Hlăm hruê kăm mphŭn pŏk thŭn Hiu čhưn ênguê ala čar 2026 mkŏ mjing knhal jih mlan 3 mrâo êgao, Gia Lai drông dŭm pluh êbâo čô tue hiu čhưn hlăm leh anăn êngao ala čar nao ksiêm dlăng leh anăn hiu čhưn ênguê. Wăl mjĕ êrô leh anăn knăm mơak bŏ hŏng êa mil klei mkŏ mjing lu jơr: mơ̆ng Klei bi kƀĭn mđĭ kyar Bruă duh mkra Gia Lai 2026, klei bi kƀĭn mtrŭt mjhar bi liê, dŭm hdră bruă mjĕ êrô lu ala čar, truh kơ klei rang mdah mkŏ mjing klei kdŏ mmuñ leh anăn klei mdah kdrăm kơah. Dŭm klei hiu čhưn dlăng anei mâo lu klei jăk siam hŏng tue hiu čhưn, đru ba Gia Lai jing anôk truh êdah kdlưn mơ̆ng Thŭn hiu čhưn ênguê ala čar. Pô mda asei Lê Thanh Phương Hạ, tue hiu čhưn hriê mơ̆ng Nha Trang, čar Khánh Hòa, brei thâo:

“Kâo ti Nha Trang hriê tinei, klă sĭt anei jing gưl tal êkâo kâo ƀuh krĭng kwar Krah pô mơ̆ng êlâo truh kơ ară anei mâo sa klei kdŏ mmuñ prŏng snăn, kyua anăn kâo nao. Kâo đĭ êdeh p’phŭt mơ̆ng Nha Trang hriê tinei êbeh 4 mmông krah, ƀiădah hur har leh anăn mơak leh truh ti Gia Lai.”

 Hlăm hdră ksiêm dlăngViệt Nam, Roman, tue hriê mơ̆ng Russia, hlai mbĭt hlăm ai êwa hơ̆k mơak hlăm  Hruê kăm mphŭn pŏk Thŭn hiu čhưn ênguê ala čar 2026 ti Gia Lai.  Hlăm wăl êa ksĭ - Dap Kngư jiă êa mil dhar kreh alŭ wăl, Roman brei thâo, gưl anei ba leh kơ ñu hŏng êpul hiu čhưn ênguê Russia klei jăk siam snăk: “Kâo nao leh lu anôk ti Việt Nam msĕ si Đà Nẵng, Nha Trang, ƀiădah tinăn lu mnuih snăk. Tal anei  hriê ti  Gia Lai, kâo ƀuh tinei siam, êđăp ênang leh anăn dôk lu anôk hrông. Boh nik hriê hlăm Gưl Thŭn hiu čhưn ênguê ala čar ba kơ klei hiu čhưn jing yuôm bhăn hĭn.”

 Lŏ čuê klei mơak mơ̆ng knăm mphŭn pŏk, hlăm gưl II/2026, čar Gia Lai lŏ dơ̆ng mđĭ ktang klei mtrŭt mjhar hưn mdah hlăm dŭm knăm mơak prŏng ti Hà Nội leh anăn ƀuôn prŏng Hồ Chí Minh. Mbĭt anăn, Gia Lai ăt srăng mkŏ mjing lu klei jing mñă kơ thŭn hiu čhưn ênguê ala čar 20262, năng mđings răng mâo Klei bi lông kdŏ mmuñ lu ala čar (K-Pop), mjing klei mrâo mrang kơ rup hiu čhưn ênguê. Mbĭt hŏng anăn, Festival čing čhar Lăn Dap Kngư srăng jing klei êdah êdi, jiă kma knhuah dhar kreh dap kngư. Khua phŭn bruă dhar kreh, mjuăt asei mlei leh anăn hiu čhưn ênguê Nguyễn Văn Hùng mni kơ lu bruă ngă leh ăn čang hmăng thŭn hiu čhưn ênguê ala čar srăng mjing boh kdrŭt kơ hiu čhưn ênguê čar Gia Lai.

“Hŏng 244 bruă ngă dưi mkŏ mjing nanao hlăm thŭn 2026. Čiăng kơ Thŭn hiu čhưn ênguê ala čar jing sa boh kdrŭt mđĭ klei hưn mdah kơ sa pŏk rup Gia Lai mrâo, pral kdal, jĕ giăm, mâo lu klei găl, mđĭ klei bi hgŭm krĭng hlue si ênoh yuôm, iêô jak phung bi liê hdră bruă hlăm hiu čhưn ênguê, mkŏ mjing mnơ̆ng dhơ̆ng hiu čhưn ênguê jăk, mâo hnơ̆ng jăk leh anăn ai bi ktưn  lu ala čar.”

Čar Gia Lai kčah klei kñăm drông hlăm brô 15 êklăk gưl tue, hŏng ênoh hrui wĭt hiu čhưn ênguê hlăm brô 35 êbâo êklai  prăk hlăm thŭn hiu čhưn ênguê ala čar 2026. Anei ăt jing klei găl kơ Gia Lai lŏ bi mklă rup hiu čhưn ênguê, mđĭ klei bi hgŭm krĭng leh anăn mđĭ kyar hlue hdră kjăp. Phạm Anh Tuấn, Khua Knơ̆ng bruă sang čư̆ êa čar Gia Lai bi mklă klei gĭr mơ̆ng alŭ wăl:

 “Čar Gia Lai ƀuăn rơ̆ng srăng mkŏ mjing tŭ jing Thŭn hiu čhưn ênguê ala čar 2026 hŏng ai tiê thơ̆ng, êđăp ênang, jĕ giăm, jiă knhuah dhar kreh čiăng kơ tue hiu čhưn ƀuh klei jih ai tiê, mdê hjăn leh anăn năng hdơr. Hmei đăo knang mơ̆ng klei anei, Gia Lai mrâo srăng kpưn đĭ jing anôk truh jăk siam, anôk bi klin, mkŏ, lar bra ênoh yuôm dhar kreh leh anăn hiu čhưn ênguê jăk siam mơ̆ng Việt Nam leh anăn krĭng wăl.”

 Thŭn hiu čhưn ênguê ala čarr 2026 ti čar Gia Lai mâo lu bruă ngă kdrăm kơah sui jih thŭn. Mơ̆ng klei dhar kreh jiă kma dap kngư truh kơ klei kdŏ mmuñ, hiu čhưn ênguê mrâo mrang hnơ̆ng lu ala čar, alŭ wăl dôk grăp knhuang mkŏ mjiing rup sa anôk truh mrâo, bŏ hŏng klei jăk siam.  Hŏng klei hgŭm ngă bruă mơ̆ng bruă sang čư̆ êa, anôk bruă duh mkra leh anăn êpul êya, Gia Lai čang hmăng mjing knhuang êdah kdlưn hlăm klei iêô jak tue hiu čhưn, mbĭt anăn mjing tur knơ̆ng kơ hiu čhưn ênguê jing bruă duh mkra yuôm bhăn, đru ba krĭng lăn bi mguôp dap kngư - êa ksĭ jing anôk truh jăk mơak hlăm hla kak hiu čhưn ênguê Việt Nam leh anăn lu ala čar.