Ti anôk mă bruă, dua nah bi trông kơ klei mđĭ kyar bruă duh mkra, ala ƀuôn, lehanăn dhar kreh hiu čhưn ênguê ti alŭ wăl. Phung khua kiă kriê čar Daklak lač, Daklak jing čar phŭn kơ lăn dap kngư, hŏng 49 djuê ana hdĭp mda, mâo lu knhuah gru dhar kreh. Čar mâo kphê prŏng, dưi mâo truh hlăm brô 400 êbâo tôn/thŭn. Kphê Ƀuôn Ama Thuôt jing leh anăn knăl hing ang, mâo klei bi knăl kơ anôk jăk. Wưng leh êgao čar mâo lu bruă ngă hgŭm leh hŏng Dhŭng Korea, boh nik hŏng čar Jeollabuk hlăk ba wĭt leh lu klei tŭ dưn yuôm bhăn.

Bi ala kơ êpul ngă bruă brei thâo, Goyang jing ƀuôn prŏng kơ čar Gyeonggi, tĭng kơ nah dưr ala čar Dhŭng Korea, kbưi hŏng ƀuôn prŏng Seoul hlăm brô 18 km. Anei jing leh ƀuôn prŏng jŭm Seoul, jing ƀuôn prŏng mnga, anôk hing ang hŏng knăm mơak mnga kreh mkŏ mjing hlăm mlan 4 lehanăn mlan 5 grăp thŭn.

Leh bi ksiêm duah alŭ wăl čang hmăng mâo keli thâo bi mguôp mbĭt kơ bruă hiu čhưn ênguê, dhar kreh lehanăn mnia mblei. Oh Jun Hwan, Khua êpul hgŭm klei rang mdah mnga ƀuôn prŏng Goyang, lač, srăng jăk hĭn tơdah mâo klei bi hgŭm, mguôp mbĭt hŏng brua rang mdah kphê, hưn mdah mnơ̆ng dhơ̆ng mơ̆ng kphê ti lăn čar Dhŭng Korea: Hŏng Goyang jing anôk mâo lu klei čhĭ mnia kphê, bi ti Daklak jing anôk pla mjing kphê, snăn klei bi mguôp anei srăng jing klei găl jăk kơ dua nah. Čang hmăng srăng lŏ mâo lu klei bi mguôp hĭn, knŏng čiăng kơ tĭng Daklak bi êdah klei pô čiăng, kñăm dua nah ngă mtam bruă bi hgŭm, pioh mđĭ kyar kjăp hĭng tui si klei dưi”./.