Hlăm klei bi mĭn ƀuh mơ̆ng dŭm hruê tal êlâo mtlaih êngiê čar Dak Lak, Y-Per Niê, ti ƀuôn hgŭm Đạt Hiếu, wăl krah Ƀuôn Hô (tuôm mă bruă ti đang kphê Rossi mơ̆ng hdră êlan kiă kriê knŭk kna hđăp) brei thâo: Leh hruê mtlaih êngiê, đang kphê mâo dŭm anôk bruă êngao knŭk kna mơ̆ng hdră êlan knŭk kna hđăp kiă kriê mâo Knŭk kna lŏ jao kơ anôk bruă knŭk kna kriê dlăng. Dŭm gưl bruă knŭk kna mrâo mphŭn kčưm kơ bruă lŏ mkŏ dăp hdră duh mkra pla mjing, mkŏ mkra ƀuôn sang.

Mtlaih êngiê leh đang kphê mmông anăn knŭk kna mrâo kriê dlăng, mkŏ mjing kdrăn lŏ hma, mđing ngă bruă duh mkra, iêu mtrŭt mnuih ƀuôn sang mkra mbông mnuôr êa, ti mbông mnuôr êa ƀuôn T’ring mơ̆ng đang kphê Rossi ktŭng ba truh ti krĭng adih čiăng krih kphê, krih êa kơ kdrăn lŏ, mnuih ƀuôn sang hơ̆k kdơ̆k kyua anăn diñu gĭr nao hgŭm ngă mbĭt. Diñu nao klei mbông mnuôr êa hŏng ai êwa mrâo mơ̆ng hruê dưi mtlaih êngiê. Dlăng kluôm, mnuih mă bruă diñu mơak sơaĭ kyua mơ̆ng anei dưi tlaih mơ̆ng kiê kngan kiă kriê mơ̆ng phung roh”.

Leh 50 thŭn Hdră mblah tŭ dưi Ƀuôn Ama Thuôt lehanăn mtlaih êngiê čar Dak Lak, ai tiê mnuih ƀuôn sang bŏ hŏng klei ktưn hưn. Dŭm thŭn mlan dleh dlan jing leh hla pŏk hƀuê ênuk kdrưh kơăm, pŏk sa ênuk gưl đĭ kyar bruă duh mkra – ala ƀuôn jăk siam. Boh nik – ana kphê – klei bi êdah mơ̆ng krĭng lăn dap kngư – đru mguôp yuôm bhăn hlăm bruă mjing hnư hrui wĭt hơĭt, mđĭ boh tŭ yuôm kơ ƀĭng ngă lŏ hma lehanăn bi mklă kơhưm mơ̆ng kphê Việt Nam hlăm wăl anôk mnia mblei tar rŏng lăn. Ama H’Loan ti ƀuôn hgŭm Thắng Lợi, ƀuôn prŏng Ƀuôn Ama Thuôt bi êdah klei mgei ai tiê, ktưn hưn brei thâo:

 “Boh nik thŭn anei jing Knăm bi hdơr 50 thŭn Hruê mblah tŭ dưi Ƀuôn Ama Thuôt lehanăn ăt jing Knăm mơak Kphê dưi mkŏ mjing prŏng êdi mơ̆ng êlâo adih truh kơ ară anei. Bruă klam mơ̆ng hmei lehanăn êpul phung mbruă hlăm ƀuôn sang jing hưn mthâo knhuah siam mơ̆ng dhar kreh mnuih djuê ana Êđê. Anăn jing mnơ̆ng pơ̆k mñam, dŭm kdrăp tông ayŭ djuê ana msĕ si: Ki pah, Đĭng năm, brô̆ T’rưng…Boh nik, thŭn anei bi hdơr 50 thŭn Hruê mtlaih êngiê čar Dak Lak, kâo ƀuh klei hdĭp mnuih ƀuôn sang mâo lu klei bi mlih, đĭ kyar hĭn. Mnuih ƀuôn sang mâo leh klei bi mlih hlăm klei mĭn, mđĭ kyar bruă duh mkra; boh nik mơ̆ng thŭn êlâo truh kơ thŭn anei, kphê čhĭ mâo ênih. Anei jing klei mơak prŏng hŏng mnuih pla kphê”. 

Knăm mơak Kphê Ƀuôn Ama Thuôt tal 9 thŭn 2025 mâo lu hdră bi mni kơ mnuih pla, mkra mjing lehanăn mnia mblei kphê, hưn mthâo klei găl hiu čhưn ênguê, mtrŭt mđĭ hdră duh bi liê hlăm anôk bruă kphê lehanăn dŭm mta mnơ̆ng lŏ hma; hưn mthâo, hâo mdah dhar kreh jăk siam mơ̆ng mnuih ƀuôn sang djuê ana ƀiă, boh nik jing Wăl anôk dhar kreh čing čhar Lăn dap kngư – Knhuah gru dhar kreh amâo êdah klă bi ala kơ anak mnuih tar rŏng lăn. H’Bích Ƀuôn Yă, ti ƀuôn Brê, să Hòa Phú, ƀuôn prŏng Ƀuôn Ama Thuôt brei thâo snei:

 “Knăm mơak anei jing klei mơak prŏng kơ jih jang mnuih ƀuôn sang ti čar drei. Mnuih pla kphê ăt mơak mơh kyua kphê srăng mâo ênoh hĭn, dưi mâo djăp prăk kăk duh kơ bruă pla mjing. Kâo ăt ktưn hưn kyua anei jing klei găl čiăng kơ kphê drei dưi kpưn đĭ kbưi hĭn hlăm tar rŏng lăn. Lŏ dlăng wĭt 50 thŭn êgao, klei hdĭp mnuih ƀuôn sang đĭ kyar leh, boh nik dua thŭn giăm anei, kphê mâo ênoh, mnuih ƀuôn sang dưi tla jih nư klei kyua anăn diñu mơak êdi”.

Hŏng asăp hưn mthâo “Ƀuôn Ama Thuôt – Anôk truh mơ̆ng kphê tar rŏng lăn”, êngao kơ Mniê êra siam kƀăt Việt Nam thŭn 2017; Top 5 Mniê êra siam tar rŏng lăn thŭn 2018 H'Hen Niê lehanăn Mniê êra siam bi ala kơ Anôk bruă hiu čhưn ênguê Việt Nam 2024 Đinh Thị Hoa jing Pô bi ala hŏng bruă klei mrâo klă klơ̆ng, Knăm mơak Kphê Ƀuôn Ama Thuôt tal 9 thŭn 2025 lŏ mâo lu “Pô bi ala hŏng anôk bruă klei mrâo” mkăn, anăn jing dŭm čô êdah êdi, amâo djŏ knŏng mâo kơhưm hlăm anôk bruă dhar kreh, hiu čhưn ênguê ƀiădah lŏ mâo klei khăp mơai lehanăn klei thâo săng kluôm kơ kphê lehanăn dhar kreh lăn dap kngư. Ayŏng Y-Miu Niê, ti să Êa Drông, wăl krah Ƀuôn Hô, jing sa hlăm dŭm čô bi ala hŏng bruă klei mrâo kơ Knăm mơak kphê gưl anei dôk gĭr ba anăp hưn mthâo kơ “Ƀuôn Ama Thuôt – Anôk truh mơ̆ng kphê tar rŏng lăn”.

 “Kâo ƀuh Knăm mơak Kphê yuôm bhăn êdi, mnuih ƀuôn sang ăt hŏk mơak dôk čang guôn knăm mơak anei. Mŏng anăn, mjing boh kdrŭt kơ mnuih ƀuôn sang mđing hĭn kơ bruă pla mjing, ngă lŏ hma. Čang hmăng knăm mơak anei srăng đru boh tŭ yuôm mnơ̆ng lŏ hma đĭ hĭn, mnuih ƀuôn sang srăng mâo klei hdĭp trei mđao, sah mdrŏng hĭn. Kâo jing sa čô êdam êra mda asei, ƀiădah mơ̆ng dŭm klei yăl dliê hƀuê ênuk lehanăn klei hdĭp ară anei, leh 50 thŭn mtlaih êngiê, klei hdĭp mnuih ƀuôn sang pô klă sĭt mâo klei bi mlih, siam hĭn, kreh dhar hĭn lehanăn đĭ kyar hĭn”.

 “Ƀuôn Ama Thuôt – Jhŏng ktang lehanăn jăk siam” jing dŭm klei drei dưi ƀuh hlăm dŭm hruê mlan Tlâo hƀuê ênuk. Êma pluh thŭn êgao leh mơ̆ng hruê hdră mblah hƀuê ênuk 10/3/1975, Ƀuôn Ama Thuôt ăt krơ̆ng kjăp ai êwa jhŏng ktang mơ̆ng krĭng Lăn dap kngư. Hruê anei, ti krĭng lăn jiă knhuah dhar kreh jăk siam anei, Knăm mơak Kphê Ƀuôn Ama Thuôt hĭn mơh lŏ ƀlêč ƀlir hŏng lu mta êa mil, ba klei ktưn hưn kơ asăr kphê Lăn dap kngư “Klei jăk siam mơ̆ng krĭng lăn jăk”, kpưn đĭ truh kơ tar rŏng lăn./.