Yap truh krah mlan 2/2025, mâo leh 15 čô knuă druh êpul bruă Đảng čar Kon Tum  kriê dlăng akâo mdei bruă êlâo kơ jih thŭn mă bruă. Hlăm anăn mâo Nguyễn Trung Hải, khua hlăm bruă Đảng čar, Khua êpul bruă hâo hưn bruă Đảng čar Kon Tum. 14 čô adôk jing khua hlăm bruă đảng čar, khua kiă kriê leh anăn k’iăng khua kiă kriê đa đa knơ̆ng, dhar bruă.

Aduôn Ngô Thị Hoàng Anh, k’iăng khua êpul bruă mkŏ mjing bruă Đảng čar Kon Tum brei thâo, phung knuă druh akâo mdei bruă hluê si hdră mtrŭn mrô 18 mơ̆ng Êpul khua bruă Đảng gưl dlông, mkŏ mjing klei găl kơ bruă hluê ngă hdră mtrŭn mơ̆ng gưl dlông mlih mrâo, mkŏ dăp phung mă bruă kđi čar, mbĭt anăn mkŏ mjing klei găl kơ phung knuă druh mda asei mâo klei thâo lŏ dơ̆ng duh myơr.