Yan mnga thŭn 1930, Đảng Cộng sản Việt Nam mphŭn mâo, kruăk knăl yuôm bhăn hlăm hƀuê ênuk krŭ kdơ̆ng Việt Nam. Hlăm klei bi kƀĭn mkŏ mjing Đảng mơ̆ng hruê 6-1 truh 7-2-1930), Đảng Cộng sản Việt Nam bi mklă êlan mđĭ kyar mơ̆ng bruă krŭ kdơ̆ng Việt Nam jing: “ngă klei dưi krŭ kdơ̆ng leh anăn phŭn kơ bruă krŭ kdơ̆ng čiăng truh kơ ala ƀuôn cộng sản", hlue ngă hdră kñăm: “Klei êngiê djuê ana leh anăn yang ƀuôn ngă phŭn”. Hŏng êlan krŭ kdơ̆ng djŏ klă, kreh knhâo leh anăn mbruă, mơ̆ng leh mphŭn mâo truh ară anei, Đảng Cộng sản Việt Nam kjăp nanao hdră kñăm êngiê kơ djuê ana leh anăn yang ƀuôn ngă phŭn, gĭt gai mnuih ƀuôn sang Việt Nam mjing klei tŭ dưi kdrưh kơăm prŏng prĭn, hlue ngă hdră kñăm mkŏ mjing lăn čar Việt Nam mdrŏng sah, lăn čar ktang, êngiê kơ mnuih ƀuôn sang, mtăp mđơr, jăk siam. K’iăng nai prĭn, nai prŏng Bùi Đình Phong, Sang hră kđi čar ala čar Hồ Chí Minh bi mklă:

"95 thŭn ti gŭ klei Đảng gĭt gai drei mâo boh tŭ prŏng msĕ si ară anei snăn anăn jing mâo 3 klei klă klơ̆ng. Tal sa, brei bi mklă klei gĭt gai djŏ klă mơ̆ng Đảng jing mta mrô sa bi mklă klei tŭ dưi mơ̆ng cách mạng. Klei tal dua ăt bŏ hŏng yuôm bhăn jing drei păn kjăp klei êngiê djuê ana leh anăn yang ƀuôn ngă phŭn. Anei jing sa klei êdah êdi mbruă kơ klei mblang mơ̆ng Awa Hồ truh kơ Đảng leh anăn kyua anăn drei mâo klei tŭ dưi. Klei tal tlâo anăn jing ai ktang mơ̆ng yang ƀuôn jing phŭn agha mơ̆ng klei tŭ dưi cách mạng”.

Dŭm boh tŭ mơ̆ng 95 mkra mđĭ tur knơ̆ng, mjing boh kdrŭt ktang čiăng Đảng lŏ dơ̆ng gĭt gai lăn čar kjăp ktang mŭt hlăm ênuk mrâo- ênuk kpưn đĭ mơ̆ng djuê ana. K’iăng nai prŏng, nai prĭn Nguyễn Viết Thảo, Khua hlăm Êpul gơ̆ng hlak mblang gưl dlông bi mklă:

"Hdră kñăm ênuk kpưn đĭ jing brei mkŏ mjing sa lăn čar Việt Nam yang ƀuôn kjăp ktang, mdrŏng sah, jăk siam, bi knar hŏng dŭm ala čar dlông rŏng lăn msĕ si Awa Hồ lač leh mơ̆ng thŭn 1945, anăn jing mta kñăm. 2 mta kñăm jing klă mngač, truh thŭn 2030 brei jing ala čar dôk đĭ kyar, mâo tur mkra mjing bruă tuh tia mrâo mrang, prăk hrui wĭt kah knar lu, truh thŭn 2045 jing ala čar yang ƀuôn ngă phŭn đĭ kyar, prăk hrui wĭt lu. Kâo mñă klă jing ala čar yang ƀuôn ngă phŭn, mtăp mđơr, mil pô kơ mnuih ƀuôn sang, jăk siam, mdrŏng sah, jăk mơak”.

 Hlăm klei bi trông, Khua Sang hră kđi čar ala čar Hồ Chí Minh Nguyễn Xuân Thắng lač, čiăng hlue ngă tŭ dưi hdră kñăm truh thŭn 2030, hnơ̆ng trah dlăng truh thŭn 204, brei Đảng lŏ dơ̆ng mlih mrâo ktang klei mĭn đĭ kyar, mâo klei êdah êdi hlăm hdră êlan, mđĭ lar ai tiê mbruă, amâo mdei mđĭ ai ktang klei thâo, klei mĭn kđi čar leh anăn hnơ̆ng trah dlăng mbruă hlăm klei kčah hdră êlan:

 “Đảng lŏ dơ̆ng mlih mrâo ktang kơ klei mĭn đĭ kyar, jing brei êdah kdlưn klă sĭt hlăm dŭm hdră êlan, hlăm klei mđĭ lar mbruă amâo mdei, čiăng mđĭ klei thâo, ai ktang, klei thâo gĭt gai leh anăn hnơ̆ng trah dlăng mbruă hlăm klei tă êlan mơ̆ng Đảng. Brei ksiêm dlăng êlam klei mĭn hdră êlan mơ̆ng Đảng jing “Mđĭ kyar lăn čar pral leh anăn kjăp”, hlăm anăn mđĭ kyar bruă duh mkra - ala ƀuôn leh anăn răng mgang wăl hdĭp mda jing phŭn, mkŏ mjing Đảng lŏ dơ̆ng jing kmeh gơ̆ng, knuă druh jing “Phŭn kơ mta phŭn”; mđĭ kyar dhar kreh leh anăn anak mnuih jing tur. Anei jing phŭn kơ mnơ̆ng dhơ̆ng, ai ktang hlăm lam, phŭn leh anăn boh kdrŭt mơ̆ng klei đĭ kyar”.

Blŭ hrăm hlăm klei bi kƀĭn, Khua Anôk bruă hâo hưn mtô mblang gưl dlông Nguyễn Trọng Nghĩa mñă klă klei ktưn hưn kơ knhuah gru 95 thŭn Đảng gĭt gai cách mạng Việt Nam, hŏng bruă klam lŏ dơ̆ng gĭr ktưn mkŏ mjing, ksŭl mbŭ klei tŭ dưn, ênoh yuôm mơ̆ng Đảng. Nguyễn Trọng Nghĩa đăo knang Klei bi trông srăng đru jăk kơ bruă ksiêm hriăm, hâo hưn, mtô mblang kơ knhuah mngač mơ̆ng khua gĭt gai Hồ Chí Minh, phung khua gĭt gai krŭ kdơ̆ng nao êlâo, ênuk đảng viên kjăp, jhŏng ktang…kơ hruê anei leh anăn ênuk êdei. Mđĭ hĭn klei đăo knang mơ̆ng mnuih ƀuôn sang hŏng Đảng, mjing klei sa ai hlăm klei mĭn, ai tiê leh anăn bruă ngă hlăm kluôm Đảng, jing jang ƀuôn sang, lĭng kahan, kyua sa Việt Nam "êđăp ênang, êngiê, mil pô kơ mnuih ƀuôn sang, mdrŏng sah, jăk mơak, kjăp ktang truh kơ yang ƀuôn ngă phŭn”./.