Hluê si klei hưn, 9 mlan thŭn 2023 mâo 6,87% lu hĭn ti krĭng Lăn Dăp Kngư. Ƀiădah đa đa hnơ̆ng čuăn ăt mâo knŏng ƀiă, klă klơ̆ng msĕ si: Hnư knŭk kna hrui wĭt hlăm brô 2.400 êklai prăk (knar hŏng 54,27% klei tĭng mkă) brei čan duh bi liê bruă knŭk kna êbeh 1.300 êklai prăk, mâo hlăm brô 35% hdră kčah. Klei kƀĭn kñăm bi trông, bi klă boh tŭ dưn dưi mâo, ktrâo klă dŭm klei dleh kpăk, bi klă bruă klam mơ̆ng grăp čô khua êmua, khua kiă kriê leh anăn êpul êya dŭm anôk bruă, alŭ wăl hŏng dŭm klei êdu awăt.

Hluê si Dương Văn Trang, Khua Bruă Đảng čAr Kon Tum: tlâo mlan adôk boh klei brei čan srăng gĭr gĭt gai, ktrâo lač. Tơdah amâo mâo dưi brei čan, tal êlâo hĭn phung khua bruă Đảng bruă sang čư êa čar srăng đua klam. Khua kiă kriê knơ̆ng bruă hdră êlan leh anăn duh bi liê jing anôk bruă đru kčĕ đru bruă, mtrŭt mjhar leh anăn knhal tuč jing pô duh bi liê srăng đua klam kơ boh klei anei.