Leh bi mŭt čar, ti dŭm bĭt êlan mkŏ mơ̆ng nah Ngŏ hŏng nah Yŭ mơ̆ng Dak Lak klei dŭ mdiăng mnơ̆ng dhơ̆ng klă nik. Boh mnga mơ̆ng Yŭ hŏng êdeh nao ti êa ksĭ, kan hdang mơ̆ng Ngŏ nao ti krĭng čư̆ dliê, ăt mmông anăn, phung tuê hiu čhưn ênguê mơ̆ng Yŭ nao ti krĭng ktuê hang ksĭ ăt đĭ ktang, mkŏ mjing hdră “nao ti êa ksĭ - wĭt kơ dliê”. Mbĭt hŏng dŭm gưl mnơ̆ng jing klei bi tuôm, bi trông, bi siñê hră mơar bi mguôp plah wah knơ̆ng bruă dua tĭng. Nguyễn Thị Nga, khua êpul hgŭm phung mniê mnia mblei Phú yên brei thâo, leh bi mŭt mbĭt, klei mnia mblei Ngŏ - Yŭ đĭ sa blư̆ mkrah mkă hŏng êlâo dih- anei jing ênoh mrô brei ƀuh êa ksĭ leh anăn dliê dôk bi mguôp hlăm sa wăl bruă duh mkra sa anăn.

 “Hmei mâo klei bi mguôp thâo săng, ksiêm duah anôk mnia mblei, nah Ngŏ ksiêm hriăm kơ bruă lŏ hma bi Nah yŭ ksiêm hriăm kơ kan hdang. Ară anei hmei ƀuh phung grăp ti Nah Yŭ Dak Lan nao ti nah Ngŏ blei kan hdang leh anăn hiu čhưn ênguê jing lu sơnăk.”

Mbĭt hŏng klei đĭ dŭ mdiăng mnơ̆ng dhơ̆ng Ngŏ - Yŭ, hiu čhưn ênguê ăt mâo klei bi mlih kñăm ba yua djăp klei găl “sa čar - dua wăl mnơ̆ng hdĭp”. Thŭn 2026, Dak Lak bi klă anăn knăl “Ksiêm duah wăl mnơ̆ng kriê piọ”, ba yua boh tŭ dhar kreh êdah klă leh anăn amâo êdah klă, mđing truh mta kñăm drông 8 êklăk gưl čô tuê, hnư hrui wĭt 16 êbâo êklai prăk. Ai iêo jak mơ̆ng Dak Lak srăng dưi bi lar ktang hŏng 41 mmông mdah phim “Dak Lak nao hlŏng khăp” mđung hlăm dŭm mbah hâo hưn, bi klă kơhưm sa anôk truh knhuah gru mnơ̆ng ƀơ̆ng, anak mnuih leh anăn dliê kmrơ̆ng kdrưh kơăm.

Trần Hồng Tiến, Khua knơ̆ng bruă dhar kreh, mjuăt ktang asei mlei leh anăn hiu čhưn ênguê čar Dak Lak brei thâo, čar srăng mkŏ mjing dŭm hdră bruă hiu čhưn ênguê hŏng 4 yan, nao mbĭt hŏng knăm, tết leh anăn dŭm gưl mdei sui hruê, mkŏ mjing mnơ̆ng dhơ̆ng mâo nanao hlăm thŭn. Mbĭt hŏng anăn jing mtrŭt mđĭ hưn mdah rup, bi jơr mnơ̆ng dhơ̆ng lông dlăng leh anăn bruă hiu čhưn ênguê mmăt, mkŏ hdră mơ̆ng čư̆ čhiăng truh kơ êa ksĭ.

“Ară anei Dak Lak siñê bi mguôp hŏng dŭm čar msĕ si Khanh Hòa, Lâm Đồng, Gia Lai, Hà Nội, ƀuôn prŏng Hồ Chí Minh, Đà Nẵng. Bi hŏng Khánh Hòa srăng kñăm iêo jak phung tuê hiu čhưn ênguê mơ̆ng tač êngao mơ̆ng Khánh Hoà hriê ti Dak Lak, boh nik jing leh êlan dơ̆ng pral dưi ngă leh hmei srăng hưn mdah rup Dak Lak čiăng mâo dŭm mta mnơ̆ng mrâo čiăng ktŭng ba phung tuê ala tač êngao hriê hŏng Khánh Hoà wĭt hŏng Dak Lak”.

Čiăng kơ bruă duh mkra mơ̆ng Dak Lak đĭ kyar mâo klei găl, êlan klông mơ̆ng čar mâo klei bi hơĭt. Êlan dơ̆ng pral Khánh Hòa – Buôn Ma Thuột bi hluh êlan êdeh, Êlan dơ̆ng mrô 14 êlan Dar Ngŏ Ƀuôn Ama Thuô̆t bi hluh leh êlan êdeh, êlan dơ̆ng pral Quy Nhơn – Chí Thạnh ăt dơ̆ng truh hruê ba yua.

Hluê si Trần Đình Long, khua kiă kriê hđăp dhar bruă hdră bhiăn mơ̆ng Bruă Kbĭn ala, êjai wăl đĭ kyar dưi pŏk mlar leh ană bruă mkŏ mkra mlih krĭng dưi bi kluôm, bruă dŭ mdiăng mnơ̆ng dhơ̆ng, bi mbha mnuih mă bruă leh anăn mđĭ kyar klei mnia mblei - bruă mkăn srăng pŏk lu klei găl prŏng, boh nik ti alŭ wăl đĭ kyar êmưt êlâo dih.

 “Ti krah Tuy Hòa leh anăn Ƀuôn Ama Thuô̆t, mâo êwang kpleh phŭn ti krah anăn jing klei êmưt đĭ kyar, ƀiădah alŭ wăl anăn mâo klei găl prŏng. Ară anei jing sa čar amâo djŏ lŏ jing krĭng taih kbưi ôh. Êjai dưi mkra êlan klông mlir krĭng, bruă dŭ mdiăng mnơ̆ng dhơ̆ng, bi mbha mnuih mă bruă, mđĭ kyar klei mnia mblei - bruă mkăn srăng pŏk klei găl lu sơnăk. Anei jing klei găl ară anei drei srăng kčưm ba yua.”

Mŭt hlăm wưng thŭn 2025 - 2030, Dak Lak bi klei mđĭ kyar hluê si bruă mkŏ mkra hdră êlan, bi mrâo bruă Knŭk kna leh anăn duh bi liê mnia mblei. Khua Bruă sang čư̆ êa čar Dak Lak Tạ Anh Tuấn brei thâo, hŏng mta kñăm jing mkŏ wăl anôk mơ̆ng dliê truh êa ksĭ, čar srăng mkŏ mjing boh tŭ bruă hiu čhưn ênguê, bruă lŏ hma, mnơ̆ng hlăm dliê, kan hdang prŏng hĭn:

“Mkŏ krĭng čư̆ chiăng hŏng êa ksĭ leh anăn dŭm êlan anei srăng jing êlan phŭn čiăng mđĭ kyar bruă tuh tia, bruă lŏ hma kdrăp mrâo mrang leh anăn bruă hiu čhưn ênguê logistis. Tal 2 jing srăng mkŏ mjing leh anăn mđĭ kyar boh tŭ bi mguôp bruă lŏ hma mnơ̆ng hlăm dliê kan hdang hluê êlan krĭng nah yŭ čư̆ čhiăng jing krĭng pla mjing ngă bruă lŏ hma kdrăp mrâo mrang, pui kmlă doh leh anăn mkra mjing mnơ̆ng dhơ̆ng bruă lŏ hma, krĭng nah Ngŏ srăng jing anôk mkra mjing êlam, bruă logistis leh anăn bi lar klei găl mơ̆ng bruă duh mkra êa ksĭ.”

Yan mnga mrâo dôk truh, ba mbĭt klei đăo knang kơ sa Dak Lak đĭ kyar, anôk dliê bi tuôm hŏng êa ksĭ, anôk dŭm bĭt êlan pŏk kơ klei hmăng hmưi kpưn đĭ, čiăng kơ krĭng lăn čư̆ čhiăng - êa ksĭ hrăm mbĭt mŭt hlăm sa êlan đĭ kyar ktang, hơĭt kjăp leh anăn bŏ hŏng klei hmăng hmưi.