Mơ̆ng tur knơ̆ng hnơ̆ng kčah, hnơ̆ng čuăn hrŏng ruah, Gia Lai mâo bi mklă mkŏ mjing klei bi kƀĭn. Hŏng akŏ “Gia Lai- Dap kngư truh kơ êa ksĭ”, thŭn hiu čhưn ênguê ala čar 2026 ba klei hâo hưn mkŏ plah wah dliê kmrơ̆ng leh anăn êa ksĭ, lăn čư̆ êa leh anăn knhuah dhar kreh, klei kriê pioh hŏng mđĭ kyar kjăp.

Hlue si Anôk mkŏ mjing, klei bi kƀĭn mĭn tĭng mâo 244 bruă ngă hiu čhưn ênguê, dhar kreh, mjuăt asei mlei mkŏ mjing hlăm jih thŭn, hŏng klei bi hgŭm mơ̆ng Phŭn bruă dhar kreh, mjuăt asei mlei leh anăn hiu čhưn ênguê, čar Gia Lai leh anăn 22 čar, ƀuôn prŏng hlăm kluôm ala; dŭm bruă ngă dưi pŏk ngă hlue si akŏ grăp gưl, rơ̆ng klei ngă nanao, lu jơr leh anăn jăk siam.