9 mlan êgao, grăp mlan, ayŏng Nguyễn Văn Tiến, knuă druh Adŭ bruă Đảng să Ƀuôn Triă, kdriêk Lăk, čar Dak Lak mkuôm 10 êbâo prăk hlăm “Keh mkiêt mkriêm hluê ngă Asăp Awa” mơ̆ng anôk bruă. Ayŏng brei thâo, ênoh prăk amâo lu, hdră ênưih ngă ba wĭt leh boh tŭ klă sĭt.

Kâo ƀuh hdră Keh mkiêt mkriêm hluê ngă Asăp Awa anei ba wĭt boh tŭ êdi, mâo jih jang đảng viên hlăm anôk bruă lehanăn phung đảng vien ti dŭm alŭ ƀuôn sa ai hluê ngă. Msĕ si đảng viên mda asei si hmei grăp mlan mguôp 10 êbâo prăk.

          Keh mkiêt mkriêm hluê ngă asăp Awa jing boh tŭ hdră bi ktưn “Mkiêt mkriêm hluê ngă asăp Awa” mâo Anôk kriê dlăng bruă Đảng ti Lăk pŏk ngă lu thŭn êgao čiăng đru kơ mnuih dleh dlan. Hluê anăn, grăp čô knuă druh, đảng viên, đoàn viên, mnuih mă bruă hlăm kdriêk 3 hruê mkiêt mkriêm ƀiă êdi 1 êbâo prăk; đoàn viên, mnuih mă bruă nah gŭ mkiêt mkriêm 10 hruê ƀiă êdi 1 êbâo prăk. Keh anei mâo Anôk bruă kiă kriê klei hâo hưn kdriêk kriê dlăng. Đào Thị Thanh An, K’iăng khua bruă Đảng kdriêk Lăk brei thâo, hŏng hdră ngă anei, hlăm 9 thŭn êgao, kluôm kdriêk mâo mkiêt mkriêm leh giăm 3 êklai prăk, đru kơ dŭm êtuh čô mnuih dleh dlan jing gŏ sang knŭk kna dlăng ba, đảng viên, mnuih amâo anôk jưh knang, phung ruă duah ktrŏ.

“Čiăng kơ hdră anei ƀrư̆ hruê ƀrư̆ đĭ lar ba wĭt boh tŭ dưn klă sĭt, đru mđĭ lar klei khăp hlăm êpul êya yang ƀuôn ăt msĕ mơh bi đru klam klei dleh dlan hŏng yang ƀuôn kơ mnuih amâo anôk jưh knang, ruă duam ktrŏ čiăng diñu lŏ mâo klei gĭr hlăm klei hdĭp, hdĭp m’ak hĭn.

          Mbĭt hŏng kdriêk Lăk, gru hmô “Mkiêt mkriêm hluê ngă asăp Awa” mâo mđĭ lar, krơ̆ng kjăp ti lu alŭ wăl msĕ si Čư̆ Mgar, Čư̆ Kuiñ, Krông Ana, Krông Bông, Krông Buk, Krông Pač lehanăn Mdrak mơ̆ng čar Dak Lak. Hlăm 2 thŭn êgao, gru hmô anei mkiêt mkriêm leh êbeh 10 êklai prăk, mơ̆ng anăn đru rŭ mdơ̆ng 89 boh sang dôk, 2 boh sang kơ phung nai tô, mđup brei dŭm êtuh hnư mnơ̆ng kơ gŏ sang knŭk kna dlăng ba, mnuih mâo bruă tŭ dưn.

Dŭm alŭ wăl mâo leh hdră mkiêt mkriêm jăk, mâo klei hgŭm mơ̆ng lu phung knuă druh đảng viên lehanăn mnuih mă bruă. Êdah êdi dŭm gru hmô “Hluê ngă hdră mkiêt mkiêm đru kơ đảng viên mâo klei hdĭp dleh dlan” mơ̆ng bruă Đảng ƀuôn prŏng Ƀuôn Ama Thuôt, “Mkŏ mkra hdră bi mdoh wăl hdĭp mda ti sang hră” mơ̆ng bruă Đảng kdriêk Čư̆ Mgar, “Hră mkiêt mkriêm” mơ̆ng bruă Đảng wăl krah Ƀuôn Hô…

Phạm Minh Tấn, K’iăng khua bruă Đảng čar Dak Lak tĭng dlăng, anei jing bruă ngă klă sĭt lehanăn tŭ dưn hlăm bruă hluê ngă Asăp Awa, mkiêt mkriêm mơ̆ng nah gŭ.

“Tui hriăm lehanăn hluê ngă knhuah mngač Hồ Chí Minh jịng bruă ngă nanao. Bruă Đảng čar gĭt gai leh kjăp mơ̆ng gưl nah gŭ, mơ̆ng grăp čô đảng viên brei hluê ngă kjăp knhuah mngač mơ̆ng Awa jing bruă ngă nanao hlăm grăp hruê, grăp mlan čiăng kơ grăp čô dưi kma lehanăn hluê ngă jing sa hdră bruă čŏng pô ngă, ba wĭt boh tŭ dưn klă sĭt, wăt hlăm dŭm bruă điêt amâo dạh prŏng, hlăm bruă bi đru msir klei ư̆ êpa bi hrŏ klei ƀun knap, mkŏ mkra krĭng ƀuôn sang mrâo, bi leh jih bruă klam mâo kčah jao.

           Amâo djŏ knŏng jing hdră bruă “Mkiêt mkriêm hluê ngă asăp Awa” jng leh bruă bgă nanao mâo phung knuă druh, đảng viên lehanăn mnuih ƀuôn sang ti Dak Lak čŏng pô hluê ngă. Hdră ngă ênưih lehanăn mâo ai lar bra, ba wĭt leh klei m’ak kơ lu mnuih hŏng dŭm boh sang prŏng siam, klei đru hlăm mmông dleh dlan. Bruă anei mđĭ lar leh knhuah gru “thâo khăp čiăng, thâo bi đru” jăk siam mơ̆ng djuê ana, jing hdră ngă klă sĭt čiăng tui hriăm lehanăn hluê ngă gru mngač Hồ Chí Minh./.