Hlăm mmông drông, mñă klă klei bi hgŭm mơ̆ng đưm leh anăn hdră êlan sa anăn mơ̆ng Đảng, knŭk kna Việt Nam hlăm bruă mđing mrô sa klei bi hgŭm hŏng China, Khua knŭk kna Phạm Minh Chính čang hmăng dua ala čar lô̆ dơ̆ng mđĭ klei bi hgŭm, mđĭ klei đăo knang, mđĭ ktang klei bi hgŭm kluôm, bi đru mđĭ kyar. Kơ klei bi hgŭm hlăm wưng kơ anăp.

Khua knŭk kna Phạm Minh Chính mtă kơ dua tĭng gĭr mđĭ bruă mnia blei dua nah hlue si hdră bi knar, jăk mơak, hơĭt kjăp, pŏk ƀăng jih hnơ̆ng kơ mnơ̆ng dhơ̆ng kna hdang leh anăn rông mnơ̆ng Việt Nam, mjing klei êdah kdlưn kơ bruă mkŏ anôk bruă nah gŭ phŭn, mđing kơ klei bi hgŭm bruă êlan êdeh treng kñăm mkŏ 2 ala čar hŏng krĭng wăl Ngŏ Dhŭng Asi, Krah Asi, Ơ Rôp; mđĭ hĭn klei bi hgŭm kơ êa pui êwa čuh, ngăn prăk, knơ̆ng prăk; mđĭ klei bi hgŭm dhar kreh, hiu čhưn ênguê, mjing klei găl kơ bruă  tue hiu čhưn mŭt kbiă ti dua ala čar.