Klei bi kƀĭn rơ̆ng klei êđăp ênang kơ bruă mđĭ kyar duh mkra ala ƀuôn dŭm čar ti Lăn Dap kngư thŭn 2024 mkŏ mjing ti Lâm Đồng

1- Hrue 25/8/2024, ti ƀuôn prŏng Đà Lạt, čar Lâm Đồng, Khua knŭk kna Phạm Minh Chính kiă kriê klei bi kƀĭn rơ̆ng kơ klei êđăp ênang mđĭ kyar bruă duh mkra ala ƀuôn ti dŭm čar LănDap Kngư. Klei bi kƀĭn mđing trông čhai kơ bruă răng mgang klei êđăp ênang, kñăm mđĭ hĭng klei đĭ kyar bruă duh mkra ala ƀuôn hlăm alŭ wăl.

 Klah čŭn ti anôk bi kƀĭn, Khua knŭk kna Phạm Minh Chính mñă, Lăn Dap Kngư jing anôk yuôm bhăn êdi kơ klei duh mkra, kơ bruă kđi čar, bruă răng gmang klei êđăp ênang, lehanăn răng mgang wăl hdĭp mda lăn čar pô. Đảng, Knŭk kna lehanăn phung kiă kriê Đảng dŭm ênuk gưl, mâo nanao klei mđing uêñ kơ bruă mđĭ kyar krĭng lăn dap kngư. Khua knŭk knka mñă, tal êlâo hĭng jing mnuiih ƀuôn sang brei mâo klei trei mđao, jing knơ̆ng kơ bruă răng mgang klei êđăp ênang, anăn jing klei hdĭp mda mnuih ƀuôn sang brei mâo klei trei mđao mơak mñai.

 Khua knŭk kna Phạm Minh Chính mtă brei mđing kơ 6 mta bruă phŭn, răng mgang kjăp klei êđăp ênang ti Lăn dap kngư pioh kơ klei duh mkra ala ƀuôn dưi đĭ kyar, mghaih msir klei kơ lăn dôk, lăn pla mjing, gĭr lăm lui jih sang hlang mtih kđuh, amâo mâo lui sa čô mnuih kơ tluôn ôh, mghaih msir klei mnuih ƀuôn sang đuĕ hriê tui si čiăng, mjing bruă knuă mă, bi mlih bruă mă kơ mnuih djuê ƀiă.

Hưn mdah Hdră čuăl mkă krĭng Lăn Dap Kngư wưng 2021-2030, hnơ̆ng trah dlăng truh thŭn 2050

2- Hruê 23/6/2024, ti ƀuôn prŏng Đà Lạt, čar Lâm Đồng, K’iăng Khua Knŭk kna trần Lưu Quang gĭt gai Klei bi kƀĭn Êpul gơ̆ng gĭt gai krĭng Lăn Dap Kngư tal 3 leh anăn hưn mdah hdră čuăl mkă krĭng Lăn Dap Kngư wưng 2021-2030, hnơ̆ng trah dlăng truh thŭn 2050.

 Hlăm klei bi kƀĭn, khua gĭt gai 5 čar Lăn Dap Kngư hưn mdah boh klei hlue ngă Hdră mtrŭn 23-NQ/TW kơ klei mđĭ kyar bruă duh mkra ala ƀuôn leh anăn rơ̆ng êđăp ênang lĭng kahan, klei êđăp ênang krĭng lăn Dap Kngư truh thŭn 2030, hnơ̆ng trah dlăng truh thŭñ 2045. Klei blŭ lač, leh êbeh 1 thŭn hlue ngă Hdră mtrŭn, klei thâo săng mơ̆ng dŭm gưl, dhar bruă, boh nik alŭ wăl hlăm krĭng ƀrư̆ dưi mđĭ, lu anôk kpăk hŏng klei mđĭ kyar dưi msir mgaih, klei găl, klei mâo mơ̆ng krĭng leh anăn grăp alŭ wăl hlăm krĭng dưi mđĭ lar; mâo klei tŭ dưn yuôm bhăn, kluôm ênŭm hlăm lu mta bruă.

 Klah čŭn klei bi kƀĭn, K’iăng Khua Knŭk kna Trần Lưu Quang, mtă kơ krĭng Lăn Dap Kngư mlih mrâo klei mĭn hlăm hdră mđĭ kyar. Mbĭt ană, mđing mđĭ kyar mkŏ êlan klông, mđĭ kyar hiu čhưn ênguê, kah mbha klei iêô jak bi liê, mjing boh kdrŭt, klei găl, klei đăo knang kơ mnuih ƀuôn sang, anôk bruă duh mkra.

Klei duh mkra ala ƀuôn dŭm čar Ti lăn dap kngư mâo leh dŭm boh tŭ dưn jăk hlăm thŭn 2024

3- Thŭn 2024, dŭm boh čar ti alŭ wăl lăn dap kngư mâo leh dŭm boh tŭ dưn jăk, lu ênoh čuăn dưi mâo djăp, jing leh gru mngač kơ klei đĭ kyar hlăm alŭ wăl, dŭm bruă dhar kreh, bruă yang ƀuôn bruă răng mgang klei êđăp ênang mâo păn kjăp. Djă akŏ jing čar Kon Tum, klei đĭ kyar GRDP hlăm brô 8,2% mkă hŏng wưng anei thŭn dih, jing dopok krah wah hlăm klei đĭ kyar kluôm ala. Ênoh mnơ̆ng dhơ̆ng mâo  hlăm čar êbeh 38.000 êklai prăk, klei bimni amblei hŏng ala tač êngao êbeh 406 êklăk USD, đĭ êbeh 13% mkă hŏng thŭn dih. Leh kơ anăn jing čar Daknông, mâo 7/11 êpul ênoh čuăn dưi bi leh, lehanăn kdlưn hĭn hŏng ênoh kčah. Boh nik, ênoh mâo ba wĭt hlăm grăp čô mnuih jing êbeh 81 êklăk prăk. Anei jing gưl đĭ kyar prŏng êdi, đru leh kơ Daknông kpưn mâo dôk tal 43 hlăm ênoh 63 boh čar ƀuôn prŏng kluôm ala.

Thŭn 2024, klei kdưn hĭn êdi hlăm čar Gia Lai anăn jing ênoh gŏ êsei ƀun hrŏ êbeh 6% kdlưn hĭn hŏng hdră kčah mtrŭn. Mâo ba wĭt kơ knŭk kna hlăm brô  5.890 êklai prăk, êgao ênoh kčah mơ̆ng gưl dlông lehanăn mơ̆ng Êpul bruă bruă ƀuôn sang čar jao, đĭ giăm 5,1% mkă hŏng thŭn dih. Êjai anăn, čar Daklak mâo leh   12/16 ênoh čuăn mâo djăp lehanăn kdlưn hĭn hdră kčah. Hlăm anăn, mâo ba wĭt kơ knŭk kna truh 8.500 êklai prăk, GRDP kah knar grăp čô mnuih mâo hlăm brô 72,8 êklăk prăk, ênoh bi mni amblei hŏng ala tač êngao jing 1 êklai 650 êklăk USD.

Ksiêm wĭt bruă hlue ngă hdră mtrŭn mrô 18-NQ/TW mơ̆ng êpul khua kiă kriê bruă Đảng gưl dlông 12, dŭm čar hlăm lăn dap kngư gĭr kĭr hŏng hdră êlan mlih mrâo, dăp wĭt êpul khua kiă kriê hlăm bruă kđi čar, hŏng kleki khuăt kjăp, mă bruă mâo klei tŭ jing./.

Phŭn bruă kahan ksiêm rŭ mdơ̆ng mđup brei 1.200 boh sang kơ gŏ êsei ƀun ti Dak Lak

4. Thŭn 2024, Phŭn bruă kahan ksiêm pŏk ngă hdră bruă mkŏ mjing 1.200 boh sang kơ dŭm gŏ êsei ƀun, dleh dlan, mnuih djuê ƀiă leh anăn gŏ sang knŭk kna dlăng ba ti čar Dak Lak. Hŏng ai tiê đua klam hŏng klei gĭr mơ̆ng kahan ksiêm Dak Lak leh anăn bruă sang čư̆ êa alŭ wăl, 1.200 boh sang dưi bi leh hlăm knhal jih mlan 7/2024, êbeh hnơ̆ng kčah hlăm 3 mlan.

Đại tướng Lương Tam Quang - Khua Phŭn bruă kahan ksiêm bi mklă, 1.200 boh sang kơ gŏ êsei dleh dlan ti Dak Lak dưi mkŏ mjing êbeh hnơ̆ng kčah brei ƀuh ai tiê mjêč, đua klam mơ̆ng êpul kahan ksiêm, dŭm gưl bruă ti alŭ wăl, klei hrăm mbĭt mơ̆ng lu anôk bruă duh mkra hlăm klei hlue ngă bruă klam đru kơ ala ƀuôn. Hlue si Khua phŭn bruă Lương Tam Quang, Phŭn bruă kahan ksiêm srăng lŏ dơ̆ng ba anăp hlăm hdră “Kluôm ala hrăm mbĭt lăm lui sang dôk êjai, sang tĭ hlăm kluôm ala”, čiăng amâo mâo ôh hlei pô dôk lui ti tluôn, đru mguôp klă sĭt hlăm hdră kñăm lăm lui 153 êbâo sang tĭ hlăm kluôm ala, boh nik hlăm dŭm alŭ wăl krĭng taih kbưi, ti dŭm alŭ wăl êdu phŭn klei êđăp ênang, hlăm anăn mâo krĭng Lăn Dap Kngư.

Daklak mkŏ mjing klei bi hdơr 120 thŭn hrue mkŏ mjing čar

5- Hrue 22/11/2024, ti Wăl tač hrue 10/3, ɃP. Ƀuôn Ama Thuôt mkŏ mjing leh knăm bi hdơr 120 thŭn hrue mkŏ mjing čar Daklak.

Găn hlăm 120 thŭn mkŏ mjing lehanăn đĭ kyar, truh ară anei, čar Daklak jing leh sa boh čar đĭ kyar hlăm alŭ wăl kwar krah - Lăn dap kngư; klei duh mkra mâo klei đĭ kyar kjăp, hŏng ênoh mâo ba wĭt jing kdlưn hĭng hlăm alŭ wăl lăn dap kngư.

Nao lehanăn blŭ hrăm ti anôk bi kƀĭn anei, k’iăng khua knŭk kna Nguyễn Hòa Bình hơêč hmưi lehanăn bi mni kơ dŭm klei gĭr, dŭm boh tŭ dưn bruă Đảng, bruă sang čư̆ êa, lĭng kahan lehanăn mnuih ƀuôn sang čar Daklak mâo leh.

Čiăng mâo klei đĭ kyar kjăp, bi năng hŏng klei jing, lehanăn mta phŭn pioh mtrŭt mđĭ hlăm krĭng lăn dap kngư, boh nik dŭm mta čuăn mâo bi êdah leh hlăm hdră mtrŭn klei bi kƀĭn prŏng Đảng dŭm gưl, klei klah čŭn mrô 67 lehanăn hdră mtrŭn mrô 23 mơ̆ng phŭn bruă kđi čar, hdră mtrŭn mrô 72 mơ̆ng bruă kƀĭn ala, lehanăn hdră mtrŭn mrô 1747 mơ̆ng khua knŭk kna bi mklă klei čuăl mkă čar Daklak, ktưn bi leh mta kñăm truh thŭn 2050 Daklak “jing čar mâo anôk hdĭp mda doh siam, jiă knhuah gru dhar kreh, mkŏ klei thâo mĭn, jing leh anôk năng hdĭp bŏ hŏng klei khăp”.

Knăm bi hdỏ 20 thŭn Hruê lŏ mkŏ mjing čả Dak Nồn leh anăn mă Mêdai klei êngiê mrô sa

6- Hruê 23/3/2024, čar Dak Nông bi hdơr 20 thŭn hruê lŏ mkŏ mjing leh anăn tŭ mă Međai klei êngiê mrô Sa.

Leh 20 thŭn mkŏ mjing leh anăn mđĭ kyar, Dak Nông mâo lu klei tŭ dưn yuôm bhăn leh anăn kluôm ênŭm, tlaih mơ̆ng čar ƀun. Hnơ̆ng đĭ kyar bruă duh mkra mâo lu, hnơ̆ng ênoh mnơ̆ng dhơ̆ng lu hĭn 12 blư̆, ênoh bi liê mđĭ kyar kluôm ala ƀuôn mâo lu hĭn 20 blư̆ hruê mphŭn mkŏ mjing. Kƀĭnb mkra mlih wăl bi liê mnia blei, hdră bi liê kơ anôk bruă nah gŭ, ruah djŏ dŭm phŭn đĭ kyar, Dak Nông ngă leh anăn dôk jing anôk truh iêô jak lu phung duh bi liê hlăm leh anăn êngao ala čar. Krĭng ƀuôn prŏng, ƀuôn sang bi mlih jăk, mdrŏng sah, bŏ hŏng ai ktang mrâo hŏng klei čang hmăng gĭr ktưn, ƀuăn jing boh kdrŭt mđĭ kyar mrâo mơ̆ng krĭng Lăn Dap Kngư leh anăn kluôm ala. Truh thŭn 2030, Dak Nông gĭr jing čar đĭ kyar ti Lăn Dap Kngư, jing anôk bruă tuh tia mkra mjing bôxit -alumin- ksuêh ala čar, mđĭ kyar bruă lŏ hma yua kdrăp mrâo mrang, bi hgŭm hlue si hdră mguôp hŏng anôk ba čhĭ.

Festival mnga Đà Lạt tal 10, hŏng akŏ “Mnga Đà Lạt - klei muiñ siam mơ̆ng lu mta êa mil”.

7- Mơ̆ng hrue 5 - 31/12/2024 mkŏ mjing Festival mnga Đà Lạt tal 10, hŏng akŏ “Mnga Đà Lạt - Klei muiñ siam mơ̆ng lu êa mil”.

Đà lạt jing ƀuôn prŏng Festival mnga mơ̆ng Việt Nam, jing klei bi knăl kơ ƀuôn sang čư̆ čhiăng jăk mơak, ƀuôn prŏng kơ klei thâo mĭn hlăm klei kdŏ muiñ mơ̆ng UNESCO lehanăn ƀuôn prŏng dôk hlăm “Êpul 5 ƀuôn prŏng Festival hing ang êdi ti Asi”. Festival mnga Đà Lạt lŏ dơ̆ng mpŭ mni kơ dŭm klei tŭ dưn kơ mnga, lehanăn bruă pla mnga; mjing klei găl čiăng kơ bruă mnga Đà Lạt mâo bi mguôp, lar ƀar, mđĭ kyar bruă hiu čhưn ênguê, bruă dhar kreh lehanăn ñŭ kma hŏng tač êngao.

Blŭ hrăm ti anôk pôk knăm mơak, k’iăng khua knŭk kna Nguyễn Hòa Bình bi myuômklei gĭr lehanăn dŭm boh tŭ dưn mơ̆ng bruă Đảng, bruă sang čư̆ êa lehanăn mnuih ƀuôn sang dŭm djuê ana ti čar Lâm Đồng, ƀuôn prŏng Đà Lạt mâoleh hlăm thŭn êgao. Lehanăn mtă, hlăm dŭm hrue tinăp, čar lŏ dơ̆ng hlăm bruă răng mgang wăl hdĭp mda, mđing kơ bruă mkra mjing, hrŏng ruah, blei mnơ̆ng mơ̆ng ala tač êngao dŭm mta mjeh mnga yuiôm, djŏ hŏng klei čiăng bi mnia mblei, čiăng mđĭ klei bi ktưn, pla mjing mnga hŏng klei kjăp, mtrŭt jih jang bruă bi hgŭm plah wah phung duh mkra hŏng mnuih pla mjing, răng mgang lehanăn mđĭ kyar anăn knăl čiăng dưi ñŭ kma hŏng klei bi mnia mblei hŏng ala tač êngao./.

Knăm mơak Durian Krông Pač tal II hŏng akŏ “Durian Krông Pač: Mđĭ kyar leh anăn ñŭ kma” tŭ jing jăk siam

8-  Knăm mơak Durian Krông Pač tal II thŭn 2024 mâo akŏ “Durian Krông Pač : mđĭ kyar leh anăn ñŭ kma” mkŏ mjing mơ̆ng hruê 31/8 truh 2/9/2024, hŏng 12 hdră bruă klă sĭt ba lu klei jăk snăk kơ mnuih ƀuôn sang.

 Knăm mơak drông hlăm brô 200 êbâo gưl mnuih ƀuôn sang, tuê hiu čhưn hlăm, êngao čar leh anăn ala tač êngao nao hlăm knăm mơak leh anăn mâo klei jăk siam. Knăm mơak iêô jak êbeh 350 knưng mnơ̆ng mơ̆ng dŭm anôk bruă duh mkra, êpul hgŭm bruă, anôk bruă mkra mjing - mnia blei dŭm mta mnơ̆ng dhơ̆ng Durian, mnơ̆ng dhơ̆ng OCOP leh anăn mnơ̆ng lŏ hma jăk, mnơ̆ng đru kơ bruă lŏ hma… hlăm leh anăn êngao čar, đru hưn mdah, hưn mthâo mnơ̆ng dhơ̆ng lu jơr, dŭm  mta ana boh kroh jăk ti alŭ wăl.

 Hlăm klei bi trông mkŏ mjing leh anăn mđĭ kyar durian hơĭt kjăp mkŏ mjing leh tŭ jing klei bi lông blei 3 boh durian yuôm hĭn, hŏng ênoh prăk êbehg 2,8 êklai prăk. Jih jang ênoh prăk anei yua kơ bruă đru ala ƀuôn, hriăm mjuăt, đru kơ mnuih ƀuôn sang pla durian kdriêk Krông pač kơ hdră mnêč pla mjing, kriê dlăng Durian kñăm mđĭ hnơ̆ng jăk, ênoh yuôm bruă knuă, ngă djŏ klei čiăng ba čhĭ kơ ala tač êngao.

Lu knăm mơak jiă knhuah gru dhar kreh djăp djuê ana ti lăn dap kngư

9- Hrue kăm dhar kreh - bruă hiu čhưn ênguê tal 5, lehanăn klei bi lông tông čing čhar, kdŏ čhuang dŭm djuê ana čar Kon Tum gưl tal II hŏng akŏ “Dlăng dhar kreh- čuă lăn mnga êa siam” mkŏ mjing mơ̆ng hruê 11 - 14/12/2024.

Hrue kăm dhar kreh-bruă hiu čhưn ênguê tal V lehanăn klei bi lông tông čing čhar, kdŏ čhuang dŭm djuê ana čar Kon Tum gưl tal II, thŭn 2024 mâo êbeh 1.000 čô phung mbruă mơ̆ng 10 kdriêk, ƀuôn prŏng mơ̆ng čar Kon Tum, phung hđeh hriăm hră mơ̆ng Lào, Campuchia lehanăn phung mbruă mơ̆ng čar An Giang nao hgŭm. Tinei, mâo mkŏ mjing leh lu bruă ngă mjing anôk bi tuôm, bi mguôp dhar kreh plah wah phung mbruă, mpŭ mni hưn mdah kơ dhar kreh - anak mnuih Kon Tum…

Hrue kăm mnga phĭ - Čư̆ pui Čư̆ Dăng Ya thŭn 2024 mâo knơ̆ng bruă sang čư̆ êa čar Gia Lai mkŏ mjing mơ̆ng hrue 6 - 12/11/2024, hŏng lu bruă dhar kreh, kdŏ mmuiñ mjuăt asei mlei hŏng klei jăk: Hdră kdŏ muiñ "Êlhiang kdŏ mơ̆ng mnga phĭ - Čư̆ Đang Ya thŭn 2024"; mdah klei tông čing čhar, kdŏ ênhiang djuê ana, mdah klei hrĭ mñam, bruă pơ̆k mñam, bruă krah rup, mkra mjing kdrăp pĕ tông , rang mdah dŭmmnơ̆ng mơ̆ng dhar kreh dŭm djuê ana, lŏ bi hmô dŭm knăm mơak, huă êsei mrâo mơ̆ng mnuih djuê ana Ba Na; klei bi lông đĭ Čư̆ Đang Ya hŏng hdră bi lông êran đĭ čư̆, phưi kpŭng mđung hŏng êwa, bi lông Half Marathon 2024 “Bi êrâo krĭng ƀuôn sang Chư Păh - êlan mkŏ čư̆ hŏng mnga”.

Hrue 26/12, ti ƀuôn prŏng Gia Nghĩa, Knơ̆ng bruă sang čư̆ êa čar Daknông mkŏ mjing leh knăm tŭ mă anăn knăm kơ kdrăn ƀăng k’ưp čư̆ pui tar rŏng lăn   UNESCO Daknông gưl tal 2. Mâo anăn pia "Krĭng lăn kơ klei kưt muiñ” Kdrăn ƀăng k’ưp kơ tar rŏng lăn UNESCO Đắk Nông bi mklă leh k’hưm pô hlăm dŭm knhuah gru dhar kreh kơ tar ŏng lăn, đru mđĭ klei tŭ dưn, dhar kreh anôk ala lăn mnga êa mơak mơ̆ng krĭng lăn dap kngư./.

 Kdrăp kơak brưa mđĭ kyar mnia blei ti dŭm alŭ wăl hlăm krĭng Lăn Dap Kngư

10 -  Thŭn 2024, ti dŭm alŭ wăl hlăm krĭng Lăn Dap Kngư mkŏ mjing lu bruă mtrŭt mjhar mnia blei.

 Mơ̆ng hruê 6-12/9/2024,  Knơ̆ng bruă mtrŭt mjhar mnia blei - Phŭn bruă tuh tia mkra mnlei bi hgŭm hŏng Knơ̆ng bruă tuh tia mnia blei čar Kon Tum mkŏ mjing Knăm mơak tuh tia mkra mjing krĭng Lăn Dap Kngư ti ƀuôn prŏng Kon Tum, iêô jak 250 knưng mnơ̆ng mơ̆ng êbeh 110 anôk bruă duh mkra hlăm ala čar leh anăn ala tač êngao hgŭm mdah mnơ̆ng dhơ̆ng krĭng ƀuôn sang êdah êdi, mnơ̆ng dhơ̆ng OCOP, mnơ̆ng jăk mơ̆ng dŭm krĭng, kwar.

Hruê 23/8/2024 ti Lâm Đồng mkŏ mjing Klei bi kƀĭn mkŏ bruă mnia blei leh anăn bi liê plah wah anôk bruă duh mkra Lâm Đồng leh anăn ƀuôn prŏng Hồ Chí Minh. Phung bi ala bi trông klei hâo hưn, duah anôk ba čhĭ leh anăn ƀĭng hgŭm mkŏ mnia blei - bi liê. Mâo leh 12 anôk bruă duh  mkra, êpul hgŭm bruă čar Lâm Đồng bi siñê bi hgŭm hŏng dŭm anôk bruă bi ƀuôn prŏng Hồ Chí Minh.

Mơ̆ng hruê 23 -24/9/2024 ti ƀuôn prŏng Ƀuôn Ama Thuôt, knăm mơak mphŭn čô̆ kơ bruă mlih mrâo mbruă čar Dak Lak thŭn 2024, hŏng lu bruă ngă msĕ si: rang mdah hưn mthâo hdră bruă, mnơ̆ng dhơ̆ng mphŭn čô̆ kơ bruă, mnơ̆ng dhơ̆ng OCOP, mnơ̆ng dhơ̆ng hiu čhưn ênguê, Klei bi trông mđĭ bruă mnia blei Dak Lak mphŭn čô̆ kơ bruă, mlih mrâo mbruă leh anăn đĭ kyar hơĭt kjăp.