Kdriêk Krông Bông, čar Daklak dôk hlăm krĭng duôr čư̆ Yang Sin prŏng kdrăm. Dŭm hrue mprăp kơ knăm mơak kphê, bi hdơr 50 thŭn hrue čar mâo klei êngiê, hlăm ghrăp êlan klông bi kă leh hla čhiăm gru, dŭm anôk hiu čhưn ênguê mâo bi msiam, mkra mrâo, hŏng lu anôk jăk mprăp kơ klei drông tue. Čư̆ dlông kmrơ̆ng kpal lehanăn dŭm boh ƀuôn ktue ping čư̆ Yang Sin, amâo mâo djŏ knŏng jing anôk jăk kơ tue hiu čhưn ênguê truh hlăm klei hiu čhưn dhing dlăng dhar kreh ƀuôn sang, dlăng lăn mnga êa siam, hloăm kmrơ̆ng hrông. Ƀiădah anei lŏ jing anôk jiă knhuah gru hƀuê ênuk 10 thŭn klei bi blah ktang phĭt hŏng Mi (1965-1975), jing leh anôk kmrơ̆ng mgang brei kơ cách mạng, kmrơ̆ng kwang dar phung roh. Giăm leh 100 thŭn Lê Chí Quyết, K’iăng khua bruă Đảng čar Daklak êlâo dih, ăt dôk hdơr kdrưh nik hlăm 10 thŭn bruă pô mă dôk hlăm krĭng phŭn krŭ kdơ̆ng anei;

 “Jing anôk bruă kiă kriê bruă Đảng čar tal êlâo tĭng nah dhŭng anei, mâo wăt anôk bruă Đảng, anôk k’iăng lehanăn dŭm êpul êya mă bruă, mâo phung čih hră, phung ngă bruă kỉê pioh hră mơar, lehanăn phung kăp bi blŭ hrăm. Hlăm klei bi kƀĭn tal êlâo mơ̆ng êpul khua kiă kriê bruă Đảng čar bi trông kơ dua mta bruă, tal êlâo jing srăng krơ̆ng kjăp krĭng nah Dhŭng amâo brei roh ksŭng mmiă, mbĭt anăn mkŏ mjing ƀrư̆ ƀrư̆ jing krĭng phŭn, čiăng mkŏ mjing krĭng phŭn bruă krŭ kdơ̆ng kluôm mơ̆ng nah Dưr truh kơ nah Dhŭng”.

Hŏng Nai mtô Hà Ngọc Đào, khua kiă kriê hđăp knơ̆ng bruă sang hră mơar čar Dak Lak, wăl krŭ kdơ̆ng H9-Krông Bông jing sang hră, jing kdrăn mblah leh anăn ăt jing đang pla mjing, kyua phung nai mdrao asei dưi mbŏ kơ Dak Lak ngă mbĭt 3 bruă klam: mtô bi hriăm, pla mjing mnơ̆ng ƀơ̆ng huă leh anăn nao hlăm klei kdơ̆ng mblah. H9-Krông Bông  lŏ wĭt hdơr, H9 jing krĭng k’kiêng kơ lu phung jhŏng ktang:

 “Kâo hriê tinei hlăk thŭn 1965, truh hruê sua wĭt klei êngiê dôk tinei 10 thŭn. Lu phung êka tinei leh anăn ăt đĭ hriê kơ prŏng tinei. Mâo phung jhŏng ktang, msĕ si pô jhŏng ktang Y-Ơn, hriê kơ prŏng mơ̆ng êpul kahan blah dêč, hdră krŭ kdơ̆ng ti Krông Bông. Pô jhŏng ktang Ama Lê – pô jhŏng ktang lĭng kahan ăt hriê kơ prŏng tinei leh anăn djiê êngiă leh anăn dưi mâo anăn knăl pô jhŏng ktang. Kyuanăn êjai wĭt tinei, hlăm kâo ƀuh mgei ai tiê, hdơr kơ dĭng kna, hdơr kơ ayŏng adei, hdơr kơ mnuih ƀuôn sang, hdơr kơ kdrăn mblah”.

Hlăm klei bi blah ktang phĭt, mnuih ƀuôn sang ti dŭm ƀuôn êlan ti gŭ jơ̆ng Čư̆ Yang Sin amâo mâo hơưi ai tiê, asei mlei pô, răng mgang wăl anôk krŭ kdơ̆ng, pŏk phai krĭng mtaih êngiê. Mnuih djuê ƀiă tinei kơup mgang kơ bruă krŭ kdơ̆ng, čiăng kơ 3 gưl klei kƀĭn kluôm bruă Đảng čar dưi mkŏ mjing êđăp ênang tinei. Y-Suôm Niê, ti ƀuôn H’Ngô A, să Hoà Phong, kdriêk Krông Bông yăl dliê:

  “Grăp čô grăp bruă, hluê si ai pô. Krŏng knur srăng phăn jao, sitôhmô, điêt êtuh bĕ, phung prŏng êbâo ƀĕ, đru bi nao čŭt ti krĭng knông plah wah roh leh anăn kahan krŭ kdơ̆ng. Leh anăn nao pla hbei ƀlang, mnuih điêt pla 500 phŭn, prŏng pla êbâo phŭn. Čiăng mă hbei ƀlang khăt điêt, bhu krô leh anăn ba kơ phung lĭng kahan nao mblah roh”.

  Mơ̆ng klei thâo bi mguôp, klei sa ai mơ̆ng lĭng kahan lehanăn mnuih ƀuôn sang mjing djăp klei găl čiăng kơ bruă Đảng čar daklak kiă kriê mnuih ƀuôn sang djăp djuê ana nao mơ̆ng klei dưi anei truh kơ klei dưi mkăn, mjing klei dưi mơ̆ng ƀuôn Ama Thuôt, mâo mă kluôm dhuôm car Daklak, đru kơ ai ktang klei dưi kdrăn mblah yan mnga thŭn 1975, mhluh lir lăn čar. Y Thức Êban, K’iăng khua knơ̆ng bruă sang čư̆ êa kdriêk Krông Bông brei thâo, krĭng phŭn klei krŭ kdơ̆ng čar Daklak mâo tŭ yap leh jing alŭ wăl knhuah gru hƀuê ênuk ala čar mơ̆ng thŭn 2017, jing leh anôk mjuăt bi hriăm kơ knhuah gru cách mạng kơ hđeh gưl mrâo.

 “Anei jing anôk kñăm čiăng kơ drei lŏ dơ̆ng mjuăt hriăm knhuah gru  cách mạng, boh nik hŏng hđeh gưl mrâo. Hlăm wưng tinăp, kơ klei mđĭ kyar hiu čhưn dhing, dưn yua jih klei tŭ dưn hƀuê ênuk, hŏng dŭm bruă ngă klă mngač, boh nik hlăm dŭm gưl hđeh êdam êra bi mkŏ mjing jêñ jêñ dŭm bruă mjuăt bi hriăm knhuah gru, klei hdơr knga kơ prŏng prĭn mơ̆ng aê ama pô nao êlâo, phung jhŏng ktang săn leh asei mlei djiê êngiă kyua klei êngiê kơ lăn čar”.

  Leh 50 thŭn mâo klei êngiê, krĭng phŭn krŭ kdơ̆ng mphŭn dôk hlăm čar Daklak ară anei jing kdriêk Krông Bông hlăk mâo leh klei bi mlih hlăm grăp hrue, hlăm klei bi sa ai đru bi rŭ mdơ̆ng bruă sang čư̆ êa lehanăn klei hdĭp mda mnuih ƀuôn sang. Hŏng dŭm đang kphê mtah mda hlăm dŭm krĭng lăn tuôm jing leh anôk roh tuh êa drao ruă. Dŭm knhuah gru  gru knhăl đưm ară anei jing leh knhuah gru hƀuê ênuk, srăng dôk nanao hlăm ai tiê, klei mĭn mnuih ƀuôn sang, kơ phung hđeh gưl êdei ti Krông Bông, lehanăn hlăm čar Daklak, jing leh klei myưng m’ang kơ sa ênuk hlăm klei bi blah./.