Mĭn tĭng mmông mă bruă mơ̆ng gưl kƀĭn jing 11 hruê, mbha jing 2 gưl ( gưl 1 mơ̆ng hruê 6/4 - 12/4; gưl dua mơ̆ng hruê 20/4 - 23/4/2026. Hlăm klei kƀĭn anei, Bruă Kbĭn ala srăng ngă bruă bi kluôm mnuih mă bruă Knŭk kna, ksiêm dlăng, bi klă 8 hdră bhiăn, 1 hdră mtrŭn hdră bhiăn lăn čar, mbĭt anăn ksiêm dlăng, bi klă dŭm hdră êlan prŏng mơ̆ng lăn čar kơ mđĭ kyar bruă duh mkra ala ƀuôn, bruă lĭng kahan, klei êđăp ênang, ngăn prăk lăn čar, duh bi liê bruă Knŭk kna, čan tla prăk Knŭk kna hlăm wưng 5 thŭn kơ anăp.

Hluê anăn, Bruă Kbĭn ala srăng ruah phung khua gĭt gai mâo: khua Bruă Kbĭn ala, phung k’iăng khua Bruă Kbĭn ala, khua hlăm dhar bruă Bruă Kbĭn ala, Khua lăn čar, k’iăng Khua lăn čar, Khua Knŭk kna, khua sang phat mkra gưl dlông, khua anôk bruă ksiêm dlăng yang ƀuôn gưl dlông, Khua tĭng mkăn Knŭk kna. mbĭt anăn Bruă Kbĭn ala ăt bi klă klei mñă ruah mdưm hŏng phung khua êmua hlăm Knŭk kna mâo: Phung k’iăng Khua Knŭk kna, phung khua phŭn bruă leh anăn phung hgŭm mơ̆ng Knŭk kna mbĭt hŏng đa đa bruă păn mkăn hlăm klei dưi. Hluê si hdră bhiăn phŭn thŭn 2013, leh mâo Bruă Kbĭn ala ruah, khua Bruă Kbĭn ala, Khua lăn čar, Khua Knŭk kna, khua sang mkra mkra yang ƀuôn gưl dlông srăng ngă kñăm đĭ păn bruă ti anăp Bruă Kbĭn ala.