Ƀuôn Gia Xiêng să knông lăn Rờ Kơi, kdriêk Sa Thầy, čar Kon Tum mâo giăm 300 gŏ sang hŏng êbeh 1.000 čô mnuih, lu jing mnuih djuê ana Xơ Đăng. A Thể, Khua bruă Đảng ƀuôn – Khua ƀuôn Gia Xiêng, brei thâo, leh mkŏ mjign tŭ jing klei bi kƀĭn bruă Đảng ƀuôn hlăk mlan 11 thŭn dih, 14 čô đảng viên hlăm êpul bruă Đảng ƀuôn mâo jao bruă mdê mdê, pioh mtrŭt mjhar mnuih ƀuôn sang bi mlih war pla mtŭk mtŭl, lehanăn đru kơ 8 gŏ sang ƀun hlăm ƀuôn mđĭ kyar klei hdĭp mda:

Êpul bruă Đảng ƀuôn mâo leh hdră mtrŭn, lehanăn bi kƀĭn ƀuôn pioh hlue ngă bi sa ai mbĭt. Kơ klei duh mkra dlăng kriê dŭm mta mnơ̆ng pla, mnơ̆ng rông. Mtrŭt mnuih ƀuôn sang mâo dŭm lăn sah mba bi mlih mnơ̆ng pla, mjut mjing bruă pla mjing ana boh durian, ana mắc ca lehanăn dŭm mta ana pla mjing mkăn. Gŏ sang dleh dlan, phung amâo mâo anôk jưh knang, snăn jih jang mnuih ƀuôn sang bi đru kơ digơ̆. Yuôn hĭn jih jang mnuih ƀuôn sang thâo bi mguôp sa ai hŏng êpul bruă Đảng ƀuôn”.

Bruă Đảng să knông lăn Rờ Kơi, kdriêk Sa Thầy mâo 13 êpul bruă Đảng nah gŭ, hŏng 176 čô đảng viên, hlăm anăn mâo 6 êpul bruă Đảng ƀuôn mnuih djuê ƀiă. Leh jih jang êpul bruă Đảng mkŏ mjing klei bi kƀĭn tŭ jing, hlăm 2 hrue   9 lehanăn 10/1/2025 bruă Đảng să mkŏ mjing klei bi kƀĭn prŏng Đảng gưl 18, wưng păn bruă 2025-2030.

Hdră mtrŭn mơ̆ng klei bi kƀĭn prŏng Đảng să Rờ Kơi bi klă leh wưng păn bruă mrâo mdĭ kyar klei duh mkra kah knar grăp thŭn bi mâo êbeh 14%; hnơ̆ng ênoh gŏ sang ƀun grăp thŭn hrŏ mơ̆ng 5-6%; truh thŭn 2030 să djăp kah knar ênoh mâo ba wĭt grăp čô mnuih jing 68 êklăk prăk… Mai Nhữ Nam, k’iăng khua bruă Đảng, Khua să Rờ Kơi, brei thâo, leh mkŏ mjing klei bi kƀĭn prŏng mâo klei tŭ jing, bruă Đảng să pral hlue ngă mtam dŭm hdră êlan mă bruă kñăm čiăng bi leh jih jang ênoh čuăn mđĭ kyar klei duh mkra ala ƀuôn:

 “Êpul khua kiă kriê bruă Đảng pral mtrŭnj mtam dŭm mta bruă, tui si klei bi tŭ ư mơ̆ng hdră mtrŭn hlăm klei bi kƀĭn prŏng, amâo lŏ bi kdung ôh. Jao bruă kơ grăp êpul bruă Đảng, lehanăn hlue ngă jih jang bruă truh hŏng nah gŭ, boh nik hŏng mnuih ƀuôn sang thâo săng lehanăn păn kjăp hdră mtrŭn. Hlue ngă hdră mtrŭn bi mlih mnơ̆ng pla mtŭk mtŭl, lăm lui sang tĭ ƀrôč, bi mlih mnơ̆ng pla mơ̆ng ƀiă hrue nao kơ ana pla mjing sui thŭn”.

Tui si hdră bruă Đảng kdriêk Sa Thầy mâo bruă Đảng čar Kon Tum ruah mkŏ mjing klei bi kƀĭn prŏng bi hmô ruah hlăm akŏ wưng 3 mlan tal dua thŭn  2025. Kyuanăn truh hrue 27/2 mrâo bi leh jih jang 11 să, wăl krah hlăm kdriêk, mâo bi leh bruă mkŏ mjing klei bi kƀĭn prŏng Đảng wưng păn bruă 2025-2030. Klei bi kƀĭn prŏng mâo ruah leh 160 čô khua hlăm êpul bruă, 55 čô khua hlăm êpul kiă kriê bruă Đảng, 11 čô khua bruă Đảng lehanăn 22 čô k’iăng khua bruă  Đảng.

Aduôn Y Sâm, K’iăng khua bruă Đảng kdriêk, Khua êpul gơ̆ng bruă ƀuôn sang kdriêk sa Thầy, brei thâo, hlue ngă kleiklah čŭn mrô 127, hrue 28/2/2025 mơ̆ng phŭn bruă kđi čar, êpul khua kia kriê, bruă Đảng bộ kdriêk Sa Thầy mdei êjai jih jang bruă mkŏ mjing klei bi kƀĭn prŏng, amâo mâo ôh klei kăp mđing, dôk guôn klei dăp wĭt êpul kiă kriê bruă kđi čar, ƀiădah ăt hlue ngă tui si mta kčah čuăn:

 “Hmei dưn yua jih klei găl, klei dưi mơ̆ng alŭ wăl. Jih jang bruă mâo klei tŭ lŏ dơ̆ng ngă. Mbĭt hŏng anăn lŏ dơ̆ng iêo mthưr phung duh bi liê čiăng mđĭ kyar kdriêk. Bi hŏng bruă mkŏ mjing Đảng hmei mđing kơ bruă mkŏ mjing hlăm nah gŭ hŏng klei doh mngač, kjăp ktang, lehanăn mđing truh kơ bruă mjuăt bi hriăm, êpul knuă druh  mơ̆ng gưl kdriêk hlŏng truh kơ nah gŭ, bi năng hŏng klei čiăng hlăm bruă mrâo”.

Hlue ngă klei klah čŭn mrô 127, hrue 28/2/2025 mơ̆ng phŭn bruă kđi čar, êpul khua kiă kriê bruă Đảng čar Kon Tum ară anei gĭt gai leh mdei êjai bruă mkŏ mjing klei bi kƀĭn prŏng Đảng gưl să, gưl kdriêk wưng păn bruă 2025-2030.Mbĭt hŏng klei hlue ngă kjăp hdră êlan mơ̆ng gưl dlông, hŏng bruă Đảng să, wăl krah hlăm čar Kon Tum mâo mkŏ mjing leh klei bi kƀĭn prŏng hlăk dôk ngă jih ai tiê kñăm bi leh dŭm mta kñăm kơ klei mđĭ kyar bruă duh mkra ala ƀuôn. Mâo ai tiê klei uêñ klam, mđrĭng hŏng klei dŭm êpul bruă Đảng, bruă sang čư̆ êa lehanăn mnuih ƀuôn sang mjing klei găl pioh bi leh bruă mđĭ kyar, đru mđĭ klei hdĭp mda mnuih ƀuôn sang, lehanăn mđĭ kyar kjăp hlăm alŭ wăl./.