Atăt hmei nao čuă dlăng dŭm anôk kdơ̆ng mblah 50 thŭn êlâo, kahan hđăp Đinh Nhiêu ti să Ia Yeng, kdriêk Phú Thiện, ăt hdơr nik hdră mblah ti ktuê êlan mrô 7. Hlăk anăn, ñu jing Trung đội trưởng Trung đội 2, C1, H11 hlăm Anôk bruă kahan čar Gia Lai - Kon Tum. Đinh Nhiêu yăl dliê: Leh kahan drei mtlaih êngiê Ƀuôn Ama Thuôt, êbeh 15 êbâo čô kahan roh đuĕ mơ̆ng Kon Tum lehanăn Pleiku găn lăn dap ti ktuê êlan mrô 7. Kahan roh mtŭk mtŭl tlă anăp hŏng klei ksŭng mblah ktang phĭt mơ̆ng kahan drei.

“Hlăk anăn kahan roh mâo sa êpul lu êdi ƀiădah gơ̆ mtŭk mtŭl, mmông anăn êdeh sar, kdrăp phao ktuang mtŭk mtŭl amâo mâo pô gĭt gai, mmông anăn phao ktuang, kdrăp mnơ̆ng lui hwiê jih hlăm êlan. Mnĭt mmông anăn kahan ƀuôn, jih jang kă čhiăm kô̆ ti kngan điâo, tơdah amâo mâo čhiăm kô̆ jing amâo djŏ kahan drei ôh.

Ktuê êlan mrô 7, dŭm krĭng msĕ si kban krông Bờ, kban Cây Sung, kčŭn čư̆ Tô Na… jing leh anôk huĭ hyưt êdi hŏng phung kahan roh. Kahan hđăp Ksor Chư, hlămTrung đoàn 48, Sư đoàn 320, kahan krĭng 3, mgei ai tiê lŏ hdơr kơ hdră mblah hlăk anăn:

“Hlăk anăn hmư̆ hing kahan phung roh đuê̆ ti ktuê êlan mrô 7, snăn êpul kahan pô nao kwang dar, mtuh phao ktuang. Mmông anăn hlăm êpul mâo ayŏng Tạ Tấn, khua bruă Đảng mtrŭn asăp kơ ayŏng Chư̆ mă êdeh nao đru dŏng mtlaih mnuih ƀuôn sang, kâo tŭ ư. Mmông anăn mgei ai tiê êdi, kâo mơak lehanăn ktưn hưn hlăk kâo dưi ngă sa bruă jăk êdi hlăm klei hdĭp pô.

Leh kahan drei kdơ̆ng mblah ktang phĭt, phung roh đuê̆ mtŭk mtŭl mŭt hlăm čư̆ dliê. Lu anôk, kahan roh čŏng pô mtam kă kngan, kbiă ti êlan dơ̆ng mrô 7 yơr hla čhiăm kô̆ kruh rai. Hlăm klei bi mĭn ƀuh mơ̆ng Đại tá Nguyễn Vi Hợi, Pô jhŏng ktang tang ƀuôn, jing kahan hđăp hlăm Trung đoàn 64, Sư đoàn 320, kahan krĭng 3, dŭm hruê mlan 3 thŭn 1975 hŏng dŭm hdră mblah ktang phĭt ƀiădah bŏ hŏng klei ktưn hưn.

“Hdră kdơ̆ng mbklah ktang phĭt êdi kâo tuôm nao anăn jing hruê 17 lehanăn 18 mlan 3, dua hrê anăn jing gang mkhư̆, bi kdơ̆ng hŏng êpul Quân đoàn 2 mơ̆ng Việt Nam Cộng hòa ti ktuê êlan mrô 7. Mmông anăn bi mklă nanao klei mĭn jing mtlaih êngiê kwar Dhŭng, hluh lir ala čar. Hlăk anăn, pô nao hlăm hdră mblah amâo bi mĭn ôh kơ klei djiê, săn asei, ti mmông êka, djiê gơ̆ djiê êka yơh, knŏng gĭr bi mguôp hŏng ƀĭng kahan kdơ̆ng mblah.

Hdră mblah ktuê êlan mrô 7 đru mguôp yuôm bhăn hlăm hdră kdơ̆ng mblah tŭ dưi Lăn dap kngư, pŏk klei găl čiăng kơ lĭng kahan lehanăn mnuih ƀuôn sang drei mtrŭt mđĭ Hdră kdơ̆ng mblah kluôm lehanăn krŭ kdơ̆ng yan mnga thŭn 1975, mtlaih êngiê kwar Dhŭng, hluh lir ala čar. 50 thŭn êgao leh, ktuê êlan mrô 7 – ktuê êlan ƀuh leh dŭm hdră kdơ̆ng mblah ktang phĭt, ară anei jing leh êlan dơ̆ng prŏng mrô 25, sa ktuê êlan phŭn mkŏ Gia Lai hŏng dŭm čar krĭng kwar Krah. Rah Lan Chung, Khua Anôk bruă sang čư̆ êa čar Gia Lai, lač kơ hdră mđĭ kyar mơ̆ng alŭ wăl ti ktuê êlan anei.

“Êlan dơ̆ng prŏng mrô 25 – êlan mrô  7 mrâo êgao dưi mkra mđĭ, ară anei ktuê êlan anei dưi mkŏ hŏng čar Phú Yên. Hlăm hdră čuăl mkă lehanăn tă hdră êlan mđĭ kyar mơ̆ng dŭm čar nao găn ktuê êlan anei mâo Phú Thiện, Ayŭn Pa, Krông Pa snăn hdră mđĭ kyar dŭm anôk anei gơ̆ siă suôr hŏng ktuê êlan anei. Krĭng anei ară anei mâo rŭ mdơ̆ng leh dŭm krĭng ƀuôn prŏng. Klei hdĭp mčhĭt mơuăt lehanăn mâo klei đĭ kyar mkă hŏng dŭm thŭn êlâo, mnuih ƀuôn sang hơ̆k mơak, mâo klei hrăm mbĭt mơ̆ng Đảng, Knŭk kna čiăng hluê ngă hdră êlan mđĭ kyar bruă duh mkra, mđĭ hĭn klei hdĭp mda.

          Krĭng lăn Cheo Reo ară anei mâo leh lu klei bi mlih. Klei mtah mda mơ̆ng ana boh kroh hŏng dŭm boh sang kjăp ênuk mrâo ƀrư̆ lăm leh jih gru êka mơ̆ng boh ƀom, min, săp mtuh, ƀrư̆ dôk bi mlih jing krĭng phŭn mơ̆ng hdră duh mkra Ngŏ Dhŭng čar Gia Lai./.