Hluê ngă hdră êlan mơ̆ng Đảng leh anăn knŭk kna, hlăm dŭm thŭn êgao, dŭm alŭ wăl ti Lăn Dap Kngư ngă tŭ dưn Hdră ala čar kñăm bi hrŏ ƀun hơĭt kjăp leh anăn mđĭ kyar bruă duh mkra ala ƀuôn krĭng mnuih djuê ƀiă leh anăn čư̆ čhiăng. Mơ̆ng sa gŏ sang ƀun, amai H Phương Knul (mnuih Êđê), ti ƀuôn Tuôr, să Hoà Phú, čar Dak Lak mâo knŭk kna đru brei čan čiăng duh bi liê ngă bruă knuă, ară anei mâo leh klei hdĭp hơĭt leh anăn dưi rŭ mdơ̆ng sang kjăp.

 “Êlâo dih gŏ sang kâo jing gŏ sang ƀun, amâo mâo sang dôk. Knŭk kna đru sa kdrêč, gŏ sang kâo lŏ mkiêt mkuôm dưi rŭ mdơ̆ng sang anei. Ƀiădah bruă mă ka hơĭt, dôk mđing kơ anak nao sang hră. Kâo hmăng hmưi knŭk kna lŏ dơ̆ng uêñ mĭn, mkŏ mjing bruă mă leh anăn hnư hrui wĭt hơĭt kơ dŭm gŏ sang adôk dleh dlan hlăm ƀuôn”.

Klei kbĭn prŏng tal 14 mơ̆ng Đảng bi klă mta kñăm 5 thŭn kơ anăp, ênoh gŏ êsei ƀun hluê ênoh čuăn lu tĭng wưng thŭn 2026 – 2030 hrŏ kah knar 1 – 1,5 puăng % grăp thŭn. Bi klă hdră êlan anei, Hdră mtrŭn Klei kƀĭn prŏng čar Dak Lak wưng thŭn 2025 – 2030 mdưm mta knnăm ênoh gŏ êsei ƀun kluôm čar hrŏ mơ̆ng 2% sa thŭn kơ dlông, ênoh gŏ êsei ƀun jing mnuih djuê ƀiă hrŏ mơ̆ng 3% kơ dlông. Čiăng mâo mta kñăm anăn, čar lŏ dơ̆ng mđĭng mđĭ kyar bruă mkra mịing, bi lu jơr hdră duh ƀơ̆ng, pŏk mlar dŭm gru hmô bi hrŏ ƀun găl guôp hŏng grăp alŭ wăl. Nguyễn Thị Nguyên Thảo, K’iăng khua Bruă sang čư̆ êa čar Dak Lak brei thâo:

“Wưng thŭn 2026 – 2030, čar lŏ dơ̆ng mkŏ mjing klei găl čiăng ba yua ngăn prăk, hdră êlan yang ƀuôn hŏng mnuih ƀuôn sang, hluê ngă asăp mtrŭn mrô 39 mơ̆ng Êpul khua bruă Đảng, mđĭ hnơ̆ng jăk ba yua ngăn prăk hlăm bruă mkra mjing, mnia mblei, mkŏ mjing thiăm boh kdrŭt mđĭ kyar krĭng ƀuôn sang mrâo, mđĭ kyar bruă duh mkra ala ƀuôn krĭng mnuih djuê ƀiă, krĭng čư̆ čhiăng, rơ̆ng hơĭt klei hdĭp yang ƀuôn ti alŭ wăl čar.”

            Leh klei kƀĭn tal 14 mơ̆ng Đảng, Khánh Hoà čŏng pô, bi klă ai tiê ruah djŏ – ngă pral – ngă truh hnơ̆ng – mkă hŏng boh tŭ dưn, kñăm bi hơĭt wăl duh bi liê mnia mblei, mtrŭt mđĭ dŭm kmeh gơ̆ng đĭ kyar, bi sĭt mta kñăm jing ƀuôn prŏng gưl dlông êlâo kơ thŭn 2030. Hlăm klei gĭt gai, khua Bruă sang čư̆ êa čar Khánh Hoà Trần Phong mñă ktang klei čuăn bi pral kluôm dhuôm dŭm mta bruă kmeh gơ̆ng, mñă kơ dŭm knơ̆ng, dhar bruă, alŭ wăl mkŏ mjing hdră êlan klă klơ̆ng, ruh mgaih klei dleh dlan, mđĭ ai dưi bi ktưn leh anăn hnơ̆ng jăk đru kơ mnuih ƀuôn sang, knơ̆ng bruă:

“Mơ̆ng ară anei truh kơ knhal jih thŭn leh anăn mŭt hlăm thŭn 2026, mñă kơ dŭm knơ̆ng, dhar bruă, alŭ wăl mkŏ mjing hdră êlan hŏng hdră mlan, đa đa grăp hruê kăm, ruh mgaih klei dleh dlan, mđĭ ai dưi bi ktưn leh anăn hnơ̆ng jăk đru kơ mnuih ƀuôn sang, knơ̆ng bruă. Hluê si grăp anôk bruă, grăp čô srăng čŏng hluê ngă”.

Hlăm lu klei gĭr mđing truh đĭ kyar 2 ênoh mrô, ba Khánh Hoà jing ƀuôn prŏng gưl dlông, bruă mkŏ mkra mâo bruă klam jing tur knơ̆ng. Khua knơ̆ng bruă mkŏ mkra čar Khánh Hoà Nguyễn Thành Phú brei thâo srăng mđĭ hnơ̆ng jăk klei čuăl mkă, mđĭ kyar hrăm mbĭt ƀuôn prŏng leh anăn bruă mkŏ mkra hluê êlan mrâo mrang, hơĭt kjăp, đru kơ mta kñăm mơ̆ng čar:

“Hmei srăng lŏ dơ̆ng gĭr, hŏng klei gĭr kđi čar ktang hĭn, kñăm hluê ngă dŭm bruă klam bruă Đảng čar, Bruă sang čư̆ êa čar jao, mta kñăm jing mđĭ hnơ̆ng jăk klei čuăl mkă, mđĭ kyar hrăm mbĭt ƀuôn prŏng leh anăn bruă mkŏ mkra, nao mbĭt hŏng mđĭ kyar bruă duh mkra mtah, bruă duh mkra êa ksĭ leh anăn bruă hiu čhưn ênguê mkŏ mjing boh kdrŭt kơ klei mđĭ kyar mbĭt kơ čar.”

Lăn Dap Kngư leh anăn Dhŭng kwar krah jing alŭ wăl knông lăn leh anăn plao ksĭ. Leh klei kƀĭn prŏng tal 14 mơ̆ng Đảng tŭ jing jăk siam, Thượng tướng Đỗ Xuân Tụng, Khua hlăm bruă Đảng gưl dlông, k’iăng khua kiă kriê anôk bruă kđi čar lĭng kahan yang ƀuôn Việt Nam  mâo leh mmông mă bruă hŏng Knơ̆ng gĭt gai lĭng kahan knông lăn čar Dak Lak, Thượng Tướng mñă kơ lĭng kahan knông lăn čar Dak Lak hyuă kjăp, hnưm ba hdră mtrŭn klei kƀĭn Prŏng tal 14 mơ̆ng Đảng hlăm ƀuôn hgŭm sĭt.

 “Tal êlâo hĭn srăng ksiêm dlăng, hyuă kjăp, bi klă hdră mtrŭn Klei kƀĭn prŏng tal 14 mơ̆ng Đảng, ngă jăk klei gĭt gai mơ̆ng Khua gĭt gai đảng jing 2 khăng , 2 mtrŭt mđĭ, 2 gang mkhư̆ leh anăn 5 kjăp. Khua gĭt gai Đảng Tô Lâm klah čŭn dŭm mta phŭn, ênưih hdơr ƀiădah kluôm dhuôm msĕ si mta phŭn gĭt gai hŏng lĭng kahan, hlăm anăn mâo lĭng kahan knông lăn.”

Dưi ƀuh, ai tiê klei kƀĭn prŏng tal 14 mơ̆ng Đảng dôk pral truh hlăm klei hdĭp hŏng dŭm hdră ngă bruă klă klơ̆ng, klă hŏng boh sĭt ti alŭ wăl, grăp mta bruă. Jih jang dôk bi kna hŏng ai êwa mơak Đảng, mơak yan mnga Bính Ngọ 2026.