Mơ̆ng leh mkŏ mjing truh ară anei, găn leh 14 klei bi kƀĭn prŏng, Đảng păn kjăp nanao klei čiăng mơ̆ng bruă krŭ kdơ̆ng čiăng mâo hdră mtrŭn, Hdră êlan prŏng amâo mâo klei mkăn ôh êngao kơ kyua lăn čar, kyua mnuih ƀuôn sang. K’iăng nai prŏng, nai prĭn Nguyễn Viết Thông, Khua hđăp Êpul gơ̆ng hlak mblang gưl dlông brei thâo, hlăm Hră mtrŭn tal êlâo mơ̆ng Đảng thŭn 1930, Nguyễn Ái Quốc ba yua leh klei hlak mblang mơ̆ng Klei mĭn Mác Lênin hlăm klei găl boh sĭt Việt Nam lač klă leh ai tiê anei:

 “Hlăm klei bi kƀĭn mkŏ mjing Đảng bi mklă leh hră mơar phŭn klah čŭn, Hdruôm hră čih klah čŭn; Klei bhiăn klah čŭn; Hdră êlan klah čŭn mơ̆ng Đảng, dŭm hră mơar tal êlâo mkŏ mjing Hdră mtrŭn tal êlâo, lač klă, klei kñăm mơ̆ng Đảng jing kyua klei tŭ dưn kơ mnuih ƀuôn sang, leh anăn mơ̆ng anăn truh ară anei drei gĭr ktưn kơ klei kñăm prŏng prĭn anăn”.

40 thŭn êgao leh anăn  lu mnuih ăt dôk nanao klei ƀuh hlăm ai tiê mơ̆ng sa wưng arăng mưng pia jing “ênuk bao cấp”… Anăn jing sa wưng hƀuê ênuk yuôm bhăn mơ̆ng lăn čar hŏng klei yăl dliê amâo dưi wơr ôh. Leh anăn mơ̆ng ară anei, klei mlih mrâo găn leh lu knhuang êdah êdi.  Hlăm anăn, bi leh hdră êlan duh mkra mrâo, bi mlih bruă duh mkra ba yua klei bhiăn mâo klei gĭt gai mơ̆ng Knŭk kna. Nai prŏng - nai prĭn Tạ Ngọc Tấn,  K’iăng Khua Êpul gơ̆ng hlak mblang gyưl dlông brei thâo:

 “Anăn jing sa knhuang yuôm bhăn čiăng atăt kơ sa bruă kčah leh msĕ si: bi mklă Knŭk kna mâo klei dưi, bi mklă bruă klam yuôm bhăn mơ̆ng bruă mkŏ mjing ƀư̆ mkra Đảng, bi mklă klei yuôm bhăn kơ dhar kreh, mđĭ kyar bruă duh mkra mguôp hŏng klei mkŏ mjing, mđĭ kyar dhar kreh, hlue ngă hnơ̆ng mtăp mđơr ala ƀuôn… Dŭm klei hlak mblang yuôm bhăn snăn dưi ksiêm dlăng leh 20 thŭn mlih mrâo mơ̆ng Đảng”.

Klei bhiăn mkŏ mjing lăn čar hlăm ênuk truh kơ yang ƀuôn ngă phŭn (mbŏ, mđĭ kyar thŭn 2011) dưi bi mklă hlăm Klei bi kƀĭn XI mơ̆ng Đảng bi mklă klei kñăm truh krah êtuh thŭn 21: “Kluôm Đảng, jih jang mnuih ƀuôn sang brei gĭr mkŏ mjing ala čar jing sa ala čar tuh tia mkra mjing mrâo mrang, hlue si hdră yang ƀuôn ngă phŭn”. Spăn boh phŭn prŏng lač leh hlăm Hră mtrŭn 2011 mơ̆ng Đảng bi êdah klei thâo săng kluôm kơ “ala ƀuôn, yang ƀuôn ngă phŭn mơ̆ng mnuih ƀuôn sang drei mkŏ mjing” ăt krơ̆ng truh kơ ară anei. K’iăng nai prŏng, nai prĭn Nguyễn Trọng Phúc, Sang hră kđi čar ala čar Hồ Chí Minh bi mklă:

 “Mơ̆ng klei ksiêm dlăng hlak mblang boh sĭt leh anăn mđĭ kyar klei hlak mblang, boh nik klei hlak mblang kơ yang ƀuôn ngă phŭn leh anăn êlan truh kơ yang ƀuôn ngă phŭn Việt Nam hlăm hdră mlih mrâo snăn mbĭt anăn grăp knhuang hlue ngă klei mĭn hlak mblang, boh nik 10 klei bi mguôp prŏng mơ̆ng Klei bi kƀĭn tal 113 ksiêm dlăng leh, anăn jing klei tŭ jing kơ klei mkŏ mjing, ƀư̆ mkra Đảng kơ klei hlak mblang, klei mĭn”.

Hlăm boh sĭt klei găl dlông rŏng lăn mkŏ mjing klei tuh tia mkra mjing tal pă hŏng hnơ̆ng prŏng, hnơ̆ng pral leh anăn ka tuôm mâo ôh êlâo anăn, hŏng klei êdah êdi kơ kdrăp mrâo, klei hmăi kơ jih jang dŭm ala čar snăn mlih mrâo mbruă jing klei mĭn mlih mrâo hlăm hdră mđĭ kyar mơ̆ng jih jang dŭm ala čar.

 Klei tŭ jing mơ̆ng Klei bi kƀĭn phung bi ala kluôm ala tal XIV, jing gru kruăk knăl yuôm bhăn lŏ čuê 40 thŭn mlih mrâo, kruăk knăl wưng lŏ čuê mơ̆ng klei mlih mrâo, ñŭ kma, jing knhuang yuôm bhăn hlăm klei mđĭ kyar mơ̆ng lăn čar, hlăm anăn mlih mrâo mbruă jing boh kdrŭt, mă anak mnuih leh anăn dhar kreh jing tur, mă klei êngiê mguôp hŏng klei ñŭ kma êlam mjing klei ngă bruă. Anei jing wưng Việt Nam bi mklă klei čang hmăng gĭr ktưn, pŏk phai klei găl kơ klei thâo, mđĭ klei bi ktưn leh anăn mđĭ kyar pral, kjăp. Klei bi kƀĭn XIV amâo djŏ knŏng klei gĭr kđi čar ôh, ƀiădah jing ai tiê wưng ênuk, ai tiê ba Việt Nam mŭt hlăm ênuk mrâo msĕ si klei bi mklă mơ̆ng Khua gĭt gai Đảng Tô Lâm:

 “Klei bi kƀĭn phung bi ala kluôm ala tal XIV jing sa klei kđi čar yuôm bhăn mơ̆ng Đảng leh anăn djuê ana drei, jing sa klei kruăk knăl hƀuê ênuk mơ̆ng lăn čar hlăm ênuk Hồ Chí Minh, lač kơ klei bi klin hƀuê ênuk êbâo thŭn mkŏ mjing mơ̆ng djuê ana čiăng gĭr ktưn hlăm ênuk mrâo”.

Găn 96 thŭn mkŏ mjing leh anăn mđĭ kyar, mơ̆ng Hră mtrŭn tal êlâo truh kơ klei tŭ dưn prŏng prĭn mơ̆ng 40 thŭn mlih mrâo leh anăn kruăk knăl Klei bi kƀĭn tal XIV, Đảng drei kjăp nanao klei kñăm kyua čar kwar, kyua yang ƀuôn, amâo mdei mlih mrâo, ƀư̆ mkra čiăng gĭt gai lăn čar đĭ kyar. Hŏng klei čang hmăng gĭr ktưn kpưn đĭ hlăm ênuk mrâo, mă klei mlih mrâo mbruă mjing boh kdrŭt, mă anak mnuih leh anăn dhar kreh mjing tur knơ̆ng, Việt Nam kjăp knhuang mŭt hlăm êlan đĭ kyar prak, kjăp./.