Čar Kon Tum leh anăn 2 čar Attapư, Sê Kông ala čar Lào mâo êlan knông lăn mbĭt hŏng boh taih êbeh 154 km. Êbeh 3 thŭn êgao, 3 čar hluê ngă hră bi hdơr kơ klei bi mguôp bruă mặt trận leh anăn mâo lu boh tŭ dưn jăk. Êdah hĭn jing bruă hâo hưn, mđĭ klei thâo săng mnuih ƀuôn sang 3 čar hlăm bruă gang mkhư̆ klei ruă tưp Covid-19, thŭn bi mguôp Việt Nam – Lào 2022, mbĭt hŏng anăn jing bruă hluê ngă tŭ dưn bruă bi mguôp tui duah, kkuai mă, bi mklin 129 klang lĭng kahan djiê êngiă, lĭng kahan ba anăp leh anăn phung thơ̆ng kơ bruă Việt Nam djiê ti Lào. Mkŏ mjing êlan knông lăn êđăp ênang, bi mguôp, bi hgŭm leh anăn đĭ kyar…

Hlăm klei kƀĭn trông, Dhar bruă mặt trận čar Kon Tum mbĭt hŏng dhar bruă Dhar bruă mặt trận Lào mkŏ mjing lăn čar 2 čar Attapư leh anăn Sê Kông bi kah mbha leh kơ klei hriăm bruă mặt trận, tŭ ư lŏ dơ̆ng kriê pioh leh anăn mđĭ kyar klei mjĕ giăm siă suôr, đăo knang. Mặt trận čar kwar 3 čar lŏ dơ̆ng bi mguôp kjăo hlăm bruă kah mbha klei hriăm bruă mặt trận, mđĭ klei bi mguôp hlăm bruă duh mkra mnia mblei, kreh knhâo mrâo mrang, mtrŭt mjhar mnuih ƀuôn sang 2 lăn čar hluê ngă hdră êlan bi mguôp djuê ana hlăm bruă mkŏ mjing leh anăn răñg mgang grăp lăn čar.