Khua Bruă kƀĭn ala Trần Thanh Mẫn brei thâo anei jing gru kruăk knăl yuôm bhăn hlăm hdră mkŏ mjing hdră bhiăn, jing klei yuôm bhăn duh kơ bruă bi khuăt êpul mă bruă mơ̆ng bruă kđi čar leh anăn hmao ruh mgaih klei dleh dlan, gun kpăk kơ klei bhiăn, hdră êlan, mjing klei êdah kdlưn čiăng bi leh anôk bruă nah gŭ, mđĭ lar klei găl, mjing anôk đĭ kyar mrâo kơ alŭ wăl leh anăn kluôm ala. Bruă mnuih mă bruă ăt dưi hlue ngă kjăp, hlue si klei bhiăn mơ̆ng Đảng, hdră bhiăn Knŭk kna, mâo klei tŭ ư, sa anăn mơ̆ng phung bi ala bruă kƀĭn ala.

Khua Bruă kƀĭn ala Trần Thanh Mẫn mtă kơ Knŭk kna gĭr hĭn čiăng mkŏ mjing hdră kčah, hră mơar kčah klă boh phŭn mâo jao hlăm klei bhiăn leh anăn hdră mtrŭn mơ̆ng Bruă kƀĭn ala; dŭm anôk bruă mjêč ksiêm dlăng čiăng mkra mlih, mbŏ dŭm boh phŭn klă klơ̆ng hlăm hră mơar hlue si hdră bhiăn djŏ tuôm kơ klei ƀi khuăt êpul mă bruă brei msir mgaih mtam, mâo klei mdê hjăn, ƀiădah amâo dưi msir mgaih hlue si klei bhiăn mbĭt čiăng mtrŭn hlue si klei dưi.