Bruă duh mkra Việt Nam krŭ wĭt ktang, dôk hlăm êpul dŭm ala čar mâo klei đĭ kyar GDP lu hĭn

Găn leh klei dleh dlan kyua klei ruă tưp Covid-19 leh anăn dŭm klei dleh ksiêm dlăng dlông rŏng lăn, Việt Nam dưi hluê ngă tŭ jing, kluôm ênŭm dŭm mta kñăm, gang mkhư̆, ksiêm dlăng klei ruă tưp, krŭ wĭt leh anăn mđĭ kyar bruă duh mkra ala ƀuôn, mkŏ mjing bruă duh mkra êngiê, čŏng pô, hur har ñŭ kma hŏng tar rŏng lăn. Bruă duh mkra hnơ̆ng prŏng mâo klei hơĭt, dưi ksiêm dlăng klei prăk luč ênoh, dưi rơ̆ng klei mtăp mđơr bruă duh mkra hlăm wưng tuôm hŏng lu klei dleh dlan. Klei đĭ kyar GDP thŭn 2022 mĭn tĭng mâo 8,02%, hnơ̆ng đĭ kyar lu hĭn hlăm wưng thŭn 2011 – 2022. Đĭ kyar GDP kah knar grăp čô thŭn 2022 hluê si ênoh ară anei mâo 95,6 êklăk prăk hlăm sa čô, knar hŏng 4.110 USD, đĭ 393 USD mkă hŏng thŭn 2021. Hnơ̆ng klei blei ba yua (CPI) đĭ 3,15% mkă hŏng thŭn 2021, djăp ênŭm hnơ̆ng čoh čuă bruă kƀĭn ala jao leh. Klei prăk luč ênoh kah knar thŭn 2022 đĭ 2,59% mkă hŏng thŭn 2021, ƀiă hĭn mkă hŏng hnơ̆ng CPI knar knar (đĭ 3,15%)

Lu bruă yuôm bhăn dưi bi mklă mâo boh tŭ yuôm hŏng hdră mđĭ kyar mơ̆ng lăn radar

Klei bi kƀĭn gưl dlông 5 lehanăn Gưl dlông 6, tal XIII bi mklă leh lu bruă yuôm bhăn msĕ si: Tă hdră čuăl mkă kluôm ala čar wưng thŭn 2021 - 2030 lehanăn hnơ̆ng trah dlăng truh thŭn 2050; Lŏ dơ̆ng mđĭ hdră bi mrâo mrang ala čar; Mlih mrâo hdră kiă kriê mơ̆ng Đảng; Mkŏ mkra lehanăn bi leh klei bhiăn Knŭk kna Việt Nam yang ƀuôn ngă phŭn; Hdră mtrŭn, hdră bhiăn kơ lăn ala; bruă lŏ hma, ƀĭng ngă lŏ hma, krĭng ƀuôn sang, bruă duh mkra êpul êya; Mđĭ hnơ̆ng thâo êpul knuă druh đảng viên hlăm wưng mrâo… Phŭn bruă kđi čar ba mdah leh 6 Hdră mtrŭn Krĭng mđĭ kyar bruă duh mkra – ala ƀuôn, rơ̆ng bruă lĭng kahan – klei êđăp ênang ala čar thŭn 2030, hnơ̆ng trah dlăng truh thŭn 2045; mjing klei sa ai hlăm klei thâo săng lehanăn bruă ngă hlăm kluôm Đảng, jih jang mnuih ƀuôn sang, lĭng kahan. Hluê anăn, Anôk bruă kƀĭn ala, knŭk kna bi sĭt leh klei bhiăn hŏng dŭm hdră bruă, klei bi mklă lehanăn mkŏ mjing, hluê ngă mtam hlăm boh sĭt, pŏk klei găl mđĭ kyar h’ĭt kjăp, kluôm dhuôm mơ̆ng ala čar hlăm wưng ti anăp lehanăn sui thŭn./.

Bruă mkŏ mjing, ƀuah mkra hlăm Đảng, gang mkhư̆ klei ƀơ̆ng ngăn, klei amâo mâo jăk ƀrư̆ hruê ƀrư̆ ktang phĭt

Thŭn 2022, Bruă gang mkhư̆ klei ƀơ̆ng ngăn, klei amâo mâo jăk dưi nao êlam hĭn, bi mguôp kjăp hŏng bruă mkŏ mjing, ƀuah mkra hlăm Đảng, gang mkhư̆ klei toh hroh hlăm klei mĭn bruă kđi čar, knhuah hdĭp, knuih hdĭp. Bruă mkŏ mjing êpul gĭt gai bruă gang mkhư̆ klei ƀơ̆ng ngăn klei amâo mâo jăk ti 63 čar, ƀuôn prŏng phŭn kčưm mâo boh tŭ dưn. Bruă ƀuah mkra phung knuă druh, đảng viên dưi hluê ngă jăk, klă sĭt, djŏ hŏng hdră bhiăn mơ̆ng Đảng, klei bhiăn ala čar. Dŭm anôk bruă kcŭt hưn ngă leh klei kcŭt hưn, ksiêm duah giăm 2.500 klei ngă soh kơ klei ƀơ̆ng ngăn, bruă duh mkra, bruă păn, hlăm anăn mâo klei klie ngă soh ƀơ̆ng ngăn, klei amâo mâo jăk kjham, dleh ksiêm dlăng msĕ si: Klei ngă soh ti Anôk bruă bi ala (Phŭn bruă hŏng tač êngao ), klei ngă soh djŏ tuôm hŏng knơ̆ng bruă Việt Á, êpul grŭp FLC, Tân Hoàng Minh, Knơ̆ng bruă AIC, êpul grŭp Vạn Thịnh Phát…Hlăm bruă gang mkhư̆ klei ƀơ̆ng ngăn, bi liê mang, klei amâo mâo jăk dưi đru bi kjăp klei đăo knang mơ̆ng mnuih ƀuôn sang, knuă druh, đảng viên hŏng klei gĭt gai mơ̆ng Đảng leh anăn klei kiă kriê.

Pŏk lu hdră bruă hŏng tač êngao, mđĭ k’hưm mơ̆ng ala čar.

Gưl hiu čhưn klă klơ̆ng ti China mơ̆ng hruê 30/10 truh kơ hruê 1/11 mơ̆ng Khua gĭt Đảng Đảng Nguyênx Phú Trọng jing bruă yuôm bhăn êdi, mâo leh boh tŭ kluôm, đru bi kjăp, mđĭ kyar klei bi mjĕ Việt Nam -China. Mbĭt hŏng anăn jing hdră hiu čhưn gưl knŭk kna truh ti Dhŭng Korea, Indonesia mơ̆ng Khua lăn čar Nguyễn Xuân Phúc, gưl hiu čhưn ti Mi, Hà Lan, Bỉ, Luxembourg mơ̆ng Khua knŭk kna Phạm Minh Chính, gưl hiu čhưn ti Hungary, Angle, Australia, New Zealand, Philippines mơ̆ng Khua bruă kbĭn ala Vương Đình Huệ. Việt Nam ăt nao hgŭm, mâo klei đua klam hlăm dŭm klei kƀĭn trông hlăm krĭng lehanăn tar rŏng lăn msĕ si: ASEAN, AIPA, APEC, Êpul hgŭm lu ala čar… Thŭn 2022 ăt kruăk knăl bruă mkŏ mjing tŭ dưn Thŭn hgŭm mguôp, bi mjĕ mjuk Việt Nam-Lào, Việt Nam-Campuchia. Việt Nam lŏ dơ̆ng bi mklă hdră mtrŭn hŏng tač êngao pŏk mlar, krơ̆ng kjăp wăl anôk êđăp ênang, h’ĭt kjăp čiăng mđĭ kyar lăn čar, mđĭ k’hưm mơ̆ng ala čar.

Việt Nam djŏ ruah hlăm Êpul gơ̆ng klei dưi êngiê anak mnuih mơ̆ng Êpul hgŭm lu ala čar.

Hruê 11/10/2022, Việt Nam gưl tal 2 djŏ ruah hlăm Êpul gơ̆ng klei dưi êngiê anak mnuih mơ̆ng Êpul hgŭm lu ala čar wưng thŭn 2023- 2025, hlăm klei kƀĭn Êpul gơ̆ng prŏng mơ̆ng Êpul hgŭm lu ala čar gưl 77, mkŏ mjing ti New York, ala čar Mi hŏng ênoh hră mplĕ lu. Boh tŭ klei mplĕ hră jing klei čih yap mơ̆ng êpul êya tar rŏng lăn hŏng dŭm klei ƀuăn rơ̆ng leh anăn klei gĭr mơ̆ng Việt Nam kơ bruă mtrŭt mđĭ klei dưi êngiê anak mnuih. Hŏng bruă klam hlăm Êpul gơ̆ng klei dưi êngiê anak mnuih mơ̆ng Êpul hgŭm lu ala, Việt Nam srăng mâo klei găl đru mguôp mtrŭt mđĭ jih jang dŭm klei dưi anak mnuih, bi mguôp leh anăn blŭ hrăm, ƀrư̆ hruê ƀrư̆ rơ̆ng jăk hĭn klei dưi mơ̆ng mnuih ƀuôn sang hlăm djăp mta bruă.

Mkŏ mjing tŭ jing Klei bi lông Mjuăt ktang asei mlei Ngŏ Dhŭng Asi tal 31 (SEA Games 31)

Hŏng pruê̆ blŭ “Kyua sa Ngŏ Dhŭng Asi kjăp ktang hĭn”, Việt Nam mkŏ mjing tŭ jing Klei bi lông Mjuăt ktang asei mlei Ngŏ Dhŭng Asi tal 31 (SEA Games 31) mơ̆ng hruê 12-23/5/2022. Leh 14 hruê bi lông, êpul mjuăt ktang asei mlei Việt Nam mâo mă leh 205 medai êa mah, 125 medai êa êa prăk lehanăn 116 medai êa kông. Việt Nam dôk tal 1 hlăm kluôm êpul hŏng dŭm boh tŭ kdlưn hĭn, rơ̆ng sa knăm SEA Games mtăp mđơr, klă mngač, bi êdah ai tiê hgŭm mguôp mơ̆ng êpul êya ASEAN. Việt Nam mjing leh gru kruăk jăk siam kơ sa ala čar ASEAN jĕ giăm, mhač, khăp kơ tuê, dôk ti ktuê êlan krŭ wĭt lehanăn đĭ kyar kluôm dhuôm./.

Wăl ngăn prăk, sang lăn…mâo lu klei mlih amâo mâo jăk, čiăng ruh mgaih mjêč.

Thŭn 2022 ktuê dlăng lu klei mlih ktang mơ̆ng dŭm anôk mnia mblei msĕ si: sang lăn, trái phiếu knơ̆ng bruă, chứng khoán, êa săng, êa pui…Anôk mnia mblei chứng khoán đĭ trŭn dleh dưi ksiêm dlăng, đĭ ktang hĭn hlăm dŭm mlan akŏ thŭn leh anăn toh hroh ktang ti dŭm mlan knhal jih thŭn. Kyua hmăi mơ̆ng anôk mnia mblei tar rŏng lăn, ênoh êa săng, êa pui hlăm ala čar đĭ yuôm ka tuôm mâo, mbĭt hŏng anăn jing klei kƀah anôk mkăp brei ngă kơ lu sang čhĭ êa săng, êa pui kđăl ƀăng. Klei anei sa kdrêč kyua bruă mgaih msir dŭm klei dleh kpăk, mâo sui hlăm bruă mnia mblei ti dŭm knơ̆ng bruă prŏng, mdưm tal êlâo jing srăng mgaih msir ktang phĭt, mgaih msir bi jih hlăm thŭn 2023.

Klei kƀah êa drao gŭn, mnơ̆ng yua hlăm bruă mdrao mgŭn ba lu klei dleh dlan hlăm hdră ksiêm mkă dlăng, mdrao klei ruă

Dŭm boh sang êa drao hlăm kluôm ala dôk lĕ hlăm klei kƀah êa dtao gŭn, mnơ̆ng yua hlăm wưng sui kyua lu mta phŭn, hlăm anăn mâo klei dleh kpăk hlăm hră m’ar djŏ tuôm kơ bruă blei mprăp, ênoh čhĭ êa drao, kdrăp mnơ̆ng ngă kơ klei thâo săng, klei ngă mdê mdê. Klei kƀah anei hmăi leh kơ hnơ̆ng tŭ ksiêm mkă dlăng, mdrao klei ruă, hmăi truh kơ klei mtăp mđơr lehanăn hdră đru yang ƀuôn. Anei jing sa klei mđing brei pral msir mghaih mơ̆ng Khua knŭk kna, Phŭn bruă mdrao mgŭn lehanăn dŭm anôk bruă djŏ tuôm.

Mkŏ mjing boh tŭ ala čar, boh tŭ Dhar kreh, Boh tŭ gŏ sang leh anăn hnơ̆ng čoh čuăn anak mnuih Việt Nam hlăm wưng mrâo

Lŏ ksiêm wĭt sa thŭn hluê ngă klei bi klă mơ̆ng Khua gĭt gai Đảng Nguyễn Phú Trọng hlăm klei kƀĭn trông Dhar kreh kluôm ala hluê ngă Hdră mtrŭn mơ̆ng klei kƀĭn kluôm tal 13 mơ̆ng Đảng, hruê 29/11, ti Hà Nội mkŏ mjing leh klei kƀĭn trông kreh knhâo ala čar “Mkŏ mjing boh tŭ ala čar, boh tŭ Dhar kreh, Boh tŭ gŏ sang leh anăn hnơ̆ng čoh čuăn anak mnuih Việt Nam hlăm wưng mrâo”. Hruê 17/12 ti Bắc Ninh mkŏ mjing klei kƀĭn trông Dhar kreh thŭn 2022 hŏng akŏ “Hdră kiă kriê, hdră êlan leh anăn ai dưi kơ klei đĭ kyar dhar kreh”. Dŭm klei kƀĭn trông anei dưi mkŏ mjing leh 1 thŭn Klei kƀĭn trông dhar kreh kluôm ala brei ƀuh dŭm mta bruă tal êlâo mơ̆ng Đảng, knŭk kna leh anăn yang ƀuôn hlăm bruă gĭt ktưn mkŏ mjing Dhar kreh Việt Nam đĭ kyar, boh hŏng knhuah djuê ana, čiăng kơ dhar kreh klă klơ̆ng jing ai ktang mơ̆ng lam, tur hlăm ai tiê leh anăn jing boh kdrŭt đĭ kyar ala čar hluê si hdră mtrŭn mơ̆ng klei kƀĭn Kluôm bruă Đảng tal 13.

Mtrŭt mđĭ hdră mlih mrô ala čar

Hruê 22/4/2022, Khua knŭk kna ba mdah leh Klei bi mklă mrô 505/QĐ-TTg mă hruê 10 mlan 10 grăp thŭn jing Hruê mlih mrô ala čar. Thŭn 2022 jing thŭn ƀuh klă dŭm klei tŭ dưn hlăm hdră mkŏ mkra knŭk kna mrô, bruă duh mkra mrô, yang ƀuôn mrô lehanăn hdră ngă bruă mrô. Hdră mlih mrô jing leh bruă ngă hlăm kluôm mnuih ƀuôn sang hŏng klei nao hgŭm mơ̆ng dŭm phŭn, dhar bruă, alŭ wăl. Hdră mtrŭn gưl dlông 6 klă klơ̆ng dlăng bi mlih mrô jing sa hdră mđĭ kyar mrâo mâo boh kdrŭt, bi hrŏ wưng hluê ngă hdră bi mrâo mrang ala čar./.