Hlăm hdră êlan lông ngă klei đĭ kyar bruă duh mkra mmăt, ti anăp, Đà Lạt srăng knăm hluê ngă klei bi hmô war mnga ênai êa ti War mnga krah ƀuôn prŏng, mkŏ mjing klei kdŏ mmuñ grăp mmăt leh anăn dŭm anôk rang mdah mnơ̆ng dhơ̆ng. Mbĭt hŏng anăn, mkŏ mjing dŭm bĭt êlan huă ƀơ̆ng, êlan dơ̆ng mmăt ti đa đa êlan dơ̆ng leh anăn ti alŭ wăl giăm wăl tač Lâm Viên.

Grăp klei bi hmô mâo gru kruăk sơăi, leh anăn mkŏ mjing lu hdră, klei ngă bruă, bi lu jơr mnơ̆ng dhơ̆ng čiăng bi djăp ênŭm klei čiăng hlăp mbul, huă ƀơ̆ng mlam kơ mnuih ƀuôn sang ti alŭ wăl leh anăn phung tuê. Hlăm wưng mơ̆ng thŭn 2023 – 2030, Đà Lạt srăng lŏ hluê ngă thiăm dŭm klei bi hmô êlan êbat jơ̆ng, mkŏ mjing dŭm mta klei kdŏ mmuñ, blei ba yua, nao dlăng ênao êa, mbĕ mđuê̆, lŏ wĭt dăp anôk čhĭ mnia mmăt hluê hdră mrâo mrang, mkŏ mjing êpul bruă duh mkra mmăt mâo dŭm mta klei hlăp mbul, anôk bruă bi mguôp lu mta.