Čiăng rơ̆ng kơ Knăm mơak kphê Ƀuôn Ama Thuôt tal 8 srăng jing anôk truh “jăk, êđăp ênang leh anăn khăp kơ tuê” ƀuôn prŏng Ƀuôn Ama Thuôt, čar Dak lak dôk mâo lu bruă ngă čiăng rơ̆ng wăl hiu čhưn ênguê, klei jăk siam ƀuôn prŏng, sa hlăm dŭm bruă ngă yuôm bhăn jing klei bi hgŭm plah wah dŭm anôk bruă, bruă sang čư̆ êa alŭ wăl, mnuih ƀuôn sang čiăng lăm lui klei hiu dan leh anăn ktŭng dhăk phung  tuê.

Hlue anăn, ƀuôn prŏng Ƀuôn Ama Thuôt gĭt gai dŭm anôk bruă djŏ tuôm, Knơ̆ng bruă sang čư̆ êa dŭm ƀuôn hgŭm, să kƀĭn bi hgŭm hlue ngă, msir mgaih klei phung hiu dan hlăm êlan klông. Boh nik, amâo brei mâo phung hiu dan ôh hlăm gưl mkŏ mjing Knăm mơak kphê Ƀuôn Ama Thuôt tal 8 thŭn 2023. Mbĭt anăn, gang mkhư̆ klei mjhua phung hiu dan, hjăn păn čiăng ktŭng dhăk phung tuê hiu čhưn ênguê, ngă kơ mnuih ƀuôn sang amâo ư ai./.