Leh klei drông, Đại tướng Phan Văn Giang mâo leh klei bi trông čhai hŏng Đại tướng Tea Banh. Ti anôk bi trông, Đại tướng Phan Văn Giang lehanăn Đại tướng Tea Banh mâo leh klei bi tŭ ư bruă kơ thŭn 2022 leh êgao jing klei yuôm bhăn hlăm bruă bi mguôp dua nah, mâo leh phung khua prŏng gưl dlông dua ala čar yap “Jing thŭn bi mguôp Việt Nam-Campuchia, Campuchia-Việt Nam”.

Kơ hdră hgŭm hlăm wưng kơ anăp, Đại tướng Phan Văn Giang lehanăn Đại tướng Tea Banh mâo leh klei bi tŭ ư kơ boh phŭn bruă knuă thŭn 2023 hŏng klei bi đăo knang, mă bruă mâo klei tŭ jing, kơ jih jang bruă kăp bi hưn, bruă hgŭm hiu suang, ksiêm dlăng kjăp klei êđăp ênang lăn hang, lehanăn hlăm êa ksĭ , hgŭm ngă tŭ jing jih jang bruă djŏ thŭn Campuchia mkŏ mjing SEA Games 32 lehanăn ASEAN Para Games 12; lŏ dơ̆ng bi mguôp kjăp hĭn hlăm klei mjuăt bi hriăm mnuih ngă bruă, hgŭm bi tui duah klang kleh phung djiê êngiă hlăm ênuk bi blah ./.