Ƀuôn prŏng mâo 22 hlăm 22 kdriêk čar, kdriêk, ƀuôn prŏng Thủ Đức leh anăn 281/312 ƀuôn hgŭm, să, wăl krah čih mkra hdruôm hră hƀuê ênuk bruă Đảng, hƀuê ênuk bruă krŭ kdơ̆ng wưng thŭn 1930 – 1975 leh anăn mơ̆ng 1975 truh kơ ară anei.

Khădah sơnăn, ƀiădah hlăm bruă hluê ngă asăp mtrŭn mrô 20 mơ̆ng Êpul khua bruă Đảng gưl dlông ti ƀuôn prŏng Hồ Chí Minh ăt mâo lu klei dleh kpăk msĕ sơnei: Bruă dăp mnuih mă bruă, sa kdrêč kyua bruă hâo hưn amâo mâo pô mă bruă thơ̆ng kơ hƀuê ênuk mơ̆ng Đảng. Blŭ hlăm klei kƀĭn, Nguyễn Hồ Hải, khua kiă bruă Đảng ƀuôn prŏng mñă klă: Wưng kơ anăp, dŭm anôk bruă lŏ dơ̆ng hluê ngă leh anăn mgaih msir  dŭm klei dleh kpăk hlăm wưng ară anei. Si srăng ngă čiăng kơ bruă čih mkra klei hâo hưn, mtô bi hriăm hƀuê ênuk Đảng ƀrư̆ hruê ƀrư̆ jăk, djŏ guôp hŏng grăp čô, boh nik jing phung mda asei. Mâo dŭm mta phŭn gĭt gai čiăng kơ mnuih ƀuôn sang thâo klă kơ hƀuê ênuk leh anăn gĭr hluê ngă bruă anei.