Việt Nam mkŏ mjing tŭ jing Klei bi lông mjuăt ktang asei mlei Ngŏ Asi tal 31 (SEA Games 31) 

Hŏng klei blŭ pia “Kyua sa krĭng Ngŏ Dhŭng kjăp ktang hĭn”, Việt Nam dưi mkŏ mjing tŭ jing Klei bi lông mjuăt ktang asei mlei Ngŏ Asi tal 31 (SEA Games 31) mơ̆ng hruê 12-23/5/2022. Leh 14 hruê bi lông ti Hà Nội leh anăn 11 čar, ƀuôn prŏng riêng gah, Êpul bi lông mjuăt asei mlei Việt Nam dưi mâo mă 205 mêđai êa mah, 125 mêđai êa prăk leh anăn 116 mêđai êa kông. Hluê si klei tĭng mkă, 17 mta klei bi lông Olympic dưi đru kơ êpul bi lông mjuăt asei mlei mơ̆ng Việt Nam mâo mă 119 mêđai êa mah ti SEA Games 31, mâo 51% hlăm boh tŭ kluôm êpul nao bi lông. Boh nik, Êpul čưng boh êkei Việt Nam leh anăn êpul čưng boh mniê Việt Nam dưi răng mgang mêđai êa mah mâo mă hlăm klei bi lông mơ̆ng thŭn 2019. Hlăm SEA Games 31, mâo klei hơ̆k, mâo klei ênguôt, ƀiădah hŏng ai tiê mjuăt ktang asei mlei, ai tiê bi mguôp mơ̆ng êpul êya ASEAN. Sa Việt Nam jăk yâo, khăp kơ tuê mbĭt hŏng klei mđĭ ai mơ̆ng phung ktuê dlăng hlăm djăp mta bi lông, wăt kơ mâo pô bi lông mơ̆ng ala čar amâodah hơăi. Klei klă nik hlăm bruă mkŏ mjing dưi brei ƀuh sa Việt Nam găn hgao klei ruă tưp, dôk krŭ wĭt leh anăn đĭ kyar.

Mbĭt hŏng anăn, Việt Nam ăt dưi mâo lu klei tŭ jing hlăm bruă iêo jak phung tuê hiu čhưn ênguê leh anăn hưn mdah ruh, dhar kreh, ala čar, anak mnuih Việt Nam hŏng phung mah jiăng hlăm leh anăn êngao ala čar.

Êpul čưng boh mniê Việt Nam tŭ kdlưn nao mŭt tuôr bi lông knhal tuič World Cup čưng boh mniê thŭn 2023 gưl tal êlâo hlăm hƀuê ênuk

Êpul čưng boh mniê Việt Nam tŭ kdlưn nao mŭt tuôr bi lông knhal tuič World Cup čưng boh mniê thŭn 2023 gưl tal êlâo hlăm hƀuê ênuk leh klei tŭ dưi 2-1 hŏng Đài Bắc Trung Hoa ti tuôr bi lông bi mklă. Boh tŭ mơ̆ng Êpul čưng boh mniê Việt Nam hĭn mơh năng mđing hlăk êpul hmăi lu mơ̆ng klei ruă Covid 19.

32 êpul mŭt hlăm tuôr bi lông World Cup 2023 (mâo 29 êpul dưi mŭt klă anăp lehanăn 3 êpul bi lông mơ̆ng tuôr play-off) dưi mkra jing 4 êpul, grăp êpul mâo 8 êpul bi lông. Boh tŭ anei atăt leh êpul Việt Nam mŭt hlăm êpul E bi lông hŏng êpul čưng boh ala čar Mi (êpul dôk mrô 1 gưl êlâo) lehanăn êpul čưng boh Hà Lan (êpul dôk mrô 2 gưl êlâo). Bi êpul bi tuôm êdei kơnăn jing êpul dôk hlăm êpul A tuôr play-off, năng ai Bồ Đào Nha - Thái Lan amâo dah Cameroon. Êpul bi lông lehanăn nai mjuăt bi hriăm Mai Đức Chung jing 1 hlăm 6 êpul bi ala mơ̆ng krĭng Asi mbĭt hŏng China, Japon, Dhŭng Korea, Philippines lehanăn Australia. Leh găn thŭn 2022 bi lông tŭ jing hŏng Medai êa mah ti Klei bi lông SEA Games 31. Anei jing gưl tal 3 đrông, êpul čưng boh mniê mơ̆ng Việt Nam mâo mă klei pah mni kdlưn hĭn ti Klei bi lông SEA Games. Boh tŭ anei đru kơ êpul čưng boh mniê Việt nam dôk mrô sa ti Klei bi lông SEA Games hŏng 7 medai êa mah, kdlưn hĭn mkă hŏng êpul dôk mrô 2 jing Thái Lan mâo 5 medai êa mah./.

Anei jing klei bi lông mơ̆ng êpul bi lông čưng boh Việt Nam mdưm mta kñăm kdlưn hĭn hlăm AFF cup thŭn 2022 êlâo kơ bi kltah hŏng Pô bi hriăm Park Hang Seo

Hlăm AFF cup thŭn 2022, Êpul bi lông mơ̆ng Việt Nam dôk hlăm ƀảng B mbĭt hŏng dŭm êpul bi lông Malaysia, Singapore, Myanmar leh anăn Lào. Klei bi lông AFF Cup thŭn 2022 mkŏ mjing hŏng hdră wĭl 5 êpul, hlăm anăn grăp êpul srăng bi lông 2 klei bi lông čưng boh hlăm tač bi lông pô leh anăn 2 klei bi lông čưng boh hlăm tač bi lông găp, čiăng hrŏng mă 2 êpul kdlưn hĭn nao bi lông bán kết. Êpul čưng boh Việt Nam srăng čưng 2 gưl ti tač bi lông găp bi tuôm hŏng Lào leh anăn Singapore, êjai čưng ti tač bi lông pô bi tuôm hŏng Malaysia leh anăn Myanmar. Anei jing klei bi lông mơ̆ng êpul bi lông čưng boh Việt Nam mdưm mta kñăm kdlưn hĭn hlăm AFF cup 2022 êlâo kơ bi kltah hŏng Pô bi hriăm Park Hang Seo

5 thŭn ti gŭ klei mtô mjuăt mơ̆ng nai Park Hang Seo, Êpul čưng boh Việt Nam dưi rơ̆ng klei kdlưn hĭn ti alŭ wăl Ngŏ Dhŭng Asi, mbĭt anăn ăt jing ala čar Krĭng Ngŏ Dhŭng Asi dưi dôk sui hĭn hlăm top 100 mơ̆ng FIFA. Pô bi hriăm Park Hang Seo hrăm mbĭt leh hŏng êpul čưng boh Việt Nam dưi mâo lu boh tŭ dưn hƀuê ênuk leh anăn dưi yap yuôm bhăn hlăm anôk bi lông čưng boh Asi 5 thŭn êgao, anăn jing U23 Việt Nam dôk tal 2 hlăm klei bi lông VCK U23 Asi thŭn 2018, dôk tal 4 hlăm ASIAD 2018, 2 blư̆ dơ̆ng mâo mă mêđai êa mah klei čưng boh êkei hlăm SEA Games 30 leh anăn 31. Êpul čưng boh Việt Nam mâo klei klei pah mni kdlưn hĭn hlăm AFF Cup 2018, mŭt hlăm klei bi lông tứ kết ASIAN Cup 2019 leh anăn mŭt hlăm klei bi lông hrŏng knhal tuč FIFA World Cup 2022 alŭ wăl Asi.

U23 Việt Nam mâo mă Medai êa mah SEA Games 31 lehanăn mŭt hlăm tuôr bi lông 4 ala čar mơ̆ng Klei bi lông čưng boh U23 krĭng Asi 2022.

Ti SEA Games 31, U23 Việt Nam mâo mă klei pah mni Medai êa mah ti klei bi lông čưng boh êkei. Anei jing gưl tal dua, êpul čưng boh êkei lehanăn pô mjuăt bi hriăm Park Hang Seo mâo mă boh tŭ kdlưn hĭn anei. Čiăng răng mgang tŭ dưi boh tŭ anei, êpul čưng boh U 23 Việt Nam mâo leh klei tŭ dưi hŏng êpul Indonesia 3-0, bi knar hŏng Philippines 0-0, tŭ dưi mkă hŏng Myanmar 1-0, hgao Timor Leste 2-0 ti dŭm tuôr bi lông. Leh kơnăn, pô mjuăt bi hriăm Park Hang Seo lehanăn êpul mâo leh klei tŭ dưi anăp Malaysia lehanăn Thái Lan 1-0 ti dŭm tuôr bi lông knhal tuič. Anei jịng knăm SEA Games knhal tuič, pô mjŭt bi hriăm Park Hang Seo atăt gai U23 Việt Nam nao bi lông.

Ti klei bi lông tuôr knhal tuič U23 krĭng 2022 mkŏ mjing ti Uzbekistan mơ̆ng hruê 1-19/6/2022, U23 Việt Nam dôk mbĭt êpul hŏng Dhŭng Korea, Thái Lan lehanăn Malaysia. Hŏng klei atăt gai mơ̆ng pô mjuăt bi hriăm mnuih Dhŭng Korea Gong Oh-Kyun, U23 Việt Nam mâo mă leh klei tŭ dưi mơ̆ng dŭm tuôr, êlâo kơ mjưh klei bi lông anăp êpul Saudi Arabia 0-2. Saudi Arabia ăt jing êpul mâo mă boh tŭ mrô 1 ti klei bi lông anei hlăk mâo klei tŭ dưi anăp êpul U23 Uzbekistan 2-0 hlăm tuôr bi lông knhal tuič./.

Vũ Phương Thanh kdlưn hĭn tar rŏng lăn klei bi lông tlâo mta bi mguôp suiah hĭn dlông rŏng lăn

Hruê 29/8, Hlăm hla pŏk tal 1 mơ̆ng SwissUltra 2022 mđung klei hơêč hmưi kơ pô bi lông Việt Nam hŏng klei Angle: “Anei jing rup pô bi lông kdlưn hĭn tar rŏng lăn: Hơêč hmưi kơ Thanh Vũ”. SwissUltra jing klei bi lông 3 mta bi mguôp suaih hĭn dlông rŏng lăn. Phung bi lông srăng bi leh 38km luê êa, 1.800km wai êdeh leh anăn êran 422km. Leh 14 hruê bi lông Vũ Phương Thanha dưi bi leh klei bi lông pô hlăm SwissUltra 2022 hŏng 328 mmông 27 mnĭt 55 secon čiăng dưi jing pô wĭt tal êlâo phung bi lông mniê. Vũ Phương Thanh, k’kiêng thŭn 1990, dưi pia jing “Mniê êra êran jŭm dar rŏng lăn” amâodah “Mnga hrah kdrăn čuah”. Thŭn 2016, ñu jing mnuih Asi tal êlâo dưi êran găn 4 kdrăn čuah hlơr hĭn dlông rŏng lăn hŏng boh taih 1000 km, mâo kdrăn čuah Atacama (ti Chile), Gobi (ti China), Sahara (ti Êjip), Antarctica (ti Knhal Dhŭng boh lăn).

Klei bi lông mjuăt ktang asei klei kluôm ala thŭn 2022 mkŏ mjing tŭ jing

Klei bi lông mjuăt ktang asei mlei kluôm ala thŭn 2022 mkŏ mjing mơ̆ng hruê 9-21/12 ti Quảng Ninh hŏng 10 čar, ƀuôn prŏng riêng gah. Klei bi kƀĭn mâo êbeh 17 êbâo čô hgŭm, hlăm anăn mâo êbeh 10 êbâo čô bi lông bi ala kơ 63 čar, ƀuôn prŏng leh anăn êpul lĭng kahan, bi lông ti 43 êpul bi lông 942 boh phŭn, leh anăn klei bi lông mâo hnơ̆ng prŏng hĭn hlăm hƀuê ênuk. Phung bi lông mâo 93 me dai. Mjưh ruê̆ klei bi lông, êpul Hà Nội mâo klei pah mni mrô sa jih êpul hŏng 475 medai, hlăm anăn mâo 175 medai; êpul ƀuôn prŏng Hồ Chí Minh dăp tal dua hŏng 128 medai êa mah, dôk tal tlâo mâo êpul lĭng kahan hŏng 90 medai êa mah. Hlăm klei bi kƀĭn mâo jih jang 53 klei pah mni kdlưn hĭn ala čar leh anăn 96 klei pah mni kdlưn hĭn hlăm klei bi lông.

Leh klei tŭ jing mơ̆ng SEA Games 31, Klei bi lông mjuăt ktang asei mlei kluôm ala jing gưl čiăng ksiêm dlăng kluôm hdră mjuăt ktang asei mlei hlăm kluôm ala. Klei bi kƀĭn ăt jing klei găl tui duah klei thâo mrâo kơ klei mjuăt ktang asei mlei Việt Nam mprăp hlăm dŭm klei bi lông lu ala čar hlăm wưng kơ anăp, êlâo hĭn jing gưl SEA Games 32 dưi mkŏ mjing ti Campuchia hlăm mlan 5/2023.

Klei bi lông gưl knhal tuič čưng boh tar rŏng lăn 2022 (World Cup 2022) mâo mkŏmjing ti sa boh lăn čar Islam krĭng Msăt Boh Lăn lehanăn Lionel Messi mbĭt hŏng Argentina mâo măklei dưi kdlưn hĭn

Klei bi lông gưl knhal tuič čưng boh tar rŏng lăn 2022 (World Cup 2022) mâo mkŏ mjing ti ala čar Qatar mơ̆ng hrue 20/11-18/12/2022 hŏng lu mta mdê hĭn êdi ƀuh tinei: Gưl tal êlâo mâo mkŏ mjing hlăm ala čar hlăm krĭng Islam Msăt Boh Lăn, klei bi lông anei mkŏ mjing hlăm yan puih, amâo mâo msĕ hŏng yan bhang, gưl tal êlâo Morocco – sa êpul čưng boh mơ̆ng Afrĭk mâo mŭt hlăm gưl giăm ruĕ. Klei bi lông gưl knhal tuč msĕ si hlăm klei êpei, dlăng bŏ hŏng klei jăk êdi hlăm klei bi lông gưl World Cup plah wah Prăng hŏng Argentina jing klei bi ala kơ phung kdlưn hĭn êdi. leh lu thŭn dôk hmăng hmưi čang guôn, knhal tuič pô hing ang Lionel Messi mâo mă leh anăn knăl World Cup leh Argentina jing êpul kdlưn hĭn World Cup 2022. Asei Messi mâo thŭn 2022 bi lông hŏng klei tŭ jing hĭn hlămn klei ñu čưng boh mâo truh 18 asăr boh ñu mâo bi mŭt hlăm êpul čưng boh ala čar. Knŏng World Cup 2022, Messi mâo bi mŭt truh 7 asăr. Messi mâo leh jih jang dŭm anăn knăl điêt prŏng djăp mta mơ̆ng sa čô pô čưng boh knhăk./.

Olympic yan puih thŭn 2022 dưi mkŏ mjing hlue hdră online

Olympic yan puih jing klei mâo prŏng hĭn dlông rŏng lăn mkŏ mjing hlăm thŭn 2022. China jing ala čar mkŏ mjing thŭn anei. Klei anei mphŭn pŏk hlăm hruê 4/2/2022 ti tač mjuăt ktang asei mlei Hruh Čĭm, ƀuôn prŏng Bắc Kinh. Anei jing klei bi lông Olympic yan puih tal êlâo dưi mkŏ mjing ti China. Boh nik, Bắc Kinh jing ƀuôn prŏng tal êlâo hlăm hƀuê ênuk dưi mkŏ mjing Olympic yan puih hŏng Olympic yan bhang. Hŏng klei hgŭm mơ̆ng 95 ala čar leh anăn krĭng lăn ala, Olympic yan Puih 2022 mâo ala čar mkŏ mjing hlue hdră online msĕ si Olympic Tokyo 2020 čiăng rơ̆ng êđăp ênang kơ phung bi lông leh anăn klei bi lông dưi mkŏ mjing jăk. Hlăm klei bi lông Olympic anei, êpul mjuăt ktang asei mlei Na Uy mâo mrô 1 hŏng 16 medai êa mah. Klei bi kngăr prŏng hĭn mơ̆ng Olympic yan puih tal anei jing êpul mjuăt ktang asei mlei China hgao leh Mi čiăng dôk mrô 3 knhal tuič hŏng 9 medai êa mah, 4 medai êa prăl leh anăn 2 medai êa kông.

Klei bi lông mjuăt asei mlei ti Asi (ASIAD) tal 19 bi kdung hĕ kyua klei ruă tưp Covid-19

Klei bi lông mjuăt asei mlei Asi (ASIAD) tal 19 jing sa hlăm dŭm klei bi lông mâo mkŏ mjing ti ƀuôn prŏng Hàng Châu, China mơ̆ng hrue 10-25/9 thŭn anei. Siămdah, hrue 6/5, Êpul Gơ̆ng bruă kiă kriê Olympic Asi (OCA) bi mklă bi kdung hĕ kyua klei ruă tưp dleh dưi ksiêm dlăng ti China lehanăn klei bi lông anei kơ anăp ăt srăng mkŏ mjing ti Hàng Châu, China hlăm thŭn êdei. Wưng mkŏ mjing năng ai mơ̆ng hrue 23/9-8/10/2023.

ASIAD thŭn 2023 jing klei bi lông mjuăt ktang asei mlei Asi tal 19 hlăm hƀuê ênuk. Jing klei bi lông prŏng tal 2 dlông rŏng lăn, knŏng kgŭ Olympic yan bhang. Anei jing gưl tal 3 leh China mkŏ mjing ASIAD, êdei kơ klei mkŏ mjing hlăk thŭn 1990 lehanăn 2010.

Roger Federer hưn mdei bruă mjuăt ktang asei mlei, Rafael Nadal mâo klei pah mni êdah êdi hlăm Grand Slam 22.

Msĕ si tuôm hŏng lu klei dleh dlan kyua khua thŭn, Rafael Nadal ăt bi êdah klei dưi hlăm thŭn 2022 hŏng anăn knăl Grand Slam ti Australia leh anăn Prăng. Klei tŭ anei đru ñu mâo 22 anăn knăl Grand Slam hlăm bruă knuă. Anei jing ênoh mrô êdah êdi mơ̆ng pô pah mlâo mnŭ dlông rŏng lăn. Hlăk êjai anăn, krah mlan 9 thŭn anei, pô bi lông hing ang Roger Federer hưn mdei bi lông ti thŭn 41. Pô anei bi lông leh êbeh 1.500 gưl bi lông hlăm thŭn. Federer mjưh ruê̆ êbeh 20 pluh thŭn bi lông hŏng 103 anăn knăl, 310 hruê kăm ti mrô 1 dlông rŏng lăn, hlăm anăn mâo klei êdah êdi 237 hruê kăm.

Pô bi lông kkiêng thŭn 1981 jing mnuih tal êlâo mâo 20 Grand Slam. Ñu mâo 8 klei pah mni Wimbledon, 6 klei pah mni Australian Open, mâo 5 blư̆ đrông klei pagh mni kdlưn hĭn Mi pŏk mlar leh anăn mâo Roland Garros thŭn 2009. Federer ăt mâo 6 anăn knăl ATP World Tour Finals, medai êa prăk bi lông hjăn êkei Olympic 2012 leh anăn medai êa mah dua čô êkei Olympic 2008.

Gưl bi lông klă sĭt knhal tuč mơ̆ng Roger Federer bi lông jing mbĭt hŏng Rafael Nadal hlăm klei bi lông hŏng Jack Sock/Frances Tiafoe hlăm klei bi lông Laver Cup 2022 mkŏ mjing hlăm mlan 9 thŭn anei.