Dôk ti krah anôk bruă knŭk kna čar Daklak hlăm hrue mă bruă tal êlâo leh wưng mdei tết nguyên đán Quý Mão, Trần Tuấn Song, ti să Čư̆ Êbur, ƀuôn prŏng Ƀuôn Ama Thuôt hŏng klei mơak nao ngă hră mơar hŏng klei pral êjai ñu lŏ wĭt mkra hră asei, kñăm čiăng lŏ wĭt nao kơ ƀuôn prŏng Hồ Chí Minh mă bruă:

 “Anei jing hrue mă bruă tal êlâo leh wưng mdei tết, kâo hriê ngă hră mơar ti anôk bruă hdră bhiăn. Kâo ƀuh phung knuă druh mă bruă jăk hŏng phung ƀuôn sang, bi leh hră mơar hŏng klei pral”.

          Hlăm hrue mă bruă tal êlâo, leh wưng mdei tết nguyên đán, ênoh mnuih nao ngă hră mơar ti anôk bruă knŭk kna ka jăk lu ôh. Khădah snăn, jih jang phung knuă druh, mnuih ngă bruă lŏ wĭt mă bruă leh hŏng ai tiê mtluk mtlak mơak mñai, kñăm čiăng đru ngă hră mơar kơ phung ƀuôn. Đinh Thị Hương, pô ngă hră mơar bruă ênua yang ƀuôn čar lač:

 “Jih jang phung ayŏng amai adei anôk ngă bruă hră mơar čar Daklak anei nao mă bruă djăp ênŭm, lehanăn djŏ mmông sơăi, hŏng ai tiê bŏ hŏng klei mơak. Jih jang phung ngă bruă anôk bruă anei, lehanăn anôk bruă ngă hră mơar ênua yang ƀuôn hŏng ai tiê tal êlâo jing mă bruă kơ phung ƀuôn sang, ciăng kơ jih jang mnuih mâo klei mơak, leh ruĕ brua digơ̆ ư ai hŏng anôk bruă pô”.

        Ti Anôk bruă duh mkra Tân An, ƀuôn prŏng Buôn Ama Thuôt, Knơ̆ng bruă Ban Mê Green Farm mkŏ mjing klei trŭn kơ bruă mkra mjing boh durian, lehanăn amrêč pioh ba čhĭ kơ ala čar China lehanăn Japon. Nguyễn Thị Thái Thanh, Khua kiă kriê knơ̆ng bruă Ban Mê Green Farm brei thâo, hlăm jih wưng mdei Tết leh êgao, jih jang djăp mta bruă ngă hŏng ala tač êngao ăt dôk ngă bruă amâo mâo klei mdei ôh. Mơ̆ng anăn mơh, knơ̆ng bruă dưi mâo nanao ênoh kuôl kă klei ngă bruă mrâo lehanăn trŭn kơ bruă hlăm akŏ thŭn bŏ hŏng klei mjhĭt m’uăt mtam:

 “Ară anei ênoh mâo kuôl kă klei ngă bruă hŏng tač êngao jing djăp ênŭm leh mtam hlăm thŭn anei, đĭ hĭn êbeh 3 blư̆ mkă hŏng thŭn dih, msĕ si mkra mjing boh durian, amrêč, boh ƀơr, lehanăn boh kruĕ hruĕ... Čiăng dưi mâo djăp mnơ̆ng pioh ba čhĭ kơ ala tač êngao snăn kčưm ngă mtam bruă mơ̆ng hrue 6 tết hŏng mnơ̆ng čiăng bi mâo tal êlâo jing boh durian lehanăn amrêč”.

        Hlăm đang war dŭm hrue êgao, mnuih pla mjing ăt lŏ trŭn kơ bruă leh sơăi, bi dlăng kriê mnơ̆ng pô pla mjing, mnơ̆ng pô rông. Jih jang mâo sơăi sa klei hmăng hmưi srăng dưi mâo ba wĭt lu boh tŭ dưn hlăm thŭn mrâo, hŏng ênoh ênil čhĭ mnia hơĭt hĭn.  Phan Quốc Thế, ti să Ea Kpam, kdriêk Cư M’gar, čar Daklak lač:

 “Tui si phung pla kphê akŏ yan mnga anei jing kčưm kơ đuĕ nao hlăm yan không, snăn dlăng ti hnơ̆ng mnga kphê dliu krô dơ̆ng lŏ bi krih êa kơ kphê, khăt mkra adhan kphê. Phung pla mjing čang hmăng êdi jing jăk êa hlĭm hjan, lehanăn wăt hŏng ênoh ênil, kyuadah hlăm dŭm thŭn giăm anei ênoh čhĭ mnia boh mnga amâo mâo jăk yuôm ôh, mnuih pla mjing lĕ hlăm klei dleh dlan”.

Msĕ snăn mơh, ti alŭ wăl krĭng Yŭ Dưr ăt mâo mkŏ mjing leh mơh lu klei trŭn kơ bruă akŏ yan mnga thŭn mrâo, hŏng ai êwa mtluk mtlak mơak mñai, ktưn čiăng bi mâo sa thŭn dưi ba wĭt lu klei tŭ jing hĭn. Cà Thị Lê ti ƀuôn Giảng Lắc, ƀuôn hgŭm Quyết Thắng, ƀuôn prŏng Sơn La brei thâo: Mơ̆ng hrue akŏ thŭn mtam, jih jang mnuih hlăm sang bi nao buč êsŭn tỏi čang hmăng djŏ boh mnga, čhĭ mnia yuôm, kñăm ba wĭt klei hơĭt mđao kơ gŏ sang:

 “Trŭn ngă bruă hlăm akŏ thŭn mrâo, kâo čang hmăng jăk êa hlĭm hjan, mâo ba wĭt lu boh mnga, čhĭ mnia yuôm mơh, bi hơĭt klei hdĭp mda hlăm gŏ sang pô”.

            Êjai anăn ti knơ̆ng bruă mkra mjing sĭk ti Sơn La, hrue trŭn kơ bruă akŏ yan mnga, hŏng ai êwa mă bruă mơak mñai, dria dria hlăm jih đang kbâo, lehanăn sang mkra mjing kbâo. Tui si hdră, yan thŭn 2022 - 2023, knơ̆ng bruă ktưn mđĭ kyar anôk pla kbâo truh 9.500 ha, lehanăn dưi mâo truh êbeh 600.000 tôn, dưi mkra mjing truh 70.000 tôn sĭk. Bùi Minh Tuấn, knuă druh ngă bruă hlăm knơ̆ng bruă kbâo Sơn La lač: Mơ̆ng hrue 3 Tết leh mtam ñu mbĭt hŏng lu phung ayŏng adei mơ̆ng knơ̆ng bruă nao mtrŭt mjhar jih jang dŭm gŏ êsei phung pla kbâo, nao koh kbâo pô kñăm bi djăp ênoh kčah jing 5.000 tôn kbâo grăn pioh kơ sang mkra mjing kbâo mă bruă hlăm sa hrue, kñăm jih jang bruă ngă amâo mâo tloh ênuê ôh kčưm mơ̆ng hrue 4 tết mtam:

 “Čiăng kơ sang mkra mjing dưi ngă bruă hơĭt, hmei nao mtrŭt leh phung pla mjing trŭn nao koh kbâo, lehanăn jih jang phung ayŏng adei mgăt êdeh nao mdiăng kbâo ba wĭt kơ sang mkra mjing, djŏ hŏng wưng kčah jao”.

            Bi ti dŭm čar Lào Cai, Yên Bái ăt mkŏ mjing leh mơh klei mtrŭt mjhar “Tết pla kyâo hdơr nanao kơ Awa Hô”, lehanăn jih jang bruă pla mjing kyâo mtah ăt mâo mkŏ mjing nanao djŏ hŏng hdră êlan “Pla mjing 1 êklai phŭn kyâo mtah hlăm wưng thŭn 2021 - 2025” mơ̆ng khua knŭk kna mtrŭt mjhar, mâo ngă leh ti djăp anôk hlăm dua alŭ wăl./.