Mơ̆ng knhal jih thŭn dih truh ară anei, ti kdriêk Dak Rlâp, čar Dak Nông, klei gun kpăk ruh mgaih anôk ala kơ bruă Sang mkra mjing alumin Nhân Cơ mâo hlăm djăp mta hdră bruă, mơ̆ng krĭng ba msei truh kơ dŭm krĭng rŭ mdơ̆ng anôk bruă mrô 3 mơ̆ng ênao lăn hlŭ hrah leh anăn knơ̆ng kdơ̆ng mrô 2 mgơ̆ng hlŭ djah leh mkra mjing. Knơ̆ng bruă sang čư̆ êa čar Dak Nông mkŏ mjing leh Êpul mă bruă čiăng msir mgaih dŭm klei dleh dlan, gun păk hlăm hdră mă bruă mơ̆ng Knơ̆ng bruă Ksuêh Dak Nông – TKV, anôk bruă kriê dlăng dŭ mdiăng sang mkra mjing Alumin Nhân Cơ (Pia klah čŭn jing Êpul 1664).

Nguyễn Quang Tứ, Khua Knơ̆ng bruă sang čư̆ êa kdriêk Dak Rlâp brei thâo, hŏng klei gĭt gai jih hnơ̆ng mơ̆ng Kñơ̆ng bruă sang čư̆ êa čar leh anăn klei bi hgŭm kjăp mơ̆ng dŭm knơ̆ng, dhar bruă, bruă msir mgaih anôk ala kơ hdră bruă sang mkra mjing alumin Nhân Cơ hlăk grăp knhuang dưi ruh mgaih. Klă klơ̆ng, hŏng klei mă bôxit thŭn tal 4 -6 (wưng 202-2022) mtrŭt mjhar leh 18 gŏ êsei ba jao ênhă hlăm brô 15 ha; bi leh jao anôk ala anộ bruă mrô 2 ênao lăn hlŭ hrah. Kdriêk hlăk mbĭt hŏng dŭm knơ̆ng dhar bruă gĭr bi hrŏ hră mơar pŏk ngă mkŏ mjing 6 wăl anôk dôk mrâo kơ mnuih ƀuôn sang.

"Lăn ala pioh kơ sang mkra mjing snăn kdriêk jao leh kơ TKV jing 15 ha snăn djăp pioh rŭ mdơ̆ng truh hruê 15-4. Ară anei mâo tlâo bruă brei ngă jing mkŏ mjing hdră mă lăn 1 gŏ êsei, răng mgang rŭ mđơ̆ng 5 gŏ êsei leh anăn mtrŭt mjhar 17 gŏ êsei snăn mâo 13 ha srăng rơ̆ng ênhă mkra mjing truh hruê 1/6. Tal tlâo snăn ênhă adôk jing mphŭn ba yua thŭn tal 7-8 mâo 77 gŏ êsei hŏng 73 ha, hlăm anăn mâo 40 gŏ êsei mnuih ƀuôn sang dôk snăn hlue si hnơ̆ng mlan 4 anei kdriêk srăng bi mklă hdră msir 2 wăl anôk dôk mrâo kơ mnuih ƀuôn sang”.

Nguyễn Bá Út, Khua Knơ̆ng bruă tuh tia mnia blei Dak Nông K’iăng êpul mă bruă 1644 mơ̆ng Knơ̆ng bruă sang čư̆ êa čar Dak Nông, lač, bruă ktang hĭn ară anei mơ̆ng alumin Nhân Cơ jing anôk ala rŭ mdơ̆ng hŏng hhdră bruă anôk bruă mrô 3 ênao lăn hrah, adôk 3 gŏ êsei amâo bi hgŭm ksiêm yap ana pla mjing, hdră bruă rŭ mdơ̆ng ti lăn pô. Hdră bruă knơ̆ng kdơ̆ng mrô 2 Sang mkra mjing msei ăt ka dưi ngă bruă kyua adôk 11 gŏ êsei ka mbĕ đuĕ. Čar mtă leh kơ Knơ̆ng bruă sang čư̆ êa kdriêk Dak Rlâp pral bi blŭ hrăm hŏng dŭm gŏ êsei mnuih ƀuôn sang, ksiêm dlăng đru hlue si hdră kčah, leh anăn mâo hdră msir jăk hĭn:

"Ară anei dôk kƀĭn lu hlăm bruă msir mgaih čiăng mâo mnơ̆ng dhơ̆ng kơ sang mkra mjing, snăn êpul mă bruă bi mklă jing kjăp. Ƀiădah anôk ala kơ anôk bruă mrô 2 mrô 3 snăn dôk gun kpăk lu, wăt bruă mnuih ƀuôn sang amâo bi hgŭm čiăng ksiêm yap snăn brei mâo hdră mgô̆ mă čiăng ksiêm yap.  Anôk anei amâo dưi msir mgaih snăn wăt tơdah mâo mnơ̆ng dhơ̆ng ăt kăn dưi ngă rei, sang mkra mjing ăt mdei ngă bruă mơh.”

Bruă ruh mgaih klei dleh dlan gun kpăk hlăm hdră ngă bruă mơ̆ng Knơ̆ng bruă ksuêh Dak Nông, hlue si Lê Trọng Yên, K’iăng Khua Knơ̆ng bruă sang čư̆ êa čar Dak Nông, čar mâo leh klei gĭt gai klă klơ̆ng kơ djăp knơ̆ng, dhar bruă, Knơ̆ng bruă sang čư̆ êa kdriêk Dak Rlâp ăt msĕ mơh knơ̆ng bruă ksuêh Dak Nông. Dŭm anôk bruă brei msir mgaih jăk hĭn, kƀĭn jih hnơ̆ng čiăng dưi bi leh dŭm bruă klam dưi jao, rơ̆ng kơ Sang kmkra mjig Alumin Nhân Cơ ngă bruă kjăp, đru mguôp yuôm bhăn hlăm bruă mđĭ kyar hdră duh mkra- ala ƀuôn ti alŭ wăl./.