Hmư̆ asăp jak iêô mơ̆ng Khua mil čhil Dhŭng Korea Lee Jae Myung, Khua gĭt gai  Đảng Tô Lâm hŏng mô̆ ñu leh anăn êpul bi ala gưl dlông ala čar drei nao čhưn gưl knŭk kna ti Dhŭng Korea mơ̆ng hruê 10-13/8, aguah (11/8) hlue si mmông alŭ wăl ti Anôk bruă Khua mil čhil, Khua mil čhil Lee Jae Myung gĭt gai knăm kdrưh koăm drông Khua gĭt gai Đảng Tô Lâm. Leh mmông drông 2 khua gĭt gai ngă khua êpul gưl dlông dua ala čar mâo klei bi trông kñăm kčah hdră msir yuôm bhăn čiăng lŏ dơ̆ng mđĭ lar leh anăn mđĭ kyar hĭn klei bi hgŭm hdră bruă kluôm Việt Nam leh anăn Dhŭng Korea hlăm wưng kơ anăp.

Khua gĭt gai Đảng Tô Lâm bi mklă: Mơak snăk leh anăn bi mni lač jăk kơ Khua mil čhil mâo leh klei mđing  jak iêô Khua gĭt gai Đảng jing tue gưl ala čar tal êlâo leh Dhŭng Korea mâo knŭk kna mrâo, bi êdah klei dlăng myuôm leh anăn mđing mrô sa mơ̆ng Dhŭng Korea hŏng klei bi hgŭm dua ala čar. Khua mil čhil Dhŭng Korea Lee Jae Myung bi mklă, ti gŭ klei gĭt gai klă mngač mơ̆ng Khua gĭt gai  Đảng Tô Lâm, Việt Nam  ară anei mâo klei đĭ kyar bruă duh mkra pral snăk, Khua mil čhil Dhŭng Korea đăo knang hlăm wưng kơ anăp Việt Nam srăng jing ala čar đĭ kyar hŏng prăk hrui wĭt lu.