Blŭ hrăm bi ruĕ klei bi kƀĭn, Khua bruă kƀĭn ala Vương Đình Huệ brei thâo, ti anôk bi kƀĭn anei, dhar bruă gĭt gai bruă kƀĭn ala mâo leh dŭm klei blŭ lač kơ djăp mta bruă prŏng, adôk mâo lu klei blŭ mdê mdê, msĕ si kơ bruă mkra hdră bhiăn răng mgang yang ƀuôn, hdră bhiăn răng mgang kơ mnuih blei yua mnơ̆ng lŏ mlih mrâo, hdră bhiăn ngă bruă hŏng điện tử lŏ mlih mrâo, jih 3 mta hdră bhiăn anei djăp leh klei găl akâo mă klei blŭ mơ̆ng phung bi ala bruă kƀĭn ala.

Dhar bruă gĭt gai bruă kƀĭn ala mâo bi mklă leh klei ktrâo atăt hlue ngă jih jang boh phŭn mơ̆ng klei bi kƀĭn bruă kƀĭn ala, lehanăn dŭm hdră mtrŭn kơ bruă čuăn, klei dưi mkŏ dăp, êpul khua kiă kriê. Hŏng djăp mta bruă djŏ tuôm kơ klei mkŏ mjing alŭ wăl mrâo tal anei mâo mkŏ mjing sa ƀuôn prŏng, 2 wăl krah, 34 boh ƀuôn hgŭm, 11 boh wăl krah hlăm kdriêk ƀuôn prŏng, mâo klei lŏ bi klin lu boh să dôk hlăm 10 boh čar. Khua bruă kƀĭn ala mñă anei jing knhuang yuôm bhăn čiăng bi leh bruă mkŏ mjing bruă sang čư̆ êa alŭ wăl djŏ tui si hdră mtrŭn mơ̆ng gưl dlông kơ klei mđĭ kyar ƀuôn prŏng./.