Anôk ngă bruă Phung hđeh êdam êra čar Dak Lak mâo boh prŏng 3ha, ti ƀuôn hgŭm Tự An, ƀuôn prŏng Ƀuôn Ama Thuôt. Bruă mkŏ mkra anei mâo sa sang lu mta bruă, ênhă yua 3.000 m2, sa brŏng luê êa leh anăn 2 đrông sang tlô, sang pleh čhŭm ao, tač bê tông prŏng 1.500 m2 leh anăn êlan mđuê̆ êa, mnư̆ mtih djŭm dar. Anôk bruă anei mâo ênoh duh bi liê giăm 62 êklai prăk, dưi rŭ mjing mơ̆ng thŭn 2013 leh anăn bi leh ti thŭn 2017. Khădah sơnăn, ƀiădah anôk bruă dŭm pluh êklai prăk anei dôk lui êruh mơ̆ng hruê anăn truh kơ ară anei. Võ Đình Thận, Pô ngă bruă rang mgang anôk bruă anei brei thâo:

        “Kâo mă bruă tinei mâo 5 thŭn leh, sui sui ƀuh phung hđeh êdam êra kƀĭn 1, 2 blư̆. Mơ̆ng hruê kâo hriê mă bruă amâo mâo pui kmlă, êa kăn mâo lei, tơl nao akâo êa phung sang riêng gah wĭt yua. Anôk bruă anei jhat rai leh, ƀrôč êa mơ̆ng sang tal 2, čuôr sang ti anăp angĭn mđung đuê̆ leh mơh.

            Anôk bruă anei dưi rŭ mjing ti ênhă lăn prŏng leh anăn lui êruh, ƀuh sơnăn, mnuih ƀuôn sang mă yua anôk anei jing anôk bhu boh mnga leh anăn kiă êmô. Amai Nguyễn Thị Thanh Mai mâo sang klă anăp anôk bruă anei brei thâo:

“Kâo ƀuh ƀiă sơnăk mâo ngă bruă ti nei, wưng ka mâo klei ruă tưp Covid-19 ăt ƀuh mơh phung hđeh êdam êra hriê ngă klei kdŏ mmuñ 1,2 blư̆, leh mâo klei ruă tưp amâo lŏ ƀuh ôh. Ƀuh lui êruh msĕ sơnăn, mâo phung ƀuôn sang phưi tha êmô, kbao tinăn, sui sui mdiăng boh mnga hriê bhu tinei.

Amai H’Giang Niê, Khua bruă hđeh êdam êra tŭ ư, Anôk bruă hđeh êdam êra čar Dak Lak amâo mâo ôh klei ngă bruă hlăm 5 thŭn êgao. Ară anei mâo lu anôk dôk jhat rai kjham. Phŭn agha kyua kƀah hdră êlan, amâo dưi mkŏ mjing êpul gĭt gai. Bruă hđeh êdam êra čar Dak Lak dôk kƀah 18 čô mă bruă, êjai anăn mta mtrŭt ară anei amâo mâo brei mkŏ mjing anôk bruă mrâo. Êngao kơnăn, leh anôk bruă anei bi bi leh ti thŭn 2017, êlan klông ti alŭ wăl ka dưi bi leh mơh.

Amai H’Giang Niê brei thâo, Bruă hđeh êdam êra čar Dak lak mâo leh hră hưn mdah hŏng bruă sang čư êa čar bi mbŏ ênoh prăk čiăng mkra wĭt dŭm anôk jhat rai, mbĭt anăn tiŏ nao mnuih mă bruă čiăng gĭt gai anôk bruă, bi mguôp hŏng dŭm êpul êya, bruă sang čư êa alŭ wăl hrăm mbĭt nao hgŭm čiăng ba anôk bruă anei dưi ngă bruă. 

“Hmei mâo leh klei gĭt gai kơ Bruă hđeh êdam êra ƀuôn prŏng Ƀuôn Ama Thuôt hrăm mbĭt hŏng êpul bruă hđeh êdam êra čar hluê ngă hdră hđeh êdam êra čiăng rơ̆ng klei siam kơ anôk bruă. Bi mguôp hŏng bruă sang čư êa ƀuôn hgŭm Tự An hâo hưn, mtrŭt mjhar dŭm gŏ sang amâo mâo phưi tha êmô kbao, bhu boh mnga ti wăl tač anôk bruă. Êngao kơnăn, Bruă hđeh êdam êra čar Dak Lak ăt hâo hưn kơ dŭm gŏ sang jĕ giăm amâo mâo nao hlăp lêñ jĕ brŏng luê êa hŭi dah tăp mâo klei truh.