Wăl hiu čhưn ênguê Akŏ Tam, ti să Ea Tu, ƀuôn prŏng Ƀuôn Ama Thuôt jing anôk mkŏ mjing klei bi lông krah rup hŏng ana kphê. Ară anei, anôk bruă anei dôk mtluk mtlak bi leh dŭm bruă knhal tuč čiăng mprăp mnơ̆ng yua jăk hĭn kơ klei bi lông, ăt msĕ hŏng bruă bi djăp ênŭm klei čiăng čuă dlăng, mdei msăn mơ̆ng phung tuê hiu čhưn ênguê êjai truh tinei. Aduôn Nguyễn Thị Ngọc Anh, khua kiă kriê wăl hiu čhưn ênguê Akŏ Tam brei thâo:

“Hmei amâo djŏ knŏng mprăp kơ dŭm mta mnơ̆ng thơ̆ng kơ klei krah rup, ƀiădah lŏ mprăp kơ anôk čuă dlăng, sang mdei, sang huă. Ară anei hmei dôk mjêč bi leh 10 boh sang mdei msăn čiăng mđĭ jih jang jing 26 boh. Jih jang dŭm êlan mđuê̆ êa ăt hmei lŏ mkra thiăm leh anăn mprăp dŭm mta mnơ̆ng, mprăp dŭm hdră kčưm pŏk leh anăn bi ruê̆ klei bi lông, čiăng kơ klei bi lông djŏ hŏng kơhưm mơ̆ng čar, đru mkŏ mjing klei kđăm hlăm ai tiê mơ̆ng phung tuê hriê čhưn ênguê ti čar Dak Lak.”

            Anôk bruă hiu čhưn ênguê kban yuôl Ƀuôn Đon ăt dôk bi siam wăl hiu čhưn ênguê, mprăp kơ klei drông tuê. Boh nik, êlâo kơ knăm mơak Kphê thŭn anei, anôk bruă srăng mdei klei đĭ êman čiăng kriê pioh êman mơ̆ng čar. Hrô kơnăn, mlih jing klei bi hmô bruă hiu čhưn ênguê jăk hŏng êman, mâo dŭm mta jăk yâo msĕ si: Phung tuê dưi nao dlăng, ksiêm hriăm kơ êman, čuă dlăng, mă rup hŏng êman, brei kơ êman ƀơ̆ng…mbĭt hŏng anăn phung tuê hiu čhưn ênguê dưi lŏ nao hlăm dŭm klei pơ̆ng nưh đăm mmăt ti djiêu Làng Đảo, čuh pui, tông čing, ƀơ̆ng dŭm mta mnơ̆ng jăk yâo mơ̆ng čư̆ čhiăng…

Trần Thị Kim Ánh, Khua kiă kriê anôk bruă hiu čhưn ênguê leh anăn sang jưh Biệt Điện, anôk bruă kriê dlăng wăl hiu čhưn ênguê kban yuôl Ƀuôn Đon brei thâo, truh kơ ară anei, 50 adŭ mdei mơ̆ng Sang jưh dưi bi klă êlâo mưn jih leh. Klei mprăp kơ bruă hiu čhưn ênguê ti wăl hiu čhưn ênguê kban yuôl Ƀuôn Đon ăt dôk hơĭt. Bruă rơ̆ng kơ klei doh êbăt mnơ̆ng ƀơ̆ng huă leh anăn klei êđăp ênang yang ƀuôn ăt dưi dlăng yuôm bhăn

“Anôk bruă hmei ăt dlăng yuôm bhăn kơ klei doh êbăt mnơ̆ng ƀơ̆ng huă leh anăn klei êđăp ênang kơ phung tuê hiu čhưn ênguê. Hlăm klei doh êbăt mnơ̆ng ƀơ̆ng huă, hmei ăt ruah phung mkăp brei mâo klei đăo knang, mâo kơhưm, mnơ̆ng dhơ̆ng thâo klă phŭn agha čiăng rơ̆ng klei doh êbăt mnơ̆ng dhơ̆ng kơ phung tuê. Bi hŏng phung tuê jưh mdei mlam ti wăl anôk hiu čhưn ênguê kban yuôl Ƀuôn Đon hlăm wưng knăm mơak, hmei srăng mđĭ hĭn ênoh mnuih gak răng čiăng rơ̆ng klei êđăp ênang kơ phung tuê.”

            Ƀuôn prŏng Ƀuôn Ama Thuôt jing anôk srăng mkŏ mjing dŭm mta bruă phŭn mơ̆ng Knăm mơak. Mĭn tĭng, anei srăng jing anôk drông lu phung tuê hiu čhưn ênguê. Jing sa hlăm dŭm sang jưh 4 mtŭ mơ̆ng čar, Sang jưh Elephants, ti ƀuôn hgŭm Thắng Lợi bi klă jih leh adŭ mdei mơ̆ng hruê 9-11/3. Dŭm hruê êdei kơnăn, hnơ̆ng phung tuê mưn adŭ mdei ăt truh kơ 90%. Lê Văn Đức, khua kiă kriê sang jưh Elephants brei thâo, ară anei anôk bruă ngă bi leh dŭm mta bruă điêt hĭn čiăng djŏ ai phung tuê êjai hriê hŏng knăm mơak Kphê Ƀuôn Ama Thuôt.

        “Sang jưh Elephants ăt mprăp ênŭm leh djăp mta bruă, djăp yua ăt ênŭm leh mơh, djăp mta dưi bi doh, mtah siam, rơ̆ng kơ klei êđăp ênang, gang mkhư̆ klei pui ƀơ̆ng, klei doh êƀăt mnơ̆ng ƀơ̆ng huă. Lŏ mtô wĭt kơ phung mă bruă hlăm bruă đru kơ phung tuê. Sang jưh ƀuăn rơ̆ng amâo srăng mđĭ ênoh ôh”.

Hluê si aduôn Nguyễn Thụy Phương Hiếu, k’iăng khua kiă kriê knơ̆ng bruă Dhar kreh, mjuăt ktang asei mlei leh anăn hiu čhưn ênguê čar Dak lak, mĭn tĭng, knăm mơak tal anei dưi iêo mthưr 40.000 – 50.000 gưl čô tuê hiu čhưn ênguê. Truh kơ ară anei, mâo êbeh 80% sang jưh mdei mâo tuê bi klă mưn adŭ mdei tơl jih. Čiăng bi djăp ênŭm ênoh phung tuê đĭ ktang, knơ̆ng bruă mtă kơ dŭm anôk bruă hiu čhưn ênguê, hiu atăt tuê lŏ ksiêm wĭt dŭm hdră hiu čhưn ênguê mâo leh, ksiêm dlăng leh anăn mprăp dŭm klei găl, rơ̆ng klei êđăp ênang kơ phung tuê. Aduôn Hiếu brei thâo, čar srăng ngă ktang phĭt hlăm bruă ƀuah mkra phung mđĭ ênoh mnơ̆ng thơ̆ng kơ phung tuê.

“Čar ăt mâo leh hră mơar gĭt gai kơ Bruă sang čư êa dŭm kdriêk, wăl krah mbĭt hŏng bruă nao mgŭn, anôk bruă ksiêm dlăng anôk mnia mblei, knơ̆ng bruă tuh tia čiăng rơ̆ng kơ ênoh mnơ̆ng dhơ̆ng leh anăn klei êđăp ênang yang ƀuôn, ăt msĕ hŏng bruă gang mkhư̆ klei ruă tưp, rơ̆ng klei doh êbăt mnơ̆ng ƀơ̆ng huă. Bi hŏng dŭm anôk bruă hiu čhưn ênguê, knơ̆ng bruă ăt mâo leh klei gĭt gai mtă kơ dŭm anôk bruă ngă jăk bruă đru kơ phung tuê, rơ̆ng djăp klei găl, amâo mâo mđĭ ênoh. Bruă ksiêm dlăng ăt mâo hdră êlan, anăn jing ksiêm dlăng êlâo, hlăm leh anăn êdei kơ knăm mơak.”

Klei mprăp jăk mơ̆ng dŭm anôk bruă, knơ̆ng bruă leh anăn alŭ wăl kơ knăm mơak KPhê Ƀuôn Ama Thuôt tal anei hmăng hmưi srăng brei kơ phung tuê hiu čhưn ênguê dŭm klei jăk hĭn, kđăm hlăm klei mĭn leh anăn mâo klei êđăp ênang êjai hriê ti čar Dak Lak hlăm dŭm hruê mkŏ mjing Knăm mơak.