Trương Văn Quốc (56 thŭn), dôk ti ƀuôn hgŭm Ea K’tur, čar Daklak, mrâo blei êdeh ô tô 5 anôk dôk, êdeh djah. Leh ênŭm hră mơar phŭn mơ̆ng adŭ bruă kahan ksiêm êlan klông, ñu ba wĭt êdeh kơ sang lehanăn nao kơ anôk bruă kahan ksiêm ƀuôn hgŭm Ea K’tur čiăng lŏ wĭt ngă hră mơar. Khădah leh khua thŭn, lehanăn amâo mâo thâo ôh kơ kdrăp mrâo, ƀiădah Quốc mâokahan ksiêm jih ai tiê ktrâo atăt. Kyuanăn, jih jang bruă ngă hră mơar êdeh mâo ngă hŏng klei pral. Trương Văn Quốc lač.

 “Kâo mâo knuă druh kahan ksiêm anôk ngă hră mơar êdeh, ktrâo atăt brei hlăm phần mềm, čih hưn ênoh jia, ksiêm dlăng mrô jar êdeh, mrô masin êdeh. Ară anei, kâo tuh jia leh, ngă mrô lehanăn diñu ƀuăn hlăm 2 – 3 hrue. Snăn kahan ksiêm ƀuôn hgŭm ktrâo atăt jih ai tiê hŏng mnuih ƀuôn sang, ngă hră mơar hŏng klei pral lehanăn găl ênưih”.

          Nguyễn Minh Tuấn, mnuih mă bruă hlăm anôk čhĭ êdeh ô tô ti Daklak brei thâo, sa mlan čhĭ êdeh mâo hlăm brô mơ̆ng 40–50 boh êdeh mrâo. Êlâo dih, klei ngă hră mơar, lehanăn mrô êdeh, bi ngă hră mơar ti anôk bruă kahan ksiêm čar amâodah kdriêk, luič lu hrue mlan. Mơ̆ng mlan 3 truh ară anei, bruă anei jing ênưih hĭn kyua mâo leh phần mềm điện tử, mkŏ hŏng kahan ksiêm ƀuôn hgŭm lehanăn dŭm anôk čhĭ êdeh. Bruă ngă hră mơar êdeh ară anei knŏng luič mă ƀiă mmông đuič, pô êdeh srăng mâo mă mrô êdeh knơ̆ng mơ̆ng 2–3 hrue, nô năng dôk guôn jih hrue kăm, lehanăn dôk bi mmiă lăng sui sĭn hŏng lu mnuih.

“Ară anei amâo lŏ guôn kruek mrô jar êdeh, mrô masin êdeh msĕ si êlâo ôh, kyuadah sang čhĭ êdeh čih brei leh hră mrô jar êdeh, mrô masin êdeh, mrô êdeh hlăm hră mơar êdeh. Phung blei knŏng mkăp klei hâo hưn kơ pô msĕ si kak asei, app định danh hnơ̆ng tal 2, čiăng čih hưn kơ ênoh tuh jia, leh mơ̆ng anăn knŏng dôk guôn klei diñu hưn mñă hlăm đĭng blŭ pô. Leh mơ̆ng anăn srăng tla prăk thâodah mơĭt êlan akkhao, leh mơng anăn mâo mrô êdeh, hưn leh ênŭm tuh jia, knŏng luič mă 2 – 3h mă bruă, dưi bi leh ênŭm hră mơar êdeh. Mnuih blei êdeh dah knang brei mơĭt brei hlue êlan dăng kông, srăng dăng kông mơĭt truh kơ sang”.

Thượng úy Nguyễn Tất Diệu, knuă druh pô klam bruă ngă hră mơar êdeh êdâo kahan ksiêm ƀuôn hgŭm Ea K’tur lač, grăp mlan anôk bruă mâo ngă hră mơar truh 200 hră mơar kơ êdeh mô tô lehanăn 60 hră mơar kơ êdeh ô tô, êdeh čuk, êdeh hli… leh lui hĕ kahan ksiêm gưl kdriêk mơ̆ng hrue (1/3), jih jang bruă ngă hră mơar mkăp mrâo, amâodah bi mlih hră mơar, mlih anăn êdeh êdâo… dưi ngă hŏng phần mềm lehanăn đĭng blŭ thâo mĭn. Mơ̆ng hrue 1/7 leh êgao, anôk bruă mâo tiŏ nao lu hĭn knuă druh, snăn bruă ngă hră mơar kơ êdeh pral hĭn mơh. Thượng úy Diệu lač, leh mnuih ƀuôn sang dơ̆ng mưng hŏng bruă ngă hră mơar hlăm online, mưng thâo yua hdră ngă hră mơar, snăn bruă ngă hră mơar kơ êdeh êdâo srăng pral hĭn mơh:

"Êdeh mrâo ară anei ngă hră mơar kluôm ênŭm hlăm mbah online sơăi. Tơdah nao blei êdeh ti anôk čhĭ êdeh, mnuih blei knŏng ngă hră mơar tuh jia    online hlăm đĭng blŭ, anôk bruă kahan ksiêm srăng tŭ mă hră mơar, ngă hră mơar, lehanăn srăng bi wĭt hră mơar leh ngă. Mnuih blei êdeh knŏng dôk guôn, lehanăn tŭ mă hră mơar ti sang pô đuič. Bi hŏng êdeh djah, mlih anăn pô êdeh, lŏ blei êdeh djah amâodah bi mlih klei jing êdeh, mnuih ƀuôn sang djă ba hră mơar, lehanăn êdeh truh kơ anôk bruă kahan ksiêm, srăng mâo klei ksiêm dlăng. Tơdah êdeh amâo  duah kroh dhông mrô jar êdeh, mrô masin êdeh, êa mil êdeh ăt hrông djŏ si hđăp snăn klei ngă hră mơar srăng pral hŏng pô mrâo msĕ si ngă hră mơar blei êdeh mrâo mơh”.

Leh mkra mlan mrâo bi mŭt čar, Daklak lŏ dơ̆ng mâo nanao dŭm êtuh boh êdeh ôtô lehanăn mô tô dưi ngă hră mơar mrâo. Khădah ênoh êdeh êdâo ƀrư̆ hrue ƀrư̆ lu, mnuih mă bruă ka jăk ênŭm, ƀiădah hŏng ai tiê klei đua klam, lehanăn gĭr ktir mă bruă knuă, kahan ksiêm čar Daklak ăt mă bruă hlăm klei tŭ dưn ngă hră mơar êdeh êdâo. Dŭm klei mlih mrâo hlăm hdră mă bruă mrô, amâo mâo djŏ knŏng jing pral, ƀiădah kăn luič liê ngăn prăk rei kơ klei êrô êbat, klei anei bi êdah ai tiê klei mă bruă kơ mnuih ƀuôn sang./.