Aguah mbruê 19/2. Ti ƀuôn prŏng Pleiku, čar Gia Lai, Binh đoàn 15 mkŏ mjing knăm bi hdơr 40 thŭn hruê knhuah gru binh đoàn. Hlăm 40 thŭn êgao, Binh đoàn 15 ngă hrăm mbĭt bruă klam bruă duh mkra leh anăn bruă lĭng kahan. Ară anei anôk bruă kriê dlăng êbeh 44.295ha ksu leh anăn giăm 400 ha mdiê, djam mtam boh kroh, mbĭt hŏng 6 sang măi mkra mjing ktăk ksu hŏng hnơ̆ng 55.000 tôn hlăm sa thŭn.

Binh đoàn  đru mguôp leh êbeh 2.800 êklai prăk hlăm ngăn prăk knŭk kna, mkŏ mjing bruă mă hơĭt kơ 16.000 čô, hlăm anăn 60% jing mnuih djuê ƀiă. Nao mbĭt hŏng mđĭ kyar bruă duh mkra, Binh đoàn 15 lŏ kñăm kơ bruă čung ba mnuih ƀuôn sang, đru kơ mnuih ƀuôn sang tlaih ƀun, mkŏ mkra krĭng ƀuôn sang mrâo. Anôk bruă đru rŭ mdơ̆ng leh anăn mkra wĭt 1.500 km êlan klông, 400 km klei pui, mbĭt hŏng lu sang kƀĭn yang ƀuôn, sang hră mơar, sang êa drao.