Anei jing knhuang mprăp yuôm bhăn, rơ̆ng knăm mơak êngiê kơ mnuih ƀuôn sang dưi mkŏ mjing djŏ hdră bhiăn, êđăp ênang, bi mklă klei dưi leh anăn klei bi êdah kơ knŭk kna hlăm krĭng êa ksĭ, plao ksĭ yuôm bhăn mơ̆ng čar kwar. Hlue si klei hưn mdah mơ̆ng bruă sang čư̆ êa wăl Trường Sa, kluôm alŭ wăl mâo 21 anôk mplĕ hră. Truh ară anei, bruă mprăp dưi pŏk ngă hrăm mbĭt, djŏ hdră kčah, djŏ hdră bhiăn.

Kdrăp mnơ̆ng dưi mprăp djăp ênŭm, mâo 22 hip mplĕ hră phŭn, 16 hip mkăp hŏng jih jang hră mơar, anăn phung bi ala, hră mplĕ. Bruă bi trông, čih pioh anăn phung b ala kơ mnuih ƀuôn sang leh anăn phung mgơ̆ng ruah dưi hlue ngă kjăp, hưn mdah. Bruă hâo hưn mtô mblang dưi mđĭ ktang, đru kơ knuă druh, lĭng kahan leh anăn mnuih ƀuôn sang thâo săng êlam kơ klei mĭn kđi čar yuôm bhăn mơ̆ng klei ruah khua. Leh klei bi kƀĭn, khua gĭt gai wăl Trường Sa jao leh hip mplĕ, hră phung bi ala, hră mơar ruah khua kơ dŭm êpul ngă bruă klam. Dua boh kŭm păn kahan êa krĭng 4 kbiă leh mơ̆ng kdrŭn ksĭ Cam Ranh, čar Khánh Hòa, ba dŭm êpul mă bruă hŏng hip mplĕ hră nao truh ti dŭm anôk plao ksĭ ti Trường Sa.