kna dlăng ba, phung hđeh mâo klei hdĭp dleh dlan hŏng ênoh 150 êklăk prăk, jao 3 boh sang hgŭm mguôp kơ gŏ sang mâo klei hdĭp dleh dlan ti alŭ wăl.

Dưi lač, hdră “Yan mnga knông lăn hơuh mđao ai tiê mnuih ƀuôn sang” dưi mkŏ mjing hlăm kluôm krĭng knông lăn, plao ksĭ, jing leh sa hlăm dŭm hdră đru kơ ala ƀuôn tŭ dưn, klă sĭt mơ̆ng Lĭng kahan, đru mđing dlăng Têt kơ mnuih ƀun, ba wĭt klei mơak kơ mnuih ƀuôn sang krĭng knông kăn. Mơ̆ng anăn, mđĭ lar ai tiê hgŭm mguôp djuê ana, mñă klă boh tŭ yuôm dhar kreh jăk siam mơ̆ng djuê ana jing khăp čiăng, thâo bi đru, jing knhuah siam mơ̆ng “Lĭng kahan Awa Hô”./.