Gŏ sang K’Phân, đảng viên ti alŭ 3, să Đinh Trang Thượng, kdriêk Di Linh jing sa hlăm dŭm gŏ sang nao êlâo pla mjing kphê hnơ̆ng tŭ jăk. Hŏng 3ha kphê, thŭn mrâo anei hŏ sang ñu mâo 17 tôn kphê asăr, mâo hrui wĭt dŭm êlai prăk. Amâo djŏ knŏng bi mdrŏng kơ gŏ sang pô, K’Phân lŏ hur har đru kơ mnuih ƀuôn sang mkra mlih kphê leh mduôn, mtô grep mjeh mrâo čiăng mđĭ hnơ̆ng leh anăn ênoh.

 “Kphê leh mduôn boh knŏng ƀiă, srăng grep mjeh mrâo. Kphê grep čiăng mâo êa djăp, hbâo pruê kơh ana dưi čăt đĭ. Hlăm anăn, krih êa ƀiă êdi 3 blư̆, pruê hƀâo 4 blư̆, krih êa drao 2 blư̆ hlăm sa thŭn, kphê dưi mâo boh. Mơ̆ng grep mjeh mrâo kah knar grăp thŭn pô hrui wĭt truh 15 tôn.

Hŏng bruă lŏ hma găl guôp, mâo dŭm ana pla mjing mâo ênoh msĕ si kphê, durian, kruê̆ dŭng, ana rông hluăt mă mrai…ênoh mkra mjing ti Đinh Trang Thượng amâo mâo mdei dưi mđĭ. Thŭn 2024 kah knar grăp ha lăn tinei brei ba wĭt 125 êklăk prăk, hnư hrui wĭt kah knar grăp čô 47 êklăk prăk, mâo 104% hdră kčah hluê si hdră mtrŭn bruă đảng să ba mdah leh.

Hluê si K’Đức, khua bruă đảng alŭ 2, să Đinh Trang Thượng, sa hlăm dŭm mta phŭn yuôm bhăn đru kơ alŭ wăl mâo klei đĭ kyar ktang hlăm wưng êgao jing bruă klam bi hmô mơ̆ng phung đảng viên. Hlăm alŭ mâo êbeh 200 gŏ sang, hlăm anăn mâo 17 čô đảng viên nao êlâo hlăm klei mđĭ kyar bruă duh mkra.

 “Ngă klei gĭt gai bruă mơ̆ng Đảng nah dlông, anôk bruă mtrŭt mđĭ bruă grep kphê, phung đảng viên hlăm alŭ mâo klei bi hmô, bi lar bruă klam nao êlâo hlăm bruă hluê ngă leh anăn ba wĭt boh tŭ dưn jăk êdi, klei hdĭp mnuih ƀuôn sang dưi mđĭ hĭn, mâo klei găl kriê dlăng, rông ba anak čô nao sang hră. Êngao kơ grep kphê, mnuih ƀuôn sang hlăm alŭ lŏ pla pluă lu ana pla mjing msĕ si boh ƀơr, durian, makka, mơ̆ng anăn boh tŭ dưn ƀrư̆ hruê ƀrư̆ mđĭ hĭn”.

K’Đô, K’iăng khua bruă đảng, khua bruă sang čư̆ êa să Đinh Trang Thượng brei thâo, mơ̆ng wưng ênoh kphê êlưih, să ba mdah leh hdră mtrŭn kơ bruă mkŏ wĭt ana pla mjing, mtrŭt mjhar dŭm klei bi hmô mđĭ kyar bruă mkra mjing mrâo msĕ si pla ana rông hluăt, pla djam mtam, yua mjeh jăk. Boh  nik, bruă klam mơ̆ng đảng viên jing yuôm bhăn hlăm bruă hâo hưn, mtô kơ mnuih ƀuôn sang dưn yua klei mrâo mrang hlăm bruă mkra mjing. Hlăm thŭn 2025 anei, mbĭt hŏng bruă mtrŭt mđĭ dŭm hdră mđĭ kyar bruă lŏ hma hluê êlan mkăp, să mtrŭt mjhar mđĭ kyar bruă pla mjing kphê doh čiăng mđĭ hnơ̆ng tŭ jăk mnơ̆ng dhơ̆ng, bi mguôp hŏng dŭm knơ̆ng bruă hrui blei čiăng rơ̆ng klei hơĭt kơ ƀĭng ngă lŏ hma. Gĭr bi hrŏ hnơ̆ng gŏ sang ƀun 2%, mđĭ hnư hrui wĭt kah knar grăp čô mâo 55 êklăk prăk. K’Đô brei thâo:

 “Ti gŭ klei gĭt gai bruă bruă đảng nah gŭ leh anăn klei hrăm mbĭt mơ̆ng bruă kđi čar, lu phung đảng viên bi hmô hlăm klei mđĭ kyar bruă duh mkra. Mơ̆ng anăn mnuih ƀuôn sang bi hluê ngă, đru mtrŭt mđĭ bruă duh mkra ala ƀuôn mơ̆ng alŭ wăl. Đinh Trang Thượng ăt mtrŭt mjhar mnuih ƀuôn sang hlăm bruă lăm lui sang dôk êjai hlăm thŭn 2024 dưi lăm lui 16 boh sang. Hlăm thŭn 2025 anei srăng lŏ dơ̆ng lăm lui 18 boh sang, hmei gĭr ngă êlâo kơ klei kƀĭn kluôm bruă Đảng, hlăm mlan 5/2025 srăng bi leh”.

Hŏng hdră tă găl guôp, klei hrăm mbĭt sa ai mơ̆ng bruă Đảng čar, bruă sang čư̆ êa leh anăn mnuih ƀuôn sang, Đinh Trang Thượng dôk ƀrư̆ ƀrư̆ kpưn đĭ, jing sa hlăm dŭm să krĭng ƀuôn sang mrâo bi hmô mơ̆ng kdriêk Di Linh. Ară anei să Đinh Trang Thượng dôk lŏ dơ̆ng bi lar bruă klam mơ̆ng Đảng viên, mđĭ bruă ba jao kdrăp mrâo, hdră mnêč, mtrŭt mđĭ bruă mkra mjing hluê êlan hơĭt kjăp, đru mkŏ mjing ƀuôn sang ƀrư̆ hruê ƀrư̆ mlih mrâo, gĭr mâo boh tu dưn hĭn čiăng tŭ drông Klei kƀĭn kluôm bruă Đảng tal 14.