Aguah mbruê 7/9, Khua knŭk kna Phạm Minh Chính mbĭt hŏng khua gĭt gai dŭm lăn čar hlăm ASEAN leh anăn phung ƀĭng hgŭm lŏ dơ̆ng nao hlăm klei kƀĭn trông gưl dlông ASEAN – India tal 20 leh anăn Klei kƀĭn trông gưl dlông Ngŏ Asi (EAS) tal 18. Hlăm klei kƀĭn trông gưl dlông ASEAN – India tal 20, dŭm tĭng yap yuôm bhăn klei mjĕ giăm ƀĭng hgŭm hdră êlan kluôm dhuôm mkŏ mjing thŭn 2022. Khua knŭk kna India Narendra Modi mñă klă ASEAN jing sa kmeh gơ̆ng hlăm hdră êlan ngă bruă mđing kơ nah Ngŏ leh anăn jing mta kñăm hlăm klei kčĕ India – Pacific mơ̆ng India.

ASEAN leh anăn India tŭ ư mđing tal êlâo kơ klei bi mguôp kjăp, bruă duh mkra êa ksĭ mtah, bi kdơ̆ng hŏng klei măk ƀai, phung ngă soh hluh lăn čar, mđĭ ai dưi bruă mdrao mgŭn, mtrŭt mđĭ klei mkŏ, dưn yua klei kreh knhâo mrâo mrang, mlih mrô, mbĭt anăn pŏk mlar klei bi mguôp mlih pui kmlă, bi mdrơ̆ng hŏng klei mlih yan adiê. Khua knŭk kna India hưn mdah mkŏ mjing keh prăk ASEAN – India kyua êdei anăp mrô. Hlăm klei kƀĭn trông gưl dlông ASEAN Ngŏ Asi tal 18, phung ƀĭng hgŭm ƀuăn sa ai hŏng bruă klam jing mta kñăm mơ̆ng ASEAN, mbĭt hŏng anăn mkŏ mjing wăl pŏk, klă mngač, kluôm dhuôm leh anăn hluê si hdră bhiăn tar rŏng lăn leh anăn hdră bhiăn Êpul hgŭm lu ala čar.