Ƀuôn prŏng Vinh jing anôk bruă duh mkra- kđi čar Nghệ An- ƀuôn sang khua gĭt gai Hồ Chí Minh khăp hơiêng leh anăn dŭm gưl phung krŭ kdơ̆ng nao êlâo. Hlăm 60 thŭn êgao, boh nik jing 10 thŭn hlue ngă Hdră mtrŭn mrô 26 mơ̆ng Phŭn bruă kđi čar kơ hdră tă, bruă klam mđĭ kyar čar Nghệ An truh thŭn 2020, Ƀuôn prŏng Vinh mâo đĭ kyar kluôm ênŭm, hŏng lu klei tŭ yuôm bhăn. Thŭn 2022, hnơ̆ng đĭ kyar bruă duh mkra mâo 9,02%; prăk hrui wĭt kah knar grăp čô mâo 120 êklăk prăk, lu hĭn 2,37 blư̆ kah knar mbĭt ti čar.

Hơêč hmưi kơ Ƀuôn prŏng dưi mâo, Khua bruă kƀĭn ala Vương Đình Huệ mtă, brei čar lŏ mjêč hlue ngă hdră ngă bruă hŏng dŭm hdră kčah, hdră klă klơ̆ng Čuăl mkă čar Nghệ An wưng 2021 - 2030 mrâo bi mklă; hnơ̆ng trah dlăng leh anăn hdră bruă čiăng mđĭ kyar Ƀuôn prŏng Vinh hlăm klei bi hgŭm kluôm mơ̆ng čar Nghệ An leh anăn kluôm krĭng, hlue ngă hdră kčah mđĭ kyar êlan dơ̆ng Vinh - Cửa Lò, mjing boh kdrŭt mđĭ kyar bruă duh mkra, bi hgŭm dŭm wăl phŭn, mkŏ anôk bruă ngă hră mơar ƀuôn prŏng leh anăn wăl hiu čhưn ênguê êa ksĭ.