Leh dŭm thŭn ñăt kriêp kyua klei ruă tưp Covid 19, thŭn anei phung ƀuôn sang ti ƀuôn Hŭk B, să Čư̆ M’Gar, kdriêk Čư̆ M’Gar, čar Dak Lak lŏ dơ̆ng mjhĭt m’uăt prăp êmiêt kơ thŭn mrâo hŏng klei čang hmăng kơ sa klei jăk yâo mrâo. Y-Nguk Niê (Aê Suang) - khua ƀuôn, k’iăng khua bruă Đảng ƀuôn Hŭk B, să Čư̆ Mgar, kdriêk Čư̆ Mgar brei thâo:

            “Mnuih Êđê ti ƀuôn hmei kreh prăp êmiêt Tết akŏ thŭn mơ̆ng mlan 11; 12 thŭn êlâo mtam. Mprăp braih điŏ pioh đŭng, knă kpiê čeh. Snăn truh kơ thŭn mrâo snăn ba yua čeh mrâo, hlei mâo mnŭ čuh mnŭ, mâo ŭn čuh ŭn. Phung ƀuôn sang čang hmăng hlăm thŭn mrâo mâo Đảng, knŭk kna mđing lu hĭn kơ phung ƀuôn sang dưi mđĭ kyar klei hdĭp, mâo djăp hbâo pruê kơ mnơ̆ng pla, mâo êlan jăk pioh êrô êbat, mnuôr mbông êa djăp ênŭm čiăng kơ klei hdĭp trei mđao hĭn”.

Aduôn H’Rok Êban (65 thŭn) ti ƀuôn Hŭk B, să Čư̆ Mgar, kdriêk Čư̆ Mgar, čar Dak Lak brei thâo, êlâo adih mnuih Êđê amâo drông Têt msĕ si ayŏng adei mnuih Yuăn. Mnuih Êđê mâo sa knăm m’ak sui hlăm wưng knhal jih thŭn. Mbĭt hŏng dŭm knăm m’ak jăk siam ăt dưi krơ̆ng kjăp hlăm klei hdĭp ênuk anei snăn hruê anei, mnuih Êđê ƀrư̆ ƀrư̆ hluê klei bhiăn drông Têt. Dŭm hruê anei, mnuih ƀuôn sang hlăm ƀuôn mčhĭt m’uăt mprăp drông Têt hŏng klei hơ̆k m’ak:

 “Mprăp kơ Têt, gŏ sang kâo ăt huai mdoh pưk sang, anak čô nao mă bruă kbưi mâo anôk dôk doh siam, mâo mnơ̆ng ƀơ̆ng jăk, mnuih riêng gah ăt hriê h’êč hmưi Têt kơ sang pô. Gŏ sang kâo ăt đŭng ƀêñ điŏ, blei mprăp ƀêñ kan drông tuê hriê čhưn ti sang. Êlâo adih, hruê Têt amâo mčhĭt m’uăt, bi ară anei Têt wĭt hlăm ai êwa h’uh mđao, yâo m’ak, sang sang bŏ hŏng klei m’ak.

Y-Yăm – khua mduôn ƀon Bu Dak, să Thuận An, kdriêk Dăk Mil, Dak Nông brei thâo, mơ̆ng đưm leh mnuih M’Nông huă mnăm hlue yan leh puôt êmiêt. Phung ƀuôn sang ngă hma hang. Leh hrui êmiêt boh mnga, phung ƀuôn sang mkŏ mjing yơh klei huă mnăm, ăt msĕ hŏng tết ênuk ară anei anăn mơh. Ƀiădah tết ară anei lŏ mâo klei knŭk kna đru, lehanăn sang thâo mâo đru sang dôk kƀah, čiăng kơ jih jang mnuih mâo sa yan tết h’uh mđao mơak mñai. Khua mduôn Y - Yăm lač:

“Phŭn dô dih jing klei huă êsei mrâo, grăp boh sang mprăp sơăi kpiê čeh, čĭm kan jih jang mnơ̆ng ƀơ̆ng pô mâo mơ̆ng hma pưk, ya mta mnơ̆ng pô pla mjing ƀơ̆ng dŏ anăn. Ngă yang mdiê, yang hma hơ̆k mơak mâo mdiê, ktơr leh sa thŭn suăi êmăn, jih jang mnuih nao bi huă mnăm leh sang anei truh kơ sang adih hlăm ƀon. Ară anei phung ƀuôn sang amâo lŏ buh pla hma hang ôh, lehanăn tui ƀơ̆ng tết mbĭt hŏng jih jang mnuih Việt Nam. Bruă sang čư̆ êa lŏ đru braih mkuê̆, čim kan ƀêñ kĕo bi mbha ti sang bi kƀĭn ƀuôn. Lehanăn phung ƀuôn sang mprăp mnơ̆ng ƀơ̆ng hlăm dŭm hrue tết, nao bi hơêč hmưi klei suaih pral hdơ̆ng găp, bi trông kơ bruă duh ƀơ̆ng hlăm thŭn mrâo đĭ kyar hĭn”./.

Liêng Hót Ha Brưng jing Khua mđuôn ƀuôn Dă Dâng, să Liên Hà, kdriêk Lâm Hà, čar Lâm Đồng. Thŭn anei êbeh leh 80 thŭn, ƀiădah Khua mduôn Ha Brưng ăt êmăt. Grăp blư̆ Têt truh yan mnga hriê, ñu kreh bi hdơr kơ dŭm klei bhiăn ênuk đưm mơ̆ng mnuih K’ho, hlăm anăn mâo knăm m’ak mdiê mrâo, hluê si ñu lač anei jing Têt đưm mơ̆ng mnuihLăn dap kngư, hlăm anăn mâo mnuih K’ho ti Lâm Đồng. Bi Têt djuê ana Việt Nam, hluê khua mduôn Ha Brưng, m’ak êdi jing mlam kkuh drông mơ̆ng thŭn hđăp truh kơ thŭn mrâo.

“Têt mâo mơ̆ng êlâo leh, kreh mkŏ mjing knăm m’ak mdiê mrâo, leh puôt wiă mdiê ti pưk hma. Leh ba wĭt mdiê pioh hlăm hjiê, grăp čô mnuih bi mƀĭn m’ak mbĭt, kyua mdiê dưi ba wĭt ti sang. Anei jing knăm m’ak yuôm bhăn mơ̆ng grăp čô hlăm ƀuôn sang. Yuôm bhăn hĭn jing hlăm sa thŭn knŏng mkŏ mjing sa blư̆. Bi têt ară anei m’ak êdi. Mơ̆ng tlam mmăt, grăp čô mnuih nao ăm mnu, riă bur dôk ƀơ̆ng mbĭt. Lehanăn, kuč pui drông thŭn mrâo hlŏng truh kơ aguah. Hlăm ƀuôn grăp thŭn msĕ snăn s’aĭ, drông thŭn mrâo srăng krŏng ală truh kơ aguah, mă čuh ŭn, čuh mnŭ m’ak drông thŭn mrâo”.

Mŭt hlăm thŭn mrâo 2023, čiăng drông Têt trei mđao, djăp ênŭm, amâo lui hlei pô dôk ti tluôn, dŭm êpul bruă mbĭt hŏng bruă sang čư̆ êa alŭ wăl dŭm čar krĭng Lăn dap kngư hrăm mbĭt mđing dlăng Têt kơ mnuih ƀun, dưi drông sa yan Têt h’uh mđao, yâo m’ak, êđăp ênang hŏng klei gĭr amâo lui hlei pô dôk ti tluôn lehanăn kƀah êwư hlăm wưng Têt Nguyên đán Quý Mão 2023:

H’Bông jing sa boh să nah ngŏ kdriêk Čư̆ Sê, dôk ktuê êlan dơ̆ng prŏng mrô 25 mơ̆ng km 09 truh km 24, hŏng boh prŏng jing êbeh 15.622 ha. Ti anei mâo  7 boh ƀuôn lu jing mnuih djuê ana Jrai. Anei ăt jing alŭ wăl dôk hlăm ênoh dleh dlan hĭn hlăm kdriêk, hŏng êoh gŏ êsei ƀun jing lu. Hŏng ai tiê, amâo mâo lui ôh sa gŏ êsei kyua dôk hlăm klei dleh dlan amâo mâo tết, bruă sang čư̆ êa alŭ wăl hlăk jih ai tiê mprăp đru, duh mĭưn kơ dŭm gŏ êsei ƀun ăt mơak mơh hlăm yan mnga.  Siu Vông- k’iăng khua knơ̆ưng bruă sang čư̆ êa să Hbông, kdriêk Čư̆ Sê brei thâo:

“Kkuh drông thŭn mrâo 2023, phung khua kiă kriê să ăt mâo dŭm hdră êlan đru ba dŭm gŏ êsei ƀun ti 6 boh ƀuôn dleh dlan drông thŭn bhang mrâo, amâo mâo mnuih lĕ hlăm klei kƀah wư ôh, jih jang hrăm mbĭt mâo ƀơ̆ng tết mơak mñai mbĭt hŏng gŏ êsei mkăn. Hmei mtrŭt mjhar phung ƀuôn sang bi đru braih mkuê̆, êa msĭn, ƀung hdang krô čiăng kơ dŭm gŏ êsei dleh dlan dưi mâo klei găl drông thŭn mbhang mrâo mơak mñai hŏng jih jang mnuih”.

Hŏng klei gĭr amâo lui hlei gŏ sang kƀah êwư hlăm wưng Têt Nguyên đán Quý Mão 2023, dŭm gưl bruă Đảng, bruă sang čư̆ êa lehanăn êpul êya dŭm gưl ti čar Kon Tum pral ksiêm dlăng, bi mklă gŏ sang dleh dlan čiăng đru kơ digơ̆ ƀơ̆ng Têt. Čiăng kơ mnuih ƀuôn sang mâo klei m’ak s’aĭ, hrăm mbĭt hŏng ai êwa Têt Nguyên đán djuê ana, ƀri gưl anei, êbeh 500 boh ƀuôn mnuih djuê ƀiă hlăm čar mkŏ mjing Hruê m’ak ƀêñ điŏ mtah. Hlăm hruê m’ak anei, grăp gŏ sang ƀun, mâo klei hdĭp dleh dlan dưi mđup brei 2 klŏ ƀêñ điŏ ƀơ̆ng Têt. Mbĭt hŏng anăn, mâo lu hnư mnơ̆ng msĕ si mnơ̆ng ƀơ̆ng, čhum ao mđao mâo leh dŭm êpul bruă, mnuih mâo ai tiê kmah mđup brei. Lač kơ hdră mđing dlăng Têt kơ mnuih ƀuôn sang hlăm ƀuôn, ayŏng A Ngực, Khua bruă Đảng, Khua ƀuôn Đăk Rô Gia, să Đăk Trăm, kdriêk Đăk Tô, čar Kon Tum brei thâo, ƀuôn mâo 223 gŏ sang hŏng êbeh 1 êbâo čô mnuih lehanăn hluê ngă djŏ klei gĭt gai mơ̆ng gưl dlông, amâo lui hlei gŏ sang amâo dưi drông Têt.

“Mprăp drông têt, thŭn mrâo, alŭ wăl mđing êdi kơ dŭm gŏ êsei ƀun, gŏ êsei dleh dlan. Bruă Đảng alŭ bi mguôp hŏng khua mduôn ksiêm dlăng lehanăn bi mklă gŏ sang dleh dlan, gŏ sang ƀun hưn hŏng Anôk bruă sang čư̆ êa să đru braih, mnơ̆ng dhơ̆ng, ƀêñ kĕo… Alŭ mâo hdră kčah đŭng ƀêñ điŏ mtah mbha kơ grăp čô sa klŏ. 1.150 čô mnuih hmei mbha leh ênŭm, amâo mâo gŏ êsei, mnuih amâo mâo Têt, jih jang mâo hnư mnơ̆ng s’aĭ, bi tuôm hlăm hruê akŏ thŭn mrâo m’ak êdi. Êngao anăn, kdriêk, să lŏ đru braih, mnơ̆ng ƀơ̆ng, ƀêñ kĕo truh kơ grăp gŏ sang dleh dlan, amâo lui hlei pô ư̆ êpa, amâo mâo ƀơ̆ng Têt hlăm dŭm hruê Têt”.

Hŏng klei kñăm “jih jang mnuih, djăp ƀuôn êlan mâo tết sơăi” bruă sang čư̆ êa dŭm să hlăm kdriêk Mang Yang, čar Gia Lai mâo mkŏ mjing leh hdră ƀơ̆ng tết mbĭt kơ jih jang ƀuôn sang mnuih djuê ƀiă. Mơ̆ng êlâo kơ tết mtam bruă sang čư̆ êa mkŏ mjing leh dŭm êpul êya nao čuă êmuh mđĭ ai, mđup brei mnơ̆ng, prăk kăk pioh đru dŭm boh ƀuôn mơak drông tết h’uh mđao. Tlam hrue 29 tết, jih jang bruă lăn čar, bruă ƀuôn sang mơ̆ng thŭn hđăp jih ruĕ, êbeh 300 gŏ êsei phung ƀuôn sang ti ƀuôn Kon Brŭng, să A Yun, kdriêk Mang Yang, čar Gia Lai bi kƀĭn ti sang roong krah ƀuôn mđrăm mbĭt mơak mñai drông thŭn mrâo, mơak tết mbĭt. Hŏng ai tiê mơak Ƀlêng, 68 thŭn, jing mnuih ti ƀuôn Kon Brŭng brei thâo:

“Tết truh jih jang mnuih hlăm ƀuôn Kon Brung mđrăm mbĭt mkŏ mjing tết mbĭt. Mâo sa đru prăk, phung ƀuôn sang lŏ bi mguôp blei thiăm ŭn mnŭ, kă kpiê čeh... Hrăm mbĭt bi huă mnăm mơak mñai, mjing ai êwa mtluk mtlak drông thŭn bhang mrâo bi đru phung ƀuôn sang mâo ai tiê mđĭ kyar klei hdĭp mda, mkŏ mjing ƀuôn sang knư̆ hrue knư̆ jăk siam hĭn”.

Bi ti ƀuôn Brêp, să Đak Djrăng, kdriêk Mang Yang, čar Gia Lai, leh hrui êmiêt mdiê ênŭm hlăm hjiê, kphê kơ sang, mdiê ktơr leh bŏ brŏng kƀlăl, snăn phung ƀuôn sang mprăp yơh kpiê čeh mdhư̆ mdhưi, riă điŏ, blei mprăp čhum ao mrâo, blei ƀêñ kan... Čiăng hrăm mbĭt drông thŭn mrâo. Mbĭt hŏng klei mkŏ mjing hlăm grăp boh sang mdê mdê, ƀuôn Brêp ăt mâo bruă sang čư̆ êa să Đak Djrăng đru prăk, mnơ̆ng pioh mkŏ mjing tết mbĭt. Čiăng kơ jih jang phung ƀuôn sang mâo sa yan tết klă sĭt h’uh mđao mơak mñai. Đinh Gônh, 62 thŭn, mnuih mâo k’hưm hlăm ƀuôn Brêp, lač:

“Ƀuôn hmei mâo prăk knŭk kna brei ƀơ̆ng tết truh 5 êklăk, mkŏ mjing mbĭt hlăm sa anôk ti sang dhar kreh ƀuôn hlăm tlam hrue 1 tết, jih jang bi tông čing čhar kdŏ mmuiñ, hơ̆k mơak mbĭt. Hjăn gŏ sanhg kâo leh sa thŭn mă bruă suăi êmăn, thŭn hđăp leh êgao thŭn mrâo truh jih jang hơ̆k mơak bi kă kpiê, čuh ŭn mnŭ. Bi huă mnăm, bi čua čhưn găp djuê, bi trông kơ klei duh ƀơ̆ng, mđĭ ai anak čô duh ƀơ̆ng bi đĭ kyar”./.

Dŭm hruê êgao, K’Mák, K’iăng khua Êpul gơ̆ng bruă ƀuôn sang čar Lâm Đồng mbĭt hŏng êpul mă bruă nao čhưn, h’êč hmưi Têt lehanăn mđup brei mnơ̆ng kơ bruă Đảng, bruă sang čư̆ êa lehanăn gŏ sang knŭk kna dlăng ba êdah kdlưn, gŏ sang ƀun, dleh dlan ti kdriêk Dam Rông. K’iăng khua Êpul gơ̆ng bruă ƀuôn sang čar Lâm Đồng mtă kơ dŭm gưl bruă Đảng, bruă sang čư̆ êa mprăp jăk bruă mkŏ mjing m’ak yan mnga, drông têt kơ mnuih ƀuôn sang, mđing kơ gŏ sang dleh dlan, knŭk kna dlăng ba lehanăn gŏ sang ƀun. Ha Câu – Khua anôk bruă sang čư̆ êa să Rô Men, kdriêk Đam Rông brei thâo:

“Thŭn hđăp êgao leh, thŭn mrâo truh, dŭm anôk bruă, alŭ wăl ăt nao čuă êmuh dŭm gŏ sang dleh dlan. Mđup brei mnơ̆ng Têt kơ mnuih ƀuôn sang, mâo braih, ƀêñ kĕo, prăk čiăng kơ dŭm gŏ sang ƀun, dleh dlan mâo klei găl m’ak drông Têt, amâo lui hlei gŏ sang amâo mâo Têt. Anei jing hdră đru yuôm bhăn mơ̆ng Đảng, Knŭk kna kơ mnuih djuê ƀiă hlăm wưng êgao ăt msĕ mơh kơ wưng ti anăp”.

Êpul bruă êam êra phung duh mkra čar Lâm Đồng mrâo mkŏ mjing hdră yan mnga klei khăp thŭn 2023, nao čuă mđup brei mnơ̆ng kơ dŭm gŏ êsei mnuih ngă bruă, phung đoàn viên hlăk ai dôk hlăm klei dleh dlan hlăm čar. Ti dŭm anôk truh Êpul kiă kriê phung duh mkra mâo leh kllei mđĭ ai lehanăn hơêč hmưi tết kơ phung đoàn viên hlăk ai lehanăn mđup brei truh 60 hnư mnơ̆ng (hŏng ênoh 500 êbâo prăk/hnư) kơ gŏ sang hlăk ai dôk hlăm klei dleh dlan. Hnư mnơ̆ng anăn khădah amâo mâo jing prŏng ôh ƀiădah hŏng ai tiê klei khăp mơ̆ng phung mda asei anôk bruă duh mkra, jih jang mnơ̆ng anăn klă sĭt jing leh klei bi mđĭ ai kơ phung dôk hlăm klei dlehj dlan kpưn đĭ hlăm klei hdĭp. Amai Nguyễn Ý Nhi - khua bruă êdam êra bruă duh mkra čar brei thâo, anei jing bruă nga bŏ hŏng klei yuôm bhăn bi êdah ai tiê ba anăp mơ̆ng phung mda asei kyua kơ klei hdĭp mda mbĭt boh nik đru bi duh mĭn kơ klei hdĭp phung dôk hlăm klei dleh dlan, đru ba klei mơak mñai yan mnga mrâo hŏng klei h’uh mđao, bŏ hŏng klei khăp, hlăm wưng Tết Nguyên đán Quý Mão năm 2023.

Êpul hgŭm mnuih mă bruă čar Dak Lak mkŏ mjing leh Hdră “Têt kuh kŭm ênŭm ênap – Yan mnga hgŭm mguôp” thŭn 2023 kơ phung đoàn viên, mnuih mă bruă mâo klei hdĭp dleh dlan ti ƀuôn prŏng Ƀuôn Ama Thuôt. Ti hdră anei, Êpul hgŭm mnuih mă bruă čar Dak Lak lehanăn dŭm êpul, anôk bruă duh mkra mđup brei leh prăk đru rŭ mdơ̆ng 5 boh sang H’uh mđao Công đoàn kơ 5 čô đoàn viên mâo klei hdĭp dleh dlan kơ sang dôk; 467 hnư mnơ̆ng, grăp hnư 500 êbâo prăk kơ phung đoàn viên, mnuih mă bruă mâo klei hdĭp dleh dlan lehanăn 33 hnư mnơ̆ng mâo ênoh 1 êklăk prăk/hnư kơ phung đoàn viên, mnuih mă bruă mâo klei ruă ktrŏ. Hdră “Têt kuh kŭm ênŭm ênap – Yan mnga hgŭm mguôp” jing hdră bruă mâo klei tŭ yuôm mơ̆ng dŭm êpul bruă công đoàn, đru hŏng bruă Đảng dŭm gưl, bruă sang čư̆ êa hluê ngă jăk hdră đru kơ yang ƀuôn, bi êdah klei gĭr, klei mđĭ ai djŏ guôp čiăng kơ phung đoàn viên, mnuih mă bruă dưi m’ak yan Mnga, drông têt trei mđao mbĭt anăn lŏ bi lar bra klei hgŭm mguôp lehanăn amâo lui hlei pô dôk ti luôn hlăm êpul êya lehanăn kluôm yang ƀuôn”.