50 thŭn lŏ dlăng wĭt hdră mblah tŭ dưi Đức Lập, mphŭn pŏk hdră mblah Lăn dap kngư
Thứ ba, 13:01, 04/03/2025
Pô mblang H'Nêč Êñuôl / VOV Tây Nguyên
Pô mblang H'Nêč Êñuôl / VOV Tây Nguyên
VOV4.Êđê- Mđing truh knăm bi hdơr 50 thŭn Hruê mtlaih êngiê kluôm kwar Dhŭng, hluh lir ala čar, tlam 3/3 mbruê, Sang hră ksiêm hriăm bruă kđi čar – Phŭn bruă Lĭng kahan bi hgŭm hŏng Anôk bruă sang čư̆ êa čar Dak Nông mkŏ mjing Klei kƀĭn trông kreh knhâo “Hdră mblah tŭ dưi Đức Lập – êma pluh thŭn lŏ dlăng wĭt” hŏng klei hgŭm mơ̆ng lu phung thơ̆ng kơ bruă, phung kreh knhâo hƀuê ênuk, phung tuôm ƀuh hƀuê ênuk anei.
Hruê 9/3/1975, hŏng klei gĭt gai mơ̆ng Đảng, phŭn jing bruă Đảng kahan gưl dlông, Phŭn bruă Lĭng kahan, Knơ̆ng gĭt gai Hdră mblah Lăn dap kngư; lĭng kahan lehanăn mnuih ƀuôn sang drei bi hgŭm, ksŭng mblang, mtlaih êngiê leh Đức Lập. Hluê si phung bi ala nao ti knăm anei, 50 thŭn êgao leh, ƀiădah hdră mblah Đức Lập truh kơ ară anei ăt dôk hrông boh tŭ yuôm hƀuê ênuk, lui lu klei hriăm yuôm bhăn hlăm hdră răng mgang Ala čar.
Mbĭt anăn, hdră mblah tŭ dưi Đức Lập lŏ jing klei ktưn hưn, boh kdrŭt yuôm bhăn čiăng kơ bruă Đảng, bruă sang čư̆ êa lehanăn mnuih ƀuôn sang hlăm čar Dak Nông hgŭm mguôp, sa ai, gĭr hgao jih klei dleh dlan, lông dlăng, mkŏ mkra alŭ wăl ƀrư̆ hruê ƀrư̆ đĭ kyar, sah mdrŏng./.
Viết bình luận