Lŏ dơ̆ng dŭm mta bruă hlăm gưl nao čuă Dhŭng Korea, tlam mbruê 11/8, ti ƀuôn prŏng phŭn Seoul, Khua gĭt gai Đảng Tô Lâm mâo leh mmông bi tuôm hŏng Khua knŭk kna Dhŭng Korea Kim Min Seok. Hlăm klei blŭ hrăm, Khua gĭt gai Đảng Tô Lâm mñă klă Việt Nam dlăng yuôm bhăn klei bi mjĕ bi mguôp hŏng Dhŭng Korea  leh anăn hmăng hmưi mbĭt hŏng Dhŭng Korea bi êlam hĭn klei mjĕ giăm ƀĭng hgŭm bi mguôp hdră êlan kluôm dhuôm Việt Nam – Dhŭng Korea.

Khua gĭt gai Đảng Tô Lâm mnă kơ dua tĭng lŏ dơ̆ng gĭr mkŏ mjing klei bi mguôp kjăp, sui plah wah dua ala čar, bi mni kơ dua tĭng bi klă bi tai hdră bi hdơr kơ hdră êlan brei kơ mnuih mă bruă plah wah Việt Nam leh anăn Dhŭng Korea, mđĭ hĭn klei bi mguôp bruă sang hră mơar, mñă kơ Dhŭng Korea đru mtô mjuăt mnuih mă bruă hnơ̆ng tŭ jăk msĕ si bán dẫn, êdeh pui, kdrăp sinh học, bruă tuh tia mkra mjing kŭm păn, klei thâo mĭn anak mnuih. Khua knŭk kna Kim Min Seok mnă klă srăng lŏ dơ̆ng uêñ mĭn bi mguôp hŏng Việt Nam đru mtô mjuăt mnuih mă bruă hnơ̆ng jăk kơ klei mđĭ kyar bruă duh mkra dua ala čar hlăm wưng kơ anăp.