
Jih jang hdră lông ngă bruă mâo ksiêm dlăng kjăp, mđung ti mmông anăn mtam hŏng dŭm anôk mkŏ čiăng kơ Bruă Đảng čar Lâm Đồng, Bình Thuận leh anăn Dak Nông ksiêm dlăng. Hdră lông ngă bruă klă klơ̆ng ngă djŏ klei čiăng. Y Thanh Hà Niê Kđăm, Khua dlăng bruă Đảng čar Lâm Đồng, bi mklă, bruă dŭm anôk bruă knŭk kna gưl să lông ngă bruă amâo djŏ knŏng jing knhuang mphŭn kčưm čiăng bi mưng hŏng gru hmô mrâo ôh, ƀiădah lŏ jing klei găl kơ dŭm anôk bruă, alŭ wăl pral bi leh êpul bruă. Anei ăt jing klei ksiêm dlăng klei thâo gĭt gai, bi hgŭm plah wah dŭm adŭ bruă, khua gĭt gai gưl să mrâo. Ya klei gun kpăk, mtŭk mtŭl brei mâo msir mgaih mjêč êlâo kơ jih jang 124 să, ƀuôn hgŭm, anôk bruă klă sĭt mă bruă.

Tlam 23/6, Ƀuôn hgŭm Dhŭng Gia Ngĩa, ƀuôn prŏng Gia Nghĩa, čar Dak Nông lông ngă bruă. Dŭm hră mơar djŏ tuôm hŏn lăn ala, hdră bhiăn, hră gŏ êsei…dưi tŭ mă leh anăn mgaih msir kluôm dhuôm kơ mnuih ƀuôn sang, brei ƀuh klei mprăp leh anăn klei gĭr mơ̆ng anôk bruă mrâo. Ƀuôn hgŭm Dhŭng Gia Ngĩa, dưi mkŏ mjing êjai bi mŭt mbĭt ƀuôn hgŭm Nghĩa Phú, Nghĩa Tân leh anăn să Đắk R’Roan (ƀuôn prŏng Gia Nghĩa, čar Dak Nông).

Klei bi hmô ƀuôn hgŭm mrâo mâo dŭm anôk bruă: adŭ bruă, adŭ bruă duh mkra – bruă mkŏ mkra wăl krah, adŭ bruă dhar kreh – yang ƀuôn leh anăn anôk bruă knŭk kna, mbĭt hŏng dŭm anôk bruă knŭk kna mơ̆ng dŭm alŭ wăl bi mŭt mbĭt. Phung mă bruă hlăm brô 120 čô. Hlăm hruê lông ngă, jih jang dŭm hră mơar mơ̆ng mnuih ƀuôn sang leh anăn knơ̆ng bruă dưi mgaih msir kluôm dhuôm.
Viết bình luận