Leh kơ anăn, bruă kƀĭn ala ngă leh klei bi ruĕ klei bi kƀĭn mjêč tal 9. Mâo dŭm hdră mtrŭn mâo leh bruă kƀĭn ala bi mklă aguah anei 19/2, mâo: Yhdră mtrŭn mơ̆ng bruă kƀĭn ala kơ klei duh bi liê bruă mkra êlan êdeh treng Lào Cai - Hà Nội - Hải Phòng; hdră mtrŭn lông ngă dŭm klei bhiăn, hdră êlan hjăn pioh kơ bruă mkra êlan êdeh treng hlăm ƀuôn prŏng Hà Nội, ƀuôn prŏng Hồ Chí Minh; hdră mtrŭn kơ dŭm klei bhiăn mnkra mjing anôk bi êran pui kmlă hạt nhân Ninh Thuận; hdră mtrŭn kơ klei čih mkra hdră bhiăn lŏ mlih mrâo; hdră bhiăn kơ bruă mkŏ mjing sang čư̆ êa alŭ wăl lŏ mlih mrâo; hdră mtrŭn kơ bruă dăp wĭt mnuih mă bruă hŏng klei khuăt êpul khua kiă kriê knŭk kna, hdră mtrŭn thiăm mbŏ kơ hdră mđĭ kyar bruă duh mkra ala ƀuôn thŭn 2025 hŏng ênoh čuăn đĭ kyar truh 8% kơ dlông; hdră mtrŭn lông ngă dŭm hdră êlan ruh mgiah klei dleh dlan kơ bruă kreh knhâo, kdrăp mrâo, lehanăn mlih mrâo hŏng klei knhêč./.

Êlâo anăn, hruê 18/2 mbruê, Anôk bruă kƀĭn ala bi trông lehanăn bi mklă Hdră mtrŭn mơ̆ng Anôk bruă kƀĭn ala kơ hdră mkŏ wĭt anôk bruă Knŭk kna, Hdră mtrŭn mơ̆ng Anôk bruă kƀĭn ala kơ ênoh mnuih mă bruă hlăm Knŭk kna wưng Anôk bruă kƀĭn ala tal XV mkra mlih. Hluê anăn, hdră mkŏ wĭt anôk bruă knŭk kna mâo 14 Phŭn bruă lehanăn 3 anôk bruă bi knar Phŭn bruă.

Kơ ênoh mnuih mă bruă hlăm Knŭk kna mâo 25 čô, mâo: Khua knŭk kna, 7 čô Kơiăng khua knŭk kna; 14 čô Khua phŭn bruă lehanăn 3 čô Khua knơ̆ng bruă bi knar Phŭn bruă. Anôk bruă kƀĭn ala ruah leh Mai Văn Chính lehanăn Nguyễn Chí Dũng ngă Kơiăng khua knŭk kna, 4 čô Khua phŭn bruă dưi bi mklă gưl anei mâo: Khua phŭn bruă Rŭ mdơ̆ng Trần Hồng Minh, Khua phŭn bruă kreh knhâo – kdrăp mrâo Nguyễn Mạnh Hùng, Khua phŭn bruă Lŏ hma lehanăn wăl hdĭp mda Đỗ Đức Duy, Khua phŭn bruă Djuê ana lehanăn klei đăo Đào Ngọc Dung.