Hluê si klei hưn mơ̆ng Knơ̆ng bruă kreh, mjuăt asei mlei leh anăn hiu čhưn ênguê čar Lâm Đồng, 6 mlan akŏ thŭn anei, Lâm Đồng iêo jak êbeh 12 êklăk gưl čô tuê, mâo 545 hdră kčah leh anăn đĭ 20% mkă hŏng wưng anei thŭn dih. Hlăm ênoh anăn mâo giăm 800.000 čô tuê mơ̆ng ala tač êngao, đĭ 56%. Bruă bi mŭt mbĭt 3 čar Lâm Đồng, Bình Thuận leh anăn Dak Nông jing čar Lâm Đồng mrâo dưi pŏk lu klei găl mtrŭt mđĭ bruă hiu čhưn ênguê, rơ̆ng bi leh mta kñăm drông êbeh 22,4 êklăk gưl čô tuê hlăm thŭn 2025.

Ƀiădah klei pŏk mlar anôk bruă knŭk kna ăt ngă truh lu klei lông dlăng kơ bruă bruă mkŏ mkra êlan klông, ai dưi mă bruă leh anăn ai dưi mrô plah wah dŭm alŭ wăl. Hluê si Nguyễn Văn Lộc, khua Knơ̆ng bruă kreh, mjuăt asei mlei leh anăn hiu čhưn ênguê čar Lâm Đồng, anei jing dŭm klei kpăk čiăng hnưm uêñ mĭn ruh mgaih.

“Drei ƀrư̆ ƀrư̆ lŏ kač rup hla kak rup bruă hiu čhưn ênguê čar Lâm Đồng, ƀiădah amâo mâo djŏ ôh lăm lui jih jang dŭm boh tŭ dưn bruă hiu čhưn ênguê mơ̆ng Đà Lạt, Phan Thiết, ƀiădah jing bi mrâo ñu. Si srăng ngă čiang ba yua tŭ dưn anôk bruă hiu čhưn ênguê mơ̆ng Đà Lạt, anôk bruă hiu čhưn ênguê Dak Nông leh anăn mkŏ hŏng bruă hiu čhưn ênguê mơ̆ng êa ksĭ, mkŏ mjing klei bi mguôp mơ̆ng êa ksĭ, mơ̆ng čư̆ čhiăng truh kơ krĭng dap mnai. Čiăng dưi mđĭ kyar bruă hiu čhưn ênguê srăng bi kƀĭn jih jang, boh nik jing bruă mkŏ mkra. Msĕ si Đà Lạt – Phan Thiết, Đà Lạt – Gia Nghĩa mơ̆ng leh mtlaih êngiê truh kơ ară anei drei ăt adôk hluê êlan hđăp. Hmăng hmưi anăp anei čar mrâo srăng duh bi liê kơ dŭm bĭt êlan anei”.

Leh bi mŭt jing čar mrâo, bruă sang čư̆ êa čar Lâm Đồng mñă kơ Knơ̆ng bruă kreh, mjuăt asei mlei leh anăn hiu čhưn ênguê bi mguôp hŏng knơ̆ng bruă kreh knhâo leh anăn mrâo mrang ksiêm duah, mkŏ mjing dŭm hdră êlan tŭ dưn čiăng đru jăk hĭn kơ phung tuê, mtrŭt mđĭ bruă hiu čhưn ênguê đĭ kyar. Hluê si klei bi êdah mơ̆ng knơ̆ng bruă kreh knhâo leh anăn mrâo mrang čar Lâm Đồng, ti anăp č ar srăng bi mklin dŭm mbah bruă hiu čhưn ênguê thâo mĭn  mơ̆ng 3 čar hđăp jing sa mbah bruă hiu čhưn ênguê mơ̆ng čar mrâo. Mbĭt anăn, bi kƀĭn kdrăp dưn yua bruă hiu čhưn ênguê hlăm đĭng blŭ thâo mĭn mơ̆ng dua čar Lâm Đồng leh anăn Bình Thuận Hđăp, mkŏ mjing sa app yua mbĭt mâo klei mbŏ klei hưn, klei jăk kơ bruă hiu čhưn ênguê Dak Nông. Čiăng bi hơĭt hnơ̆ng ngă bruă, klei jăk kơ phung tuê, kdrăp dưn yua anei lŏ mbŏ wăt Ai, bi mguôp hŏng klei thâo mĭn mơ̆ng anak mnuih mkra mjing. Võ Thành Công, khua knơ̆ng bruă kreh knhâo leh anăn mrâo mrang čar Lâm Đồng brei thâo:

“Phung tuê ti ƀuôn prŏng Hồ Chí Minh mâo klei čiăng hiu čhưn ênguê gŏ sang 4 čô hlăm 3 hruê, diñu knŏng kčoh amâodah blŭ hlăm app kơ klei čiăng hlăm boh sĭt. App srăng ba wĭt boh tŭ, sa hruê ti anôk nao, ti anôk hiu, ya êdeh đĭ leh anăn ya srăng dlăng…Tơdah dưi ngă sơnăn, phung tuê srăng hur har ngă dŭm bruă hiu čhưn ênguê pô hlăm alŭ wăl čar”.

Hồ Văn Mười, Khua bruă sang čư̆ êa čar Lâm Đồng mñă klă alŭ wăl mâo klei găl čiăng mđĭ kyar dhar kreh, mjuăt asei mlei leh anăn hiu čhưn ênguê. Hlăm anăn Đà Lạt pia jing Lâm Đồng êbâo mnga, Bình Thuận jing Lâm Đồng êa ksĭ mtah leh anăn Dak Nông jing Lâm Đồng čư̆ čhiăng. Jih jang dŭm klei găl anei čiăng mâo klei bi mguôp bi kna leh anăn hrăm mbĭt kơh bruă hiu čhưn ênguê dưi đĭ kyar ktang leh anăn hơĭt kjăp.

 “Mñă klă čar Lâm Đồng mâo klei găl kơ dhar kreh, mjuăt asei mlei leh anăn hiu čhưn ênguê jing prŏng sơnăk. Boh klei ară anei jing srăng bi lar klei găl anei. Klei mĭn čar ih, čar kâo, čar anei čar dih bi kƀĭn 3 tlâo amâo mâo djŏ ôh. 3 čar msĕ 3 bĕ jơ̆ng, ƀiădah jơ̆ng anei jơ̆ng dih ka mtăp ôh. Ară anei alŭ wăl ksĭ mtah leh anăn êbâo mnga ăt mâo klei hơĭt leh, ƀiădah alŭ wăl Dak Nông kyua adôk awăt kyuanăn čiăng dưi mđĭ hĭn.”.