Ti sang maĭ mkra kphê mơ̆ng Anôk bruă duh bi liê mđĭ kyar An Thái, dŭm hdră mkra kphê kpŭng lehanăn kphê lik ngă bruă nanao čiăng mkăp ênŭm hnư mnơ̆ng ba čhĭ kơ ala tač êngao. Nguyễn Xuân Lợi, Khua anôk bruă brei thâo, dŭm klei kuôl kă blei mnơ̆ng mâo siñê akŏ thŭn dưi ngă leh, hnư mnơ̆ng dưi ba nao ti kdrŭn, mjing klei găl kơ mta kñăm đĭ kyar thŭn 2026.

 “Anôk bruă duh mkra čŏng tui ksiêm, ba yua tŭ dưn dŭm klei bhiăn, hdră mtrŭn mơ̆ng Knŭk kna hlăm hdră mnia mblei. Anei jing boh kdrŭt yuôm bhăn čiăng kơ hmei lŏ dơ̆ng pŏk mlar wăl anôk mnia mblei, mđĭ ai bi ktưn lehanăn đĭ kyar kjăp hlăm wưng ti anăp.

Thŭn 2025, ênoh prăk mnia mblei hŏng tač êngao mơ̆ng Dak Lak mâo hlăm brô 2,8 êklai USD, đĭ giăm 40% mkă hŏng thŭn êlâo, hlăm anăn bruă lŏ hma mâo bruă klam phŭn hŏng dŭm mta mnơ̆ng msĕ si kphê, makka, durian, cacao… Boh tŭ anei mjing thiăm boh kdrŭt čiăng kơ anôk bruă duh mkra mŭt hlăm thŭn ngă bruă mrâo. Nguyễn Tiến Dũng, kơiăng khua Anôk bruă 2-9 Dak Lak (Simexco Daklak) brei thâo, jing anôk bruă knŭk kna ba akŏ hlăm hdră ba čhĭ mnơ̆ng lŏ hma kơ ala tač êngao, mŭt hlăm thŭn 2026, anôk bruă duh mkra srăng mđĭ klei bi hgŭm hŏng dŭm êpul ala tač êngao kñăm mđĭ kyar kphê jăk, pŏk mlar wăl anôk mnia mblei lehanăn mđĭ boh tŭ yuôm kphê alŭ wăl.

“Hmei mâo sa hdră klă klơ̆ng, anăn jing tă hdră êlan mđĭ kyar wăt kơ ênoh, hnơ̆ng tŭ jăk kơ ƀĭng ngă lŏ hma lehanăn hdră bi hgŭm kluôm čiăng mjing mta kphê jăk mơ̆ng Việt Nam truh hŏng tar rŏng lăn”.

Mbĭt hŏng anôk bruă duh mkra kphê, lu êpul hgŭm bruă boh kroh ăt mâo klei bi knăl jăk. Ti Êpul hgŭm bruă lŏ hma Xanh Cao Nguyên, să Čư̆ Mgar, čar Dak Lak, čêñ hruê̆ dôk mŭt hlăm wưng ba čhĭ truh kơ wăl anôk mnia mblei China, Mi lehanăn Canada…  Nguyễn Văn Thanh Bình, Khua êpul hgŭm bruă brei thâo, mbĭt hŏng hdră ba čhĭ boh čêñ hruê̆ mtah, êpul hgŭm dôk mkra sang maĭ čiăng mđĭ kyar bruă mkra mjing êlam hĭn.

“Mbĭt hŏng bruă ba čhĭ boh mtah, êpul hgŭm bruă dôk mkra sang maĭ čiăng mjing dŭm mta mnơ̆ng bi ê’ăt, bi mthu krô lehanăn êa kpĭ mơ̆ng čêñ hruê̆ čiănga ba čhĭ kơ ala tač êngao. Êpul hgŭm bruă ăt tă hdră êlan mđĭ kyar bruă mkra êa čêñ hruê̆ êkŏ kñăm mđĭ boh tŭ yuôm mnơ̆ng lŏ hma. Čiăng rơ̆ng phŭn mkăp mnơ̆ng hơĭt kjăp, êpul hgŭm bruă dôk mđĭ klei bi hgŭm lehanăn pŏk mlar wăl anôk pla čêñ hruê̆ hluê si hdră pla sa anôk, mkăp kơ hdră mkra mjing lehanăn ba čhĭ kơ ala tač êngao.

Mbĭt hŏng knhuang đĭ kơ boh tŭ yuôm, hnơ̆ng mâo lehanăn hnơ̆ng tŭ jăk ba čhĭ kơ ala tač êngao, dŭm anôk bruă lŏ hma ti Dak Lak ăt mâo klei đĭ kyar hlăm hdră mkra mjing. Hluê si Hoàng Danh Hữu, Khua êpul hgŭm kiă kriê Anôk bruă Mnia mblei Êđê, mkra mjing êlam đru kơ anôk bruă duh mkra mâo lu jơr mnơ̆ng ba čhĭ, tui duah wăl anôk mnia mblei mrâo, đĭ kyar anăn knăl. Dŭm anôk bruă duh mkra čang hmăng dưi bi mjĕ lu hĭn hŏng ƀĭng hgŭm hluê hdră mtrŭt mđĭ bruă mnia mblei. Hoàng Danh Hữu brei thâo:

“Hmei čang hmăng Phŭn bruă Tuh tia mnia mblei mtrŭt mđĭ hdră mnia mblei dua nah hŏng dŭm ala čar ară anei dôk mâo klei bi mjĕ ƀĭng hgŭm phŭn kluôm dhuôm, kñăm mtrŭt mđĭ hdră blei yua, hlăm anăn mâo kphê Việt Nam hlăm dŭm wăl anôk anei bi hrô knŏng bi trông hŏng dŭm klei kuôl kă bruă mnia mblei êngiê snăn drei hluê ngă hdră dua nah mtam čiăng mâo hdră mtrŭn đru”.

Thŭn 2026, Dak Lak mâo mta kñăm bi mnia mblei hŏng tač êngao mâo 2,9 êklai USD, mđing pŏk mlar wăl anôk mnia mblei lehanăn mđĭ boh tŭ yuôm mnơ̆ng lŏ hma hluê hdră mkra mjing êlam. Hŏng ai êwa ngă bruă jăk mơ̆ng akŏ thŭn, êpul êya anôk bruă duh mkra mnơ̆ng lŏ hma ti alŭ wăl dôk bi êdah klei gĭr mđĭ hnơ̆ng tŭ jăk, mkŏ mkra anăn knăl lehanăn ba mnơ̆ng lŏ hma Dak Lak kpưn đĭ kbưi hĭn hlăm wăl anôk mnia mblei tar rŏng lăn. Klei anei đru mđĭ hnư hrui wĭt kơ mnuih ƀuôn sang, anôk bruă duh mkra, mtrŭt mđĭ kyar bruă duh mkra – ala ƀuôn mơ̆ng čar, mđing truh hnơ̆ng đĭ kyar 2 mtrô hlăm wưng ti anăp./.