Anôk bruă ktuê dlăng, gĭt gai ƀuôn prŏng thâo mĭn Dak Lak (pia klah cŭn Dak Lak IOC) ngă bruă mơ̆ng mlan 9/2021. Leh 2 thŭn ngă bruă, ba yua Dak Lak online mâo giăm 30 êbâo gưl dưm hlăm ƀĭng ƀlŭ. Mbah hâo hưn http://tuongtaccongdan.daklak.gov.vn/ hưn boh tŭ msir mgaih klei mâo lu mnuih ƀuôn snag mđing dlăng. Amai Trần Lệ, ƀuôn hgŭm Thắng Lợi, ƀuôn prŏng Ƀuôn Ama Thuôt lač:

 “Kdrăp anei mkŏ dưm ênưih, tơdah pŏk dlăng ênưih snăk. Kơ klei tŭ dưn snăn mâo lu klei jăk. Sitôhmô camera online. Ară anei mâo phung dleh dlan tơdah nao ngă hră mơar kơ bruă knŭk kna, kyua mâo kdrăp anei pô dưi ba hră mơar leha năn dŭm anôk bruă online srăng mă hră mơar leh anăn msir mgaih, pô thâo kơ hnơ̆ng msir mgaih hră mơar si ngă. Mnuih ƀuôn sang yua kdrăp anei snăn ƀuh tŭ dưn dưi ktuê dlăng bruă ngă mơ̆ng dŭm anôk bruă”

Võ Nguyễn Hoàng Nam, K’iăng Khua anôk bruă IOC čar Dak Lak brei thâo, truh ară anei, anôk bruă bi leh leh anăn ba yua êbeh 450 camera thâo mĭn ti lu anôk hlăm ƀuôn prŏng Ƀuôn Ama Thuôt leh anăn đa kdriêk, wăl krah hlăm čar. Klei hâo hưn mơ̆ng dŭm camera dưi mkŏ ênoh mrô kơ anôk bruă ktuê dlăng ƀuôn prŏng thâo mĭn ti čar. Êngao anăn, kdrăp mrâo mơ̆ng anak mnuih dưi bi klin hlăm hdră hâo hưn 1022 leh anăn 10 hdră bruă čiăng êdi. Dŭm hdră anei tal êlâo dưi mđĭ lar bruă klam jing tur phŭn kơ klei mkŏ mjing ƀuôn prŏng thâo mĭn. Nguyễn Võ Hoàn Nam brei thâo:

          “Hdră bruă ƀuôn prŏng thâo mĭn jing hdră bi blŭ hrăm plah wah bruă sang čư̆ êa hŏng mnuih ƀuôn sang, čiăng kơ mnuih ƀuôn sang mâo hdră bi blŭ hrăm klă hŏng bruă sang čư̆ êa srăng kƀĭn hlăm bruă lač kơ klei akâo mơ̆ng mnuih ƀuôn sang, klei phung ƀuôn sang êmuh lač kơ klei êđăp ênang hlăm êlan klông, wăl hdĭp mda, kơ ya klei mâo riêng gah ka djŏ hlue si hdră kčah snăn mnuih ƀuôn sang srăng lač hŏng Anôk bruă IOC”

 Hdră bruă anei ƀrư̆ mâo lu klei mnuih ƀuôn sang mơ̆ng djăp anôk mơĭt. Mơ̆ng anăn, khua gĭt gai dŭm anôk bruă mđing hmư̆ klei mĭn mnuih ƀuôn sang, anôk bruă duh mkra, ktuê dlăng bruă knuă leh anăn msir mgaih, mñă kơ dŭm anôk bruă. Trần Xuân Tiệp, K’iăng Khua Adŭ bruă Knơ̆ng bruă sang čư̆ êa kdriêk Čư̆ M’Gar brei thâo:

 “Bruă bi hgŭm plah wah alŭ wăl leh anăn knơ̆ng bruă hâo hưn mtô mblang mđĭ lar klei jăk. Đa đa klei mnuih ƀuôn sang lač dưi mơĭt kơ IOC lŏ ba wĭt kơ alŭ wăl leh anăn hưn hŏng dŭm alŭ wăl hmao msir mgaih”.

Hlue si Trương Hoài Anh, Khua Knơ̆ng bruă hâo hưn mtô mblang čar Dak Lak, Anôk bruă, ktuê dlăng gĭt gai ƀuôn prŏng thâo mĭn čar Dak Lak đru kơ bruă gĭt gai leh anăn msir mgaih bruă knuă mơ̆ng dŭm anôk bruă klă mngač, pral, tŭ dưn. Mbĭt anăn jing kban mkŏ bruă bi hgŭm dua nah tơdah mnuih ƀuôn sang dưi mơĭt klei blŭ, hưn mthâo amâodah lač kơ dŭm anôk bruă Knŭk kna kơ klei djŏ tuôm kơ klei êđăp ênang, hdră bruă ti čar. Čiăng bi leh hdră bruă ênoh mrô ti anôk bruă, Trương Hoài Anh brei thâo:

         “Mtrŭt mjhar dŭm alŭ wăl mâo klei găl srăng grăp knhuang bi liê čiăng mâo anôk bruă IOC hjăn pô čiăng hlai mbĭt hŏng IOC ti čar čiăng si bĕ ngă djŏ klei gĭt gai leh anăn klei hgŭm kriê dlăng knŭk kna mơ̆ng mnuih ƀuôn sang leh anăn anôk bruă duh mkra ti čar”./.